Read Masana 1 KORINTENA 5 Bible Online

1 KORINTENA 5 - Masana bible

1 KORINTENA 5

¹Numa'a ka hum kay zlata-bulota tara'a ta ka li jargiya, kayni ir zlata-bulota ta jar sa waan kaw sa fa'ɗi. Kayn ala sa kep jargiya vi cata vi bulumu.

²Nigi sli yigiyawa kulo'o, may ŋaat kayni nigi ma yora, kay sa ma li slen kayni ma gumis goy jargi pa.

³Kan nanu, nan may jargi zawɗi, may hay ŋusta nan ka jargi zaw, sa ma li lawt ki kay nalana, nan ka kitatawa kalamu ki nan ka jargi zaw nala.

⁴Hay semda vi Bum-Sumuna vaya Yesu Kristu, nigiya hiɗi nanu fi dak tuwaya hay donota vi Bum-Sumuna vaya Yesu,

⁵a vul san kayni goy mi Satan kay sliw tuwam ma ɓulak goyo, may ŋusta valamu fi suɗ goyo hay buur (ma kitata) vi Bum-Sumuna vaya Yesu.

⁶Subur-tuwta vigi kuɗ kayni may ŋaaɗi. A kuf ma kiɗay ɦawa fok futuwn kulo kufa kafe nigi may wi kaynɗi su?

⁷Kay na'ta cukgi kuf ma busayn goyo, kay nigi ma muɗ wuliya, ki futuw ma kuf hayɗin nala. Kay goor ɦu-dimi paskana vaya ŋatawa, kayni mi Kristu.

⁸Kay na'ta lay yuldeta hiɗi kuf ma busaynɗi, hiɗi kufna vi jootɗi, vi jiw-zlatɗi kaw, may hiɗi fun-bay-kufna ma peldetna, ma gasina.

⁹nan ɗo'awa tigiya hay ɗerwelda vanu a nigi ma tap hiɗi sa zlata-bulonɗi.

¹⁰Nan di tigi kayn may kay sa zlata-bulona sa waana sa kay nagat taniɗi, kay sa niŋa slena vi nagatɗi, kay sa coŋcoloŋŋaɗi, kay vi kuɗ lawayn waanɗi kaw. La ki kayn nala nigi ɗawn ma lak hay nagat tan loɗi.

¹¹May sum sa nan ɗo tigi ala nigi tap hiɗi nisiɗin kayni, si sum sa nigi yisi ala «ɓosiyayna»,[7] may la nisi li zlata-bulo'o, la nisi niŋa slena vi nagata, la nisi viy kuɗ lawayn ma waana, la nisi di va ma joo'o kay sana, la nisi ɦoyay kuɗ dolayna, la nisi coŋcoloŋo; sum sa ki kayn nalana, nigi ma tap hiɗi nisiɗi, ti fun hiɗi nisiɗi kaw.

¹²Kay lawta vanu ka kay ka kitat kay sa goy jiyna arige? Nigi ka kitat kayni may kay sum sa jarginɗi su?

¹³May nisi sa goy jiyna Lawn ma ka kitat kisi mi namu. Nigiya, digiɗsi sum sa joona goy jargiya.