Read Masana 2 KORINTENA 9 Bible Online

2 KORINTENA 9 - Masana bible

2 KORINTENA 9

¹May kay gutda kuɗ sa peldetna kayni, la nan ɗo tigi kay kaynɗi kaw, law mayɗi.

²Kay nan wi minda vigi ta ŋaata ta nan subur tuwan kigiya vok ir sa Makedoniya kuɗa' ala: Sum sa Akaya kot tuwsi ay jumda pa, ciwerta vigiya gi hum sumun ŋolo.

³May nan cuk ɓosiyaynis kayni, kay segi ma numa tiyim kuɗ lawt kayni ma muɗ goy waaɗi, kay nigi ma lak kotiya kaw, ki nan di nala.

⁴Kay sum sa Makedoniya sa tapis kuɗan ɗawni, hinsi figi bay tuwgi kotiɗi, kay la nisi figiyawa hiɗi tuwgi bay kota, kayni ma muɗ zulo kuma'a, zulo kigi kaw.

⁵Kay na'ta nan vara kay cuk ɓosiyaynis katgi vokan jewe, kay kot vulda ta nigi di kay vula'ta, kay na' ma li koti hiɗi bolda, may hiɗi vulda ta ir ma ɗeŋŋaɗi.

⁶Nan digiya: sa ma cuk kiɗaya, nam ma feɗ kiɗaya kaw, sa ma cuk ŋolo, nam ma feɗ ŋolo kaw.

⁷Gigekaw ma vul kuɗ va ma nam varam hay dikamna, hiɗi yortaɗi, ki hiɗi dono'o naɗi kaw, kay Lawna min sa ma vul hiɗi firita.

⁸Lawna ka hiɗi donota kay hobgi hiɗi slugota kuɗ jafa' kafe, kay dok-dok nigi as fi slen kay asgiya, nala nigi ma as kay lop ma ŋaana pet.

⁹Ki ɗo'ay nala: Nam biya slenawa goyo, nam vul slenawa mi sa sa hawna; Ŋaata valamu ka dok-doko.[11]

¹⁰Namu mi ma: Vul jafna mi sa cuk jafna, Vul funa kay ti'e kaw.[12] Nam ma vulgi jafna kaf ma nigi minimu, nam ma wulum kulo'o kaw, kay vulda vigiya ma vuɗ vuɗna ŋolo.

¹¹Nigi ma li faraya hay slen kaf, kuɗ vulda ta kuɗ jafa' kafta, vulda ta numa as hot gi-deɓta ka'a tam Lawna.

¹²Kay lopna vi vulda kayni, may kay gutda kuɗ sa peldetna ɦawaɗi, may nam vul lop ma slugona ŋolo tam Lawna.

¹³Hay li ma nisi wi ŋaata vi lop namnawa, nisi ma subur Lawna kuɗ hum-vunda vigiya, hay li ma nigi di goy kay labar ma firina vi Kristu, hiɗi vulda-minda vi tap-ɓamta vigiya tisi nisiya, tam sumun kaf kaw.

¹⁴Hay li ma nisi siɗaw kigiya, haysi tiy kay ɗuwgiya kay slugota ŋolda vi Lawna ta haygita.

¹⁵Gi-deɓta tam Lawna kay slugota valam ta ŋolda, ta san as da' cawa' goyɗita.