Read Masana 1 KORINTENA 4 Bible Online

1 KORINTENA 4 - Masana bible

1 KORINTENA 4

¹Nala nigi ma ɗuwma'a ki sa sunda vi Kristu sa ɓuraw sle ma ŋayayna vi Lawn goyo nala.

²Suw pete, sa ma ŋom slena vi sa'a, lalitige nam ma ŋom sle namna hiɗi ɗigerta.

³La nigi ka kitat kanu, la sumun kaw ka kitat kanu, kayni may geɗ tap-wida vanɗi, kay nan kay tuwanu may ka kitat kay tuwanɗi.

⁴Kay law may tuni kanɗi, may nan muɗ ɗiger kayn kuɗ na'taɗi, sa ma ka kitata vanu nam mi Bum-Sumuna.

⁵Kay na'ta kaagi kitata goy jew liyna va'ɗi, may cubgiya ta-ta Bum-Sumuna ma tuwa, nam ma mar sle ma ŋayay hay jufunda goy haraŋi. Varta ta ŋayay hay sumun kaw nam ma ɗeka' goy haraŋi, hay na'ta san gigekaw ma fi suburta valami vi Lawna pa.

⁶Ɓosiyonna, nan ŋuy lawt kan nan hiɗi Apolos kayni kay (hatgi) nigiya. Kay hay numa'a nigi ma hat kay raw sle ma ɗoyn goyɗi, kay jargi nigiya sa ma subur tuwam kat niram loɗi.

⁷Kay sa ma laŋ a naŋ suw segena mi gige? Va ma naŋ bay fum ɦawa'a mi mige? May la naŋ fum ɦawa'a, naŋ subur tuwaŋ ki naŋ fum ɦawaɗi nala kay mige?

⁸Nigi hobawa yo, nigi muɗawa sa mayanda yo,[6] nigi muɗawa si muliyana bay numa'a yo, kay la nigi muɗawa si muliyana, kayni ŋaa'a yo, kay numa kaw ma tap ti mulda hiɗi nigiya.

⁹Kay nan var ala, Lawna muɗma goy sa apostolayna, sa caw kaf jar sumuna, ki kitata vi mitta kaay kuma ka' nala, kay kir sa nagatna, kir sunda-wuralawna hiɗi sumun kaw numa muɗi ki va ma san cen kuɗumu nala.

¹⁰Numa muɗi sa ɦay-ɦayna kay semda vi Kristu, may nigiya, nigi yali hay Kristu, numa maŋaya, may nigi dono'o, nigi ka hay suburta, may numa ka hay zulota.

¹¹Ta-ta wulini kaw numa ka hay mayta, laat ka luma'a, tuwma goy nala'a, hay watta, ziy may kumaɗi kaw.

¹²Numa'a makaya kaw, numa'a li lop hiɗi ɓuma' kay tuwma'a. La sa ŋulma'a, numa gum bolo, la sa lasma'a; numa' va' tuwma'a.

¹³La sa di joo kuma'a, numa gatam gatiya. Numa muɗi ki sum sa tufi goyna nala, liwis kir sumun kaf ta-ta wulini.

¹⁴Nan ɗo slen kayni katgiya, kay muɗgi zuloɗi, may kay gatgi ŋali ki gurona vanu sa hayan kigina nala.

¹⁵Kay la sum sa hatgi hay Kristuna ka birim doogo kaw, nir na'ta kep sumaygi say ŋolɗi, kay sa ma vuɗgi hiɗi labara ma firina hay Yesu Kristu mi nanu.

¹⁶Kay na'ta nan siɗawgiya, sligi kuɗanu.

¹⁷Kuɗ kayni nan gi Timotewus tigiya, namu mi ma goora vanu ma hayan kalamna, ma gasina hay Bum-Sumuna, kay nam ka gigi humgiya kay hagata vanu hay Kristu, ki nan hat arige arige pet jar tapna kaf nala.

¹⁸May segena sli yam tuwsi kulo'o, nisi ka var ala nan ma coys jargiɗi kla.

¹⁹May hini neeɗa nan ma coys goy vigiya, la Bum-Sumuna min nala. Hay na'ta nisi sa sli yisi kulona, nan ma wum mi yoboyna visi ɦawaɗi, may subur-tuwta visiya.

²⁰Kay mulda vi Lawna may hay yoboynɗi, may hay donota.

²¹Nigi minim mige? Nan ma coys katgiya hiɗi tilekŋa lebo hiɗi minda hay ŋusta ta lumaɗta su?