Read Masana GALATENA 2 Bible Online

GALATENA 2 - Masana bible

GALATENA 2

¹Busat li doogo yam fiɗi bugol kayni nan tuɗ kulo hay Yerusalem lo hiɗi Barnabas, nan vi Titus kuɗan kaw.

²May nan kal kulo Yerusalem kayn kuɗ ɗekka ta vul tuwa' kiranu. Nan ɗeksi goyo kay labar ma firina ma nan ka kusum jar sa bay-vina; nan ɗekem goy ŋayaya kir sa ŋulona vi sa hatayna, kay nan min ala yoboyna van ma nan kusumna ma ba goy jar simeɗna ɦawaɗi.

³Titus niran ma kuɗanna, nam may mi Yudiyaɗi, may mi Grekŋa, nisi may lum hiɗi dono'o a nam ma ka gosayɗi kaw.

⁴May, kuɗ ɓosiyay sa bay-gasina sa kal tuwsi kulo jarma' hiɗi yali kay ɓulak butta-goyta vaya ta fa' hay Yesu Kristuta, kay muɗay goy gorvo'o,

⁵numa may hot bugolma kuɗsi nisi noŋ ne'ɗi, kay gasita vi labara ma firina ma col dono'o jargiya.

⁶may nisi sa ŋaɓay ki sa ŋulona nala, Ŋolda visi ay ir mige kla kayni lawta vanɗi, kay Lawn may ka ir saɗi. Nisi sa ŋulona may dan law maraɗi.

⁷May hay li ma nisi wi ala kusta vi labara ma firina tam sa bay ka-gosayna kayni vuli manu, ki Peter tam sa kaay-gosayna nala,

⁸(kay nam vul donotawa mi Peter kay li lop Apostolayna jar sa kaay-gosayna, nam vulan donotawa man nanu kaw kay li lop jar sa bay ka-gosayna).

⁹Hay li ma Yakub hiɗi Kefas hiɗi Yohana sa ŋaɓay ki dolla (vi tapna) nala wi slugota ta vulanti manu, nisi vul ɓisi ta jufta man nanu hiɗi Barnabas kay ɗek tapta-kepta vuma'a: Kay numa ma tuɗ tam sa waana, nisiya tam sa kaay gosayna may.

¹⁰May nisi duma'a kay yuma ma jok sa hawnaɗi, van kayni nan li tuwan ciwere kay lum kaw.

¹¹May hay li ma Kefas ma hay Antiokiya, nan lawam goy vok sumun haraŋi, kay nam may li ŋaaɗi.

¹²Kay hay li ma sum sa Yakub cuksiyayna bay co hay Antiokiya tuwana, Kefas ka ti fun hiɗi sa waana,[1] may hay li ma nisi coowa, nam hot goy bugolomu, min tap hiɗi nisi loɗi, kay nam li nari kay sa kaay-gosayna.

¹³Yudiya segena li tuwsi mile ki nam nala kaw, ta-ta Barnabas kaw zliŋi goyo kuɗ mileta visiya.

¹⁴May hay li ma nan wi ala nisi may tuɗ kuɗ gasita vi labara ma firina ɗigerɗi, nan law Kefas kiram vok irsi kaf ala: la naŋ sa ma Yudiyan poy ki sa ma waan nala, may ki sa ma Yudiyan naɗi, naŋ fi gat sa waana ala nanigekaw nisi ma poy ki sa Yudiyan nala kayn litige?

¹⁵Numa'a si sa Yudiyan sa vuɗina, numa may sa sulukŋa hay jaf sa waanɗi.

¹⁶May numa wi ala san as kay fi ɗigerta kuɗ lopna vi vun-ma-gatnaɗi, may kuɗ vida hay Yesu Kristu. Nala numa vi'e hay Kristu Yesu, kay numa'a fi muɗ goy ɗigere kuɗ vida hay namu. Kayni may kuɗ lopna vi vun-ma-gatnaɗi, kay la kuɗ lopna vi vun-ma-gatna, gigekaw as muɗ ɗiger noŋɗi.

¹⁷Kay hay liyn ma nay gar a muɗ goy ɗigere hay Kristu, may la nay lak hay sulukŋa lo, Kristu hay na'ta muɗi mi sa ma sunda vi sulukŋa su? May noŋɗi.

¹⁸Kay la va ma nan ɦom gaana nan hot inim kulo'o lo, nala nan muɗi sa ma raw vun-ma-gatna goyna.

¹⁹Kay kuɗ vun-ma-gatna, nan miti tam vun-ma-gatna, kay nan ma mus iriya hay Lawna.

²⁰Nan ɓalawa kat gu-ma-grakŋa hiɗi Kristu, wulini nan may iri kay tuwan loɗi, may Kristu ka iriya hay nanu; irita van ta wulini hay sliwna, nan ŋoma' hay vida mi goora vi Lawna, nam ma minanawa, vul tuwamawa goy kanu kaw.

²¹Nan may noy slugota vi Lawna goyɗi, la san muɗ ɗiger vok Lawn kayn kuɗ hagata vi vun-ma-gatna ni, Kristu hay na'ta miti sur waa'a.