Read Masana 1 KORINTENA 8 Bible Online

1 KORINTENA 8 - Masana bible

1 KORINTENA 8

¹May kay ɗifinna vi lawayn ma waana kayni, nay wi ala nay kaf ka hiɗi wida. Wida sli ya' kuloɗi, may ti-kamda in san kulo'o.

²La san var ala nam wi va'a, nam bay wi va hay liyam tuwa noŋo.

³La san min Lawna, namu Lawna wumu.

⁴May kay ti ɗifinna vi lawayn ma waan kayni, nay wi ala lawayn ma waana kay nagata may noŋɗi, ka kayni mi Lawn ma kepna.

⁵Kay la sle ma nisi yum ala lawayna ka kaw, la hay wuralawna lebo la hay nagata kaw -- kay lawayna hiɗi sum sa ŋulona ka ŋolo --

⁶May naya, nay wi ala Lawn ka kayn kep, mi Bumna ma kot slen petna, nam ma nay ka hay ɓalamna, Bum-Sumuna mi Yesu Kristu kepe kaw, nam ma slen pet lumi hiɗi namna, nay ka kayn kalam namu kaw.

⁷May sumun kaf may hiɗi wida na'taɗi. Kuɗ na'ta kayni segena ka jun tuwsi dok-dok tam lawayn ma waana, sliw namna nisi tum ki ɗifini nala, kuɗ kayni tap-wida visi ta maŋayta muɗi gese.

⁸Tina may muɗay ŋaa'a vok Lawnɗi, la nay tiɗi, nay fi ba va kay kaynɗi, la nay ti'e, nay fi va kuɗ kaynɗi kaw.

⁹May ŋomgi tuwgi ŋaa'a kay bay-telda vigi kayni ma muɗ mi va ma dab sem sa maŋaynɗi.

¹⁰Kay la san waŋ naŋ sa ma ka hiɗi wida musi dam hay ziyna vi lawayn ma waana kay ti ɗifinna valamu, tap-wida valam ta maŋayta zutum kay ti ɗifinna vi lawayn ma waanɗi su?

¹¹Ɓasuŋ ma vida valam maŋayna ma Yesu mit kalamna as ba goyo kuɗ wida vaŋu.

¹²May la nigi li suluk kat ɓosiyogina sa maŋayna ki kayn nala hay li ma nigi ɓulak tap-wida visiya, nigi li suluk kayn kat Kristu.

¹³Kay na'ta, la va ma tina dab sem ɓasunna, ta-ta hay vatɗita kaw nan as mut sliwnɗi. Kay nan fi li va ma dab sem ɓasunnaɗi.