Read Masana 2 KORINTENA 5 Bible Online

2 KORINTENA 5 - Masana bible

2 KORINTENA 5

¹Kay numa wi ala, la ziyna vuma' ma gaa hay nagat tanna, ma koti hiɗi guɗuk ɦawana ɦo gaa'a, ziyna vuma ma koti hiɗi ɓam Lawna ka hay wuralawna, namu mi ziyna ma vatɗina ma may koti hiɗi ɓam saɗi.[5]

²Hay na'ta numa ka ci lasi hay guɗuk ma gaa tanna, dikma ka tuma'a kay cuk ziyna vuma ma wuralawna katma'a.

³La nanigekaw, nam ma fuma hiɗi sligar-tuwna cukiya, may goy nalaɗi.

⁴Kay hay li ma numa ka hay guɗuk ma tanna, numa ka tiya, sutayma' toya, kay numa min fok tuwma goyɗi, may min cuk sligar tuma'a, kay irita ma lig tuwma ma mitna.

⁵May nam ma kotmaawa kay van kayni mi Lawna, nam ma vulma deŋga vi Ŋustawa.

⁶Dok-dok numa ka so tuwma'a, kay numa wi ala la numa ka dok-doko lakay hay tuw namna, numa ka goy gine hiɗi Bum-Sumuna.

⁷Kay numa'a poy hay vida, may hay widaɗi,

⁸kay numa ka hobay hiɗi kursulita kay hin tuwna goyo, a tuɗ lak vo vi Bum-Sumuna kayni kirma ŋaa suwa.

⁹May numa min li tuwma kirma jifiy suw pete, la numa lak hay tuwna tani, la numa hin tuw namna kaw.

¹⁰Kay nay kaf ma lak vok zlamda-kitata vi Kristu, kay gigekaw ma fi wurakŋa kuɗ va ma nam lum kat tuwamna, la ŋaa'a lebo joo'o.

¹¹Kay numa wi narta ta kuɗ Bum-Sumuna, kuɗ kayni numa gar ala sumun ma huma; Lawna wuma'a, nan var ala hay tap-wida vigiya nigi ma wuma'a kaw.

¹²Numa min ɗek tuwma vokgi sem mara loɗi, may numa vulgi liyna kay nigi ma subur tuwgi kuɗma'a, kay nigi ma hot dita tam nisi sa gar subur-tuwta kay sle ma goy jiyna, may kay sle ma hay dikga kalafnaɗi.

¹³Kay na'ta la ŋalda vuma' baya, kayni kay Lawna, may la ŋalda vuma' ka tuma'a, kayni kigi nigiya may.

¹⁴Kay minda vi Kristu kolawa kuma'a, numa sa poŋ ir slen kaynawa, sa ma kepna miti kay kafe, nala nay kaf mitawa kaw;

¹⁵nam miti kay kafe, kay nisi sa ka irina ma lak iri kay tuwsi loɗi, may kay nam ma dayay kulo kisiya.

¹⁶Kay na'ta wulini pa, numa as wi sa hay sliwna loɗi, la numa wi Kristu hay sliwna (jewe) kaw, numa (wulin) as wum nala loɗi.

¹⁷La sa ka hay Kristu, nam muɗi wuliya, sle ma busayna kaf vati goyo, ɗuwgiya, slen pet muɗi wuliya.

¹⁸Slen namna kayn kaf may goy vi Lawna, nam ma toyayawa hiɗi namu hay Kristu, vulay lopna vi tap-jaarawa kaw.

¹⁹Kay Lawna ka hay Kristu, nam toy jar sa nagatna hiɗi namu, ta-ta nam ŋa raw-goyta vi sumunɗi, nam vulay yoboyna vi tap-jaara hay dikaya kaw.

²⁰Nala numa muɗi si sa cuki sunna vi Kristu, ki Lawna kay tuwamu ka kus yoboyn hiɗi vunma nala. Numa siɗawgi hay baŋal Kristu ala, toygi jargi hiɗi Lawna.

²¹Nam ma bay wi sulukŋa, nam muɗum goy sulukŋa kaya, kay nay ma muɗ ɗigere vok Lawna hay namu.