Read Masana 1 KORINTENA 6 Bible Online

1 KORINTENA 6 - Masana bible

1 KORINTENA 6

¹La sa jargiya, lawta ka jaram hiɗi sugolomu, nam tuɗ vok sa bay-ɗigera, may nam as kota' vok sa peldetnaɗi kay mige?

²Sa peldetna ma ka kitat kay nagata, nigi bay wi kayni su? La ka kitata vi nagat ɗawni si nigiya ni, nigi may nagay kay ka kitat kay law ma guray ma jarginɗi su?

³Nigi may wi ala ma ka kitat kay sunda-wuralawn ɗawn si naya ɗisu? La nala sle ma hay nagatna as suway suwtige?

⁴Hay li ma lawta ka jargiya kuɗ sle ma hay nagat tanna, sum sa kir tapna waa ɦawana nigi tunsi kay ka kitata.

⁵Nan di kayni kay muɗgi zulo'o. Ki kayn nala, jargi nigiya, sa kep ma yali ma kaagi kitat jargi may noŋɗi su?

⁶A san deɓ kay sugolomna vok sa bay-vina kayni litige?

⁷May nigiya, lawta vi kitat jargi kayni ɓulakgiyawa, a nigi ziy bay-ɗigerta kayni marya ɗisu? La nigi lak ŋali hay li ma nisi yaw slena vigi hiɗi ɗutta kayni marya ɗisu?

⁸May li bay-ɗigerta si nigiya, yaw slen kay segen si nigiya, may nisi si ɓosiyogina!

⁹Sa bay-ɗigera as yaw vocota hay mulda-Lawnɗi, nigi bay wi nala su? Ɗutgi tuwgi goyɗi: sa zlata-bulona, sa vi kuɗ lawayn waana, sa hin cata valamu gar tara'a,

¹⁰sa kus yoboy ma liwisna, sa bur hiɗi nuroysi jufayna, sa kulla, sa niŋa slena vi nagata, sa ɦoy kuɗ dolayna, sa di joo kay sumuna, sa coŋcoloŋŋa, nisi kaf fi yaw vocota hay mulda-Lawnɗi.

¹¹Nigi ay jew kaw ki kayn nala, segena jargiya kaw. May nigiya, nigi muzi goyo,[8] may nigiya, liy goy peldete, may nigiya, fi ɗigertawa hay semda vi Bum-Sumuna Yesu Kristu, hay Ŋusta vi Lawna vaya Lawna.

¹²Nan fi li slen pet telda may kanɗi, may slen may ŋaa'a petɗi, nan fi li slen pet telda may kanɗi, may nan as hin tuwan li gorvo kay vaɗi.

¹³Tina koti kay ruwatna, ruwatna koti kay tina kaw, may nam ma' pet Lawn ma vatam goyo. Tuwn koti kayn kaw may kay zlata-bulotɗi, may kay Bum-Sumuna, Bum-Sumuna mi mulla vi tuwna vaya kaw.

¹⁴Lawna ma day Bum-Sumuna kulona, nam ma dayay nay kulo'o hiɗi donota valamu kaw.

¹⁵Tuwgi kayni mi ɓetna vi tuw Kristu nigi bay wi nala su? Nan as yaw ɓetna vi tuw Kristu, muɗum goy ɓetna vi tuw cata viyuwta su? May noŋɗi.

¹⁶Lebo, sa ma tap tuwam hiɗi cata viyuwta tuwam muɗi kepe hiɗi na'a nigi bay wi nala tuwa su? Nisi ma' sliw tuwsi ma muɗ kepe. Din mi namu.

¹⁷May sa ma tap hiɗi Bum-Sumuna ŋusta valam tapay kepe hiɗi namu.

¹⁸Pirgi kay zlata-bulota. Suluk hen marige kaw ma san li'e ka goy jiy tuwamu, may sa ma li zlata-bulota, nam li suluk kayn kat sliw-tuwamu.

¹⁹Lebo, tuwgiya kayni tempella vi Ŋusta-Peldetta ta ka haygiya, ta nigi fa'ay vi Lawn pa nigi bay wi nala su? Tuwgi kayn may figin kay tuwgiɗi, nigi bay wi nala su?

²⁰Kay nam gusgi hiɗi gusta ta tek ŋolo, kay na'ta subur Lawna hay tuwgiya.