Read Masana 2 KORINTENA 1 Bible Online

2 KORINTENA 1 - Masana bible

2 KORINTENA 1

¹Paulus, apostolla vi Yesu Kristu, kuɗ minda vi Lawna, hiɗi ɓasuyn Timotewus, tam tapna vi Lawna sa ka hay Korinte, tam sa tapna kaf kaw sa ka hay Akaya pet.

²Slugota tigiya, hiɗi toyta vi Lawna, Buya, hiɗi Bum-Sumuna vaya Yesu Kristu.

³Suburta tam Lawna Bum Bum-Sumuna vaya Yesu Kristu, Bum slugota hiɗi Lawn ma vul teŋ-irta mi sumun kafe,

⁴nam ma teŋma irma hay zumalda vuma kaf, kay numa kaw fi teŋ ir nisi sa ka hay zumalda tara'a tara'a kaf, hiɗi teŋ-irta ta Lawna teŋma irma hiɗi na'ta,

⁵kay ki numa'a ci lasta ŋolo hay Kristu nala kaw, numa ka fi teŋ-irta ŋolo hay Kristu.

⁶La numa ka ziy zumalda, kayni kay vulgi teŋ-irta, kay vulgi su'da kaw; la irma numa ka teŋiya, kayni kay vulgi teŋ-irta migi nigiya, kay nigi ma li nagaya kay ziy zumalda na'ta ta numa ka haya'ta kaw.

⁷Cubta-sle'ta vuma kigiya ka dono'o, kay numa wi ala, ki nigi tap hay lasta, nala nigi ma tap hay teŋ-irta kaw.

⁸Kay, ɓosiyonna, numa min ala nigi ma lak hay bay-widaɗi kay zumalda ta co kuma'a hay Asiya, na' nek ŋolo, suw donota vuma'a, ta-ta numa muɗ var ala numa ma lak iriɗi.

⁹Awa, numa var ala numa coowa vun mitta gasi, kay numa'a tun vida vuma'a kay tuwmaɗi, may kay Lawna, nam ma day sa mitin kulona.

¹⁰Nam ma butma'awa goyo, ka butma goyo kaw kay mitta ŋol na'ta, nam ma numa ka zamam ɓalamu kay nam ma butma goyo hay kayni kaw,

¹¹nigi kaw ma gut kuma'a hay siɗawta; nala sumun ŋolo ma fi slugota na'ta kuɗma numa'a, sumun ŋolo ma vul gi-deɓta (mi Lawna) kuɗma numa'a.

¹²Kay va ma numa subur tuwma kalamna kayni, mi di-goyta vi tap-wida vuma'a, kay hay li ma numa poy hay nagata vok irgi kayni, numa poy hiɗi peldetta, hiɗi gasita ta may vi Lawna pa, may hiɗi yalla vi sliwnaɗi, may hiɗi slugota vi Lawna.

¹³Kay numa ɗo va mara tigiɗi, may mi va ma nigi ka jaŋamu, ma nigi ka wumna kaw, nan var ala nigi ma wumu ta-ta hay dabaŋ-gu'ta.

¹⁴Ki nigi waawa wulin neeɗa kaw ala suburta vuma'a ka hay nigiya, nala suburta vigiya ka hay numa'a kaw hay buura vi Bum-Sumuna vaya Yesu.

¹⁵Kuɗ na'ta kayni, nan min tuɗis katgi jewe, kay nigi ma fi slugota sem kep lo:

¹⁶Goy vigi pa nan min cap Makedoniya, bugolda goy Makedoniya pa nan ma hotay goy vigiya, kay nigi ma gan diran hay Yuda.

¹⁷Hay li ma nan var kay li kayni; nan vara' kayn ti varta hefteŋga su? Lebo sle ma nan colomna nan colom kayni hay varta vi sliwna, kay awa hiɗi a'a ma li hayan (ma' pete) su?

¹⁸May ki Lawna ka gasiya nala, yoboy ma nan dum tigina awa hiɗi a'a (ma' pete) may hayamɗi.

¹⁹Kay Yesu Kristu Goora vi Lawna, nam ma nanu hiɗi Silvanus hiɗi Timotewus kusum tigina, nam may awa hiɗi a'aɗi, namu mi awa.

²⁰Kay dita-ŋaɓayta vi Lawna ka ŋolo, na'a mi awa hay namu; na'a mi Amen hay namu kaw, kay vul gajijita tam Lawna.

²¹May nam ma junma dono'o hiɗi nigiya, ɦok mul kaya kaw, kayni mi Lawna.

²²Nam ma tun soona valamawa kaya, ma vulay deŋga vi Ŋusta valamawa hay dikaya.

²³May nan min yi sem Lawna kan ala: Nan min tuɗis katgiɗi kayni kay hingi bay lawta.[1]

²⁴May kay numa li gaŋeraŋ kay vida vigiyaɗi, may numa min tap firi hiɗi nigiya, kay mige nigi lakay dono'o hay vida.