Read Masana 2 KORINTENA 4 Bible Online

2 KORINTENA 4 - Masana bible

2 KORINTENA 4

¹Kay na'ta, numa fi lop namna kayni kuɗ slugota ta vuli tuma'a, kuɗ kayni numa may makɗi.

²May numa hin hagata ta ɗutta kaf goyo, numa may poy hay nelemdaɗi, tap sinda hay yoboyna vi Lawnɗi kaw. May hay li ma numa ɗek gasita goyo, numa ɗek tuwma goy kir tap-wida vi san gigekaw vok Lawna.

³La labara ma firina vuma' ŋayaya, nam ŋayay kayni kir nisi sa ba-goyna;

⁴Kay sa bay-vina, sa lawayna vi nagat tani duk varta visiyawa goyo, kay wileta vi labara ma firina vi Yesu Kristu ma gajijit kuɗumna, ma sli tuw Lawn nalana, as li haraŋ kisiɗi.

⁵Numa may kus yoboyna kuma numa kay tuwmaɗi; numa kus yoboyna kayni kay Kristu Yesu, Bum-Sumuna, numa yi tuwma ala sa sunda vigiya kayn kuɗ sem Yesu.

⁶Kay Lawna ma di ala: Haraŋa ma wile goy hay jufunda pa, haraŋ namna wilewa hay dikma'a, kay ɗek goy kay wida vi gajijita vi Lawna vok Kristu.

⁷May faray namna, numa ka ziyim kayni hay doway nagana, hay donota ta suw kafta may goy vi Lawna pa, may vuma numa paɗi.

⁸Sutayma' toy kay lasta kuɗ jafa' kaf, may numa may ɦuruki gaaɗi, numa ka hay yorta, may giriŋga tayɗi.

⁹Sumun ka lasma'a, may numa noyay goyɗi; numa cuki gaa'a, may bay goyɗi.

¹⁰Dok-dok numa ka ziy mitta vi Yesu hay tuwma'a, kay irita vi Yesu ma ɗek tuwa' goyo hay tuwma'a.

¹¹Kay numa ka iri lak', may dok-dok numa vuli goyo vun mitta kuɗ Yesu, kay irita vi Yesu ma ɗek tuwa' goyo hay tuwma vuma'a ma mit goyna.

¹²Nala, mitta ka li lop hayma'a, irita ka li lop haygi nigiya may.

¹³Ki nay fi Ŋusta na'ta ta kepta vi vida nala, ki ɗot ɗo'ay nala ala: Nan vi'e, kay na'ta nan di'e.[4] Numa kaw vi'e, kay na'ta numa ka di'e.

¹⁴Kay numa wi ala nam ma day Bum-Sumuna Yesu kulona, ma dayma numa kulo hiɗi Yesu kaw, nigiya hiɗi numa'a, nam ma zlaray goy vok iramu.

¹⁵Kay slen kayni kaf co'o kuɗgi nigiya, kay slugota ma jok goy ŋolo suwa tam sumuna, kay vul lop ma slugona ŋolo tam gajijita vi Lawna.

¹⁶Kay na'ta numa fi makɗi, la san ma sliw-tuwna vuma'a vat goyo kaw, ma hayma' kalafna muɗ wuli lo wuli lo buurta kaf.

¹⁷Lasta ta hefteŋga ta mus ŋolɗita, ta numa ka wa' wulini ka kotma'a hay gajijita ta ŋolda ta vatɗita, ŋolo suw las na'ta.

¹⁸Kay numa ɗuw kayni may kay sle ma ir san ka wumnaɗi, may kay sle ma ir san wumɗina. Kay sle ma ir san ka wumna may mus ta-taɗi, may sle ma ir san may wumɗina mus ta-ta hay vatɗita.