Read Masana 2 KORINTENA 13 Bible Online

2 KORINTENA 13 - Masana bible

2 KORINTENA 13

¹Kayni mi sem ma ɦidina ma nan co katgiya. Slen kaf as kota kuɗ yoboyna vi sa di-goyna ma' lebo ɦidi.

²Hay li ma nan ay jargiya sem ma ma'na, dit kayni nan da' tigiya: May wulini nan may jargiɗi, dit kayni nan min da' goy jewe tam nisi sa li suluk jewe, tam segena kaw ala: Hay li ma nan hotisawa katgiya, nan as hin sa goy kuɗgiɗi.

³Kay nigi gar a fi va ma ɗek ala Kristu ka law hiɗi nanu, namu ma may maŋay jargiɗi, may ka dono'o jargiya.

⁴Kay la nam ɓalay kat gu-ma-grakŋa hay maŋayta, wulini nam ka iriya hay donota vi Lawna; numa'a kaw, numa maŋay hay namu, may numa ma lak iri hiɗi namu, hay donota vi Lawna ta ka jargiya.

⁵Hay na'ta wakgi tuwgiya kay tuwgiya, kay ɗuwa la nigi ka hay vida; sargi tuwgi goy ŋaa'a tige. Nigi may wi ala Kristu ka haygiya ɗisu? Kla nigi ma lin si sum sa hiɗi vidaɗi klasige.

⁶May nan ka cub hiɗi sle'ta kay nigi ma wi ala sum sa ŋray kay wakkaɗi kayn mayn si numaɗi.

⁷May numa siɗaw Lawna a nigi ma li va ma joo'o noŋɗi; may kay sumuna ma di ŋaa'a kumaɗi, may kay nigi ma li va ma ŋaana, la sumun di joo kuma kaw.

⁸Kay donota vuma'a kay li va kat gasita mayɗi; ka kuma kayni ti gasita tuta.

⁹May numa li firiya hay li ma numa maŋaya, may nigi dono'o, kayni numa siɗaw kigi kaw, kay nigi ma muɗ pasiyaki.

¹⁰Kuɗ na'ta nan ɗo slen ki kayn nala hay li ma nan may jargiɗi, kay hay li ma nan ka jargiya, nan as law ɗeŋɗi, kuɗ donota ta Bum-Sumuna vulanawa kay wulgi kulo'o, may kay hotgi gaaɗi.

¹¹Bugol kayni, ɓosiyonna, lakgi hay firita, muɗgi pasiyaki, teŋgi ir tuwgiya, tapgi kepe, lakgi hiɗi toyta jar-tuwgiya, nala Lawna vi ti-kamda hiɗi toyta ma mus hiɗi nigiya.

¹²Gi deɓ mi tuwgiya hiɗi ŋaf-vunda ta peldetta. Sa peldetna kaf gigi deɓe.

¹³Slugota vi Bum-Sumuna Yesu Kristu, hiɗi ti-kamda vi Lawna hiɗi tapta vi Ŋusta-Peldetta mus hiɗi nigi kafge.