Read Masana 1 KORINTENA 3 Bible Online

1 KORINTENA 3 - Masana bible

1 KORINTENA 3

¹Ɓosiyonna, nan fi kus yoboyn tigiya ki nigi sum sa hiɗi ŋusta naɗi, may ki nigi sum sa hay sliwna nala. Ki nigi gurosguray tuwa hay Kristu nala.

²Nan vulgi miirawa a ci'e, may nan vulgi funɗi, kay nigi as kay tumɗi, ta-ta wulini kaw nigi as kalamɗi, kay nigi ka hay sliwna tuwa.

³Kay hay li ma hunayta hiɗi ci-wayta ka jargi ki kayn nala, kayn di ala nigi ka kuɗ sliwnaɗi su? Nigi ka poy ki sumun (hay sliwna) kawɗi su?

⁴Kay hay li ma kepn di'e: Nan tap kuɗ Paulus, hen lo ala nan kuɗ Apolos, nigi hay na'ta may si sumunɗi su?

⁵Apolos kayni mige? Lebo Paulus kayni mige? Nisiya si sa sunda sa nigi co hay vida kuɗsina, ki Bum-Sumuna vul mi gigekaw nala.

⁶Nan mi ma cuk jafna, Apolos mi ma go niyn kalamna.[4] may Lawna mi ma vul wulda.

⁷Kay na'ta sa ma cuk jafna nam ɦawa'a, sa ma go niyna nam ɦawa'a kaw, may vul wulda mi Lawna.

⁸Sa ma cuk jafna hiɗi sa ma go niyna lopna visi kepe, gigekaw ma fi wurakŋa kuɗ zalla valam kay yalamu.

⁹Kay numa'a si nuriyom tuwma'na hay lopna vi Lawna, nigiya mi sinena vi Lawna, ziyna vi Lawna kaw.

¹⁰Kuɗ slugota vi Lawna ta vuli tanu nan tun sem-ziyna ki sa ma yali ma wi inda vi ziyna nala may sa mara'a in kulo'o kalamu. May hin san gigekaw li ŋali hiɗi va ma nam inim kulo kalamna.

¹¹Kay sa fi tun sem ziy mara'a loɗi, may mi nam ma tuni tuni-tun, kayni Yesu Kristu.

¹²May la san in kulo kay sem-ziyn zawni hiɗi ora, doorota, hiɗiy ma gus lopo, guna, usna, gayna, la hiɗi hosona kaw, lopna vi san gigekaw ma ma goy haraŋi.

¹³Kay buura (vi kitata) ma patam diram goyo, kay buura (vi kitata) ma maram goy haraŋi hiɗi kuta, la lopna vi san ŋaa'a lebo lebo joo'o kaw kut ma wakamu.

¹⁴La lop ma san inim kulo kay sem-ziyna col kulo ɗeŋe, nam ma fi wurakŋa valamu.

¹⁵La lopna vi sana ŋal goyo, slena valam ma ba'a, nam kay tuwam ma suɗ goyo, may ki goy jar kuta pa nala.

¹⁶Nigiya mi tempella vi Lawna, a Ŋusta vi Lawna ka haygiya kaw, nigi bay wi kayni tuwa su?

¹⁷La san ɓulak tempella vi Lawna, namu Lawna ma ɓulakam goyo kaw, kay tempella vi Lawna ka peldete, kayni si nigiya.

¹⁸Hin sa ɗut tuwamɗi, la sa jargi var ala yalla valam hay nagat tan ka'a, hin tuwam muɗ ɦay-ɦaya, nala nam ma fi yali.

¹⁹Kay yalla vi nagat tan kayni ti ɦay-ɦayta vok Lawna. Ki ɗo'ay nala: Sa yalla nam visi hiɗi nelemda visiya.

²⁰Lo, Bum-Sumuna wi varta vi sa yalla, na'a dira' baŋa ɦawa'a.[5]

²¹Nala hin sa subur tuwam kuɗ saɗi, kay slen kaf vigi nigiya.

²²La mi Paulus kla, la mi Apolos kla, la mi Peter kla, la ti nagata kla, la ti irita kla, la ti mitta kla, la mi sle ma ka wulini kla, la mi sle ma min ma'a kla, kaf mi figina,

²³may nigi vi Kristu, Kristu vi Lawna may.