Read Masana 2 KORINTENA 3 Bible Online

2 KORINTENA 3 - Masana bible

2 KORINTENA 3

¹Numa hot ɗek goy kay tuwma kay tuwma su? Lebo ki sara'a nala, numa min ɗerwelda ta ɗek goy kuma'ta katgiya lebo hay ɓigi pa su?

²Nigiya ti ɗerwelda vuma'a ta ɗoy hay dikma'a, sumuna kaf wi kayni, nisi jaŋ kaynawa kaw.

³Sumun kaf wi goy haraŋ ala nigiya ti ɗerwelda vi Kristu, ta ɗoya kuɗ lop ma sunda vuma'a, ɗoy hiɗi aŋkrenaɗi, may hiɗi Ŋusta vi Lawna ma irina, ɗoy hay tablena beɗaynɗi, may hay tablena vi dikgiya.

⁴Kayni mi va ma numa vi kuɗ Lawna kalamu hay Kristu.

⁵Numa kay tuwma as var var ma yali kay tuwma ɗeŋɗi, may asta vuma'a may vi Lawn pa.

⁶Nam ma muɗmaawa asaya kay li sunda vi bonota wulita, may kuɗ ɗotaɗi, may vi Ŋusta pa, kay ɗota ci mati, may Ŋusta vul irita.

⁷Kay la nam ma li lopna vi mitta[2] ma ay ɓiriy hiɗi ɗota kat hiɗiyna vuli jaraya hiɗi gajijita, ta-ta gurona vi Israyel as cuk irsi kay vok ir Musus noŋɗi, kuɗ wileta vi vokomu, wileta vi vokomu ta as kay vat goyo,

⁸nala nam ma li lopna vi Ŋusta[3] hiɗi gajijita kuɗum ŋolo suw kayni sem gaage?

⁹Kay la nam ma li lopna vi kitata fi gajijit ŋolo, nam ma li lopna vi ɗigerta fi gajijita suw kayni.

¹⁰Kay gajijit na'ta kayni ti gajijit ta ɦawa'a, la ŋra' hiɗi gajijit ta ŋolda ta gasita.

¹¹Kay la va ma vat goyna ay hiɗi gajijit kuɗumu, va ma vat goyɗina ma fi gajijit ŋol suwa.

¹²Kay na'ta la cubta-sle'ta vuma' ka nala, numa tuɗ vokma'a hiɗi butta-goyta ŋolo.

¹³Numa'a may li ki Musus naɗi, nam bar (sligar) kiramu, kay gurona vi Israyel ma cuk irsi kay va ma min vat goynɗi.

¹⁴May nisi muɗi ɗeŋ ŋolo hay varta visiya. Kay ta-ta wulini, hay li ma nisi jaŋ Testamenta busayta, sligar ma bar ira ka lak'; nam bay yaw goyo, kay nam yaw goy kayni hay Kristu tuta.

¹⁵May ta-ta hay fatta vaydita, hay li ma nisi jaŋ ɗerwelda vi Musus, sligar ma baara ka vok irsi dok-dok.

¹⁶May hay li ma nisi muɗawa tam Bum-Sumuna, sligar ma baara ma yaw goyo.

¹⁷Bum-Sumuna namu mi Ŋusta, hay li ma Ŋusta vi Bum-Sumuna ka hayna, butta-goyta ka haya kaw.

¹⁸Ki kayn nala, nay kaf, iray may baray hiɗi sligarɗi, may gajijita vi Bum-Sumuna ka ɗuw hay tuwaya ki daraŋgal nala, nay muɗi slum nam nala, gajijita vay ka tuɗ voka'a voka'a, kayni mi lop ma Ŋusta vi Bum-Sumun lumna.