Read Masana 2 KORINTENA 2 Bible Online

2 KORINTENA 2 - Masana bible

2 KORINTENA 2

¹May nan var kay tuwan ɗeŋe, a nan min hotis jargi hiɗi yorta loɗi.

²Kay la nan muɗgi dikgi yora, hay na'ta sa ma muɗan dikan firi ɗawn mi gige? May mi nam ma nan muɗum yora ɗisu?

³Slen kayni nan ɗom tigiya kay mige su, hay li ma nan coysawa jargiya, nan ma vul yorta mi nisi sa as vulan firitaɗi, vida van ka tuni kigi kafe, kay firita vanu ti firita vigi nigi kafe kaw.

⁴Nan ɗo tigi tan kayni hiɗi yorta ŋolo, hiɗi dikan ɓulakiya, hiɗi zimiyna ŋolo kaw, may kay vulgi yortaɗi, may kay nigi ma wi minda van ta ŋolda kigiya.

⁵May la san mar yorta, nam mar yorta kayni may kay nanɗi. may kigi nigi kafe, la mi galla vigiya kla, kay nan min tun nekka kigi kafɗi.

⁶Kitata ta sumun ŋolo jargiya ka' kay san kayni asawa,

⁷hini kayn ala nigi as vul gida, teŋem iramu kaw; kay a nam ma kal hay yorta ŋolda ta tom sutiyamtaɗi.

⁸Kay na'ta nan siɗawgiya kay nigi ma wum hawamu.

⁹nan ɗo tigi tan kayni kay wakgiya, kay nan min wi ala nigi hum kuɗan hay slen kaf lebo humɗi su?

¹⁰May sa ma nigi vulum gida, nan vulum gida kaw; may nan hayɗini, nan vulum gidawa -- la nan vul gid kay va'a -- kayni kuɗgi nigiya vok ir Kristu,

¹¹kay hin Matna kol kayɗi, kay nay wi vaara valamu.

¹²Hay li ma nan co hay Trowas kay kus labara ma firina vi Kristu, Bum-Sumun mal vun-ziyn goy kan hay ɗawni may, ŋusta vanu may fi tun-sukkaɗi, kay ɓasunna Titus nan may fum ɗawnɗi;

¹³nala nan hinsiya, kali hay Makedoniya.

¹⁴Suburta tam Lawna, ma vulay koldawa dok-dok hay Kristu, ma vul hisna vi vida valamawa goy haraŋi hiɗi numa'a hay liyn arige arige pet,

¹⁵kay numa'a ki urdi ma his fayna vi Lawna hay Kristu nala, jar nisi sa suɗi goyo hiɗi nisi sa ba goyo kaw:

¹⁶Tam segena, hisna vi mitta, ma nar tam mitta, tam segena lo, hisna vi irita ma nar tam irita. Sa ma as kay slen kayni mi gige?

¹⁷Kay numa'a may ki sum segen ŋolo sa tap sinda hay yoboyna vi Lawna naɗi, numa da'n ti gasita, da'n ti dita vi Lawna, da' vok Lawna, hay Kristu kaw.