Read Masana 2 KORINTENA 10 Bible Online

2 KORINTENA 10 - Masana bible

2 KORINTENA 10

¹Wulini nan Paulus, nan siɗawgiya hiɗi zigin-zlata hiɗi ŋaata ŋolda vi Kristu -- nan mi sa ma yan hoti gaa kuɗgiya, hay li ma nan ka goy gine hiɗi nigiya, nan muɗi ɗeŋ ŋolo katgiya --

²Nan siɗawgiya, kay hay li ma nan ma coys jargiya, gatta ta ɗeŋga ta nan var ala nan min li dono hiɗi na'a tam segena sa poy kirma ki hay sliwna nala, nan min hina' goyo.

³La numa poy hay sliwna kaw, numa dur kuɗ minda vi sliwnɗi.

⁴Kay sle-ma-duura ma numa dur hiɗi namna, may mi slena vi sliwnɗi, may nam mi donota vok Lawna, kay ɦo gulmunna gaa'a.

⁵Numa ɦo gaa'a subur-tuwta ta wul tuwa' kulo suw wida vi Lawna, varta kaf numa juna' gaa kuɗ humda kuɗ Kristu.

⁶Tuwma kotay kot' kay gat ŋel-vunda kuɗ jafa' kaf, hay li ma humda vigi nigiya asawa.

⁷Nigi ka ɗuw slen ma vokgi ɦawa. La san vi goy gasi ala nam ka hay Kristu, nam ma var kay slen kayni: La nam ka hay Kristu, numa kaw ka hay Kristu.

⁸Kay la nan subur tuwanu kay donota vuma'a, (ta Bum-Sumuna vulmatawa kay ingi kulo'o, kay ɦogi gaaɗi), nan ma muɗ zuloɗi.

⁹Nan may min muɗgi nari hiɗi ɗerwelda vanɗi.

¹⁰Kay nisi di ala: Ɗerwelda valamu law ɗeŋ ŋolo, dono ŋolo kaw, may nam kay tuwam hayɗin maŋaya, dita valam kaw bisi.

¹¹Sa ma di nalana hinim var ala: Sle ma numa ɗom hay ɗerwelda vuma'a hay li ma numa may jargiɗina, hiɗi sle ma numa lumu hay li ma numa ka jargiya nam ŋray ca.

¹²Kay numa min ŋra tuwma hiɗi sum sa sli yisi kulonɗi. May hay li ma nisi ŋra tuwsi hiɗi tuwsiya, ŋaɓ tuwsi hiɗi tuwsi kaw, hay na'ta yalla visi mayɗi.

¹³May numa'a, numa min subur tuwma'a goy bugol ŋaɓtaɗi, va ma numa min colom kay li ŋaɓta hiɗi nam kayni mi galla ma Lawna ɓurawam tumana, hay li ma numa co ta-ta katgiya.

¹⁴Numa jik goy kay va ma ŋaɓay kumana ki numa bay co ta-ta katgiya naɗi, kay numa coy ta-ta katgiya hiɗi labar ma firina vi Kristu.

¹⁵Numa may subur tuwma kay jik ta-ta goy bugol ŋaɓta kuɗ lopna vi sa maraɗi, may numa cub hiɗi sle'ta, kay vida vigiya ma wul kulo'o, kay numa as li lop ma ŋulo suwa jargiya, hay li ma numa lak dok-doko hay ŋaɓta ta Lawna ŋra' kuma'a,

¹⁶hay li ma numa kus yoboyna hay nagat ta goy gine hiɗi nigiya, numa as subur tuwma kay liy ma segen ka li lop hayamnaɗi.

¹⁷May sa ma subur tuwamu, nam ma subur tuwamu hay Bum-Sumuna.

¹⁸Sa ma nagay kay wakka kayni may mi sa ma ɗek tuwam kirgi kay tuwamɗi, may mi nam ma Bum-Sumun ɗekem kirgina.