Read Masana GALATENA 3 Bible Online

GALATENA 3 - Masana bible

GALATENA 3

¹Nigi Galatena sa ɦay-ɦayna, ɓulakgi yigi kayn mi mige? Nigi sa ɓalda vi Yesu kat gu-ma-grakŋa ɗekay goy kirgi haraŋi?

²Nan min jobgi tige, nigi fi Ŋusta kayni kuɗ lopna vi vun-ma-gatna lebo kuɗ lopna vi vida su?

³Nigi ɦay-ɦay nala su? Nigi tun caw hay Ŋusta, may wulini nigi min vat goy hay sliwna su?

⁴Slen ŋolo nala li tigi kayn goy sur waa'a su? La kayni gasi nala, nam sur waa'a. -- Nam ma vulgi Ŋustawa,

⁵ma ka li ɗekka jargiya kaw, nam lum kayni kay nigi ka li kuɗ vun-ma-gatna lebo kay nigi ka li lop hiɗi vida su?

⁶Kay: Abraham vi kuɗ Lawna, kayni ŋaɓay kalamu ki ɗigere nala.

⁷Kay na'ta nigi ma wi ala, nisi sa ka hiɗi vida nisi si gurona vi Abraham.

⁸Hay na'ta ɗota wi voka' ala Lawna min muɗ sa waana ɗigere kuɗ vida, na'a kus labara ma firina goy jewe tam Abraham ala: Hay naŋu jaf-sumun kaf ma fi bolo.[2]

⁹Nala nisi sa ka hiɗi vida kaf ma fi bolda hiɗi Abraham sa ma viyna.

¹⁰Kay nisi kaf sa ka gaa kuɗ lopna vi vun-ma-gatna nisi ka gaa kuɗ be'da. Kay ɗot di ala: slen ma ɗoy hay ɗerwelda vi vun-ma-gatna, la san gigekaw may ŋomomu kay li kuɗum kafɗi, sa namna beɗay goyo.[3]

¹¹Sa fi muɗ goy ɗigere vok Lawna kuɗ vun-ma-gatna noŋɗi, kayni goy haraŋi. May sa ma ɗigera ma mus iriya kuɗ vida.[4]

¹²May vun-ma-gatna tap hiɗi vidaɗi, may ɗota di'e: sa ma li slen kaynawa nam ma mus iri kuɗumu.

¹³Kristu butay goy kay be'da vi vun-ma-gatna hay li ma nam muɗi goy be'da kaya, kay ɗot ɗo'ay nala: gigekaw ma gaɓay kulo kay guna, nam beɗay goyo.[5]

¹⁴Kay bolda vi Abraham fi ma kay sa waana kuɗ Kristu Yesu, kay kuɗ vida nay ma fi ŋusta ta ay ŋaɓay taya.

¹⁵Ɓosiyonna, nan di kuɗ data vi sumuna: hay li ma sumun jun bonotawa junna, bugolda sa as muɗa' goy waaɗi, lebo cuk va mara ta'ɗi kaw.

¹⁶May dita-ŋaɓayta deŋay tam Abraham hiɗi jafna valamu. Dita may di ala: tam jafna vaŋ dak-daki ki nisi ka ŋol dak-daki naɗi, may ki kepe nala: Tam jafna vaŋu, kayn di ala mi Kristu.

¹⁷Nan min di kayn ala: bonota ta Lawn juna' dono'o, vun-ma-gatna ma co hay busat kis-fiɗi bugolda as kusa'ɗi, kay la nala dita-ŋaɓayta ma muɗ goy waa'a.

¹⁸Kay la vocota vuli kuɗ vun-ma-gatna, nala sa as fa' kuɗ dita-ŋaɓayta loɗi, may Lawna vula' mi Abraham kuɗ dita-ŋaɓayta.

¹⁹La nala vun-ma-gatna ka kayn kay mige? Vun-ma-gatna ay vuliya kay lawta vi raw-goyta, ta-ta jafna ma dita-ŋaɓayta vuli talamna co tuwa. Vul vun-ma-gatna goyo si sunda-wuralawna, may sa ma coli jar sunda-wuralawna hiɗi sumuna ka zaw.

²⁰Sa ma coli jara may kay sa kepɗi, may Lawna ka kay kafe.

²¹Vun-ma-gatna vuli kayni, nam gaw hiɗi dita-ŋaɓayta vi Lawna su? Mayɗi. Kay la vun-ma-gatna ma vuli taya as kay vul irita, nala ɗigerta may ɗawni goy kuɗ vun-ma-gatna pa.

²²May ɗota duk vun slen kaf gaa kuɗ sulukŋa, kay dita-ŋaɓayta ma vulis kuɗ vida hay Yesu Kristu tam nisi sa vi'e.

²³May jew mata vi vida, nay ay duki gaa kuɗ ŋomda vi gatta, kay cub vida ta min ɗek goy kiraya.

²⁴Nala vun-ma-gatna muɗi mi sa ma tun vokaya kay naray tam Kristu, kay nay ma muɗ ɗigere kuɗ vida.

²⁵Wulini vida coowa ni, nay may gaa kuɗ sa ma tun vokayna loɗi.

²⁶Kay nigi kaf si gurona vi Lawna hay vida kuɗ Kristu Yesu.

²⁷Kay nigi kaf sa fi baptisma tam Kristu, nigi cuk Kristu kigiyawa.

²⁸Sa ma Yudiya may loɗi, sa ma Grek may loɗi, sa ma gorvo mayɗi, sa ma vuɗi mayɗi kaw, sa juf mayɗi, ca tayɗi kaw. Kay nigi kaf ka kepe hay Kristu Yesu.

²⁹Kay la nigi ka hay Kristu, nala nigi si jafna vi Abraham, sa yaw vocota kuɗ dita-ŋaɓayta.