Read Masana 1 KORINTENA 16 Bible Online

1 KORINTENA 16 - Masana bible

1 KORINTENA 16

¹May kay tok slena kay sa peldetna kayni, nigi ma li ki nan di tam tapna hay Galatiya nala:

²Hay buurta jewta vi lumuta, hin san gige gige jargiya ŋay slena valam kulo'o hay ziyna valamu, kuɗ donota valamu, kay nigi ma tun caw tar vulda vigiya hay li ma nan ma coys jargi tuwaɗi.

³Hay li ma nan coysawa, sum sa nigi vileksiya kay nisi ma nar vulda-minda vigi hay Yerusalemna, nan ma cuksiya hiɗi ɗerwel hay ɓisiya:

⁴May la ŋaa'a kay nan kay tuwanu ma tuɗa kaw, sum nisina ma tuɗ hiɗi nanu.

⁵Nan ma coys goy vigiya hay li ma nan jikisawa hay Makedoniya pana, kay nan min jikis hay Makedoniya pa.

⁶Kla, nan ma mus jargiya, la ta-ta hay cayda noŋo kla, kay nigi ma gan diranu hay liy ma nan min tuɗ hayna.

⁷Kuɗ ta wulinta, nan min ɗuwgi kulo kay senɗi, may nan min mus jargi ir neeɗa, la Lawn vul hagata.

⁸May nan min mus hay Efesus ta-ta hay pantekotta.

⁹Kay vun-galan ka mali goy kan vidiŋ' kay nan li lop ɗawni, may sa gawt ka ŋolo.

¹⁰Hay li ma Timotewus coysawa jargiya, nigi ma li a nam ma mus jargi bay narta, kay nam ka li lopna vi Bum-Sumuna ki nan nala.

¹¹Nigi ma ɗuwum birek-cekɗi, gum diram hay hagata hiɗi toyta, kay nam ma co katanu, kay nan ka cubumu hiɗi ɓosiyayna.

¹²May ɓasuyna Apolos, nan siɗawan ŋolo kay nam ma tapis kuɗ ɓosiyayna kay tuɗis katgiya. May minda ka'a kay tuɗis katgi wulinɗi; la nam fi liynawa, nam ma coysa.

¹³Lakgi jigere, colgi dono'o hay vida, ligi kursulita, muɗgi dono'o.

¹⁴Slen pet ma nigi li'e, lum hay ti-kamda.

¹⁵Ɓosiyonna, nan min hin dit kayni katgi lo: Nigi wi ala ziyna vi Stefanas kayni mi vun-jafna ma jewna hay Akaya, nam ka gut kuɗ sa peldetna kaw.

¹⁶Sum sa ki kayn nala nigi ma slisi yisi kulo'o, hiɗi sum sa ka gut hay lopna, sa ka mak tuwsiya kaw.

¹⁷Dikan ka li firi ŋolo kay cota vi Stefanas hiɗi Fortinatus hiɗi Akaykus, kay nisi vurnaawa hay baŋalgiya,

¹⁸kay nisi sleɗan hayan nanawa, sleɗgi haygi nigiyawa kaw. Hay na'ta vargi ŋaa'a kay nisi sa li nana.

¹⁹Tapna hay Asiya gigi deɓe. Akuilas hiɗi Priskila hiɗi tapna sa ka hay ziyna visiya gigi deɓ ŋaa ŋolo hay Bum-Sumuna.

²⁰Ɓosiyayn kaf gigi deɓe. Gigi deɓ jar-tuwgiya hiɗi ŋaf-vunda peldetta.

²¹Gi-deɓta (van) kayni hiɗi ɓan nan Paulus kay tuwanu.

²²La sa min Bum-Sumunɗi nam beɗay goyo, (Anatema!) Maranata.[26]

²³Slugota vi Bum-Sumuna vaya Yesu Kristu mus hiɗi nigiya.

²⁴Minda vanu ka kigi kaf hay Yesu Kristu. Amen.