Read Masana EFESENA 1 Bible Online

EFESENA 1 - Masana bible

EFESENA 1

¹Paulus, apostolla vi Kristu Yesu, kuɗ minda vi Lawna, tam sa peldetna sa hay Efesus sa vi hay Kristu Yesu:

²Lawna buya hiɗi Bum-Sumuna vaya vulgi slugota hiɗi sle'ta tage.

³Suburta tam Lawna hiɗi bum Bum-sumuna vaya Yesu Kristu, ma gay bolawa hiɗi bolda kaf ta hay Ŋusta hay liyna ma kulona hay Kristu.

⁴Ki Lawna vilekay goyo hay namu, jew caw nagata bay tun tuwa, kayni kay nay ma lak peldete, bay joota kaw vok-iramu. Hay minda valamu,

⁵nam ŋaɓay goy jewe hay Yesu Kristu kay nam fi muɗay goy gurona valamu, hay Yesu Kristu kuɗ varta ŋaata valamu,

⁶tam suburta ta gajijita vi slugota valamu ta nam vulaya hay nam ma hayam kamna.

⁷Hay namu, nay fi butta-goytawa hay busuwna valamu, vulda-gida kay sulukŋa hay asta-ŋolda vi slugota valamu,

⁸ta nam vula' goy ŋol suw asa hay yalda hiɗi yamda-wida pet.

⁹Hay li ma nam ɗek ŋayayta vi minda valamu, kuɗ varta ŋaata valamu ta nam vilek hayam kay tuwamu,

¹⁰kay tok yam slen kaf hay Kristu, slen kaf ma ka hay dukalawna hiɗi ma gaa kay nagatna kaw, kay tuɗum tam dabta valamu hay li ma liyna valam asawa.

¹¹Hay namu nay vilekay goyo kay lak goy ir valamu, ŋaɓay goy jewe kuɗ minda vi nam ma li slen kaf kuɗ minda valamu,

¹²kay nay ma muɗ goy mi suburta tam gajijita valamu, nay sa ka cub Kristu hiɗi sle'ta jewe.

¹³Hay namu kaw, hay li ma nigi hum yoboyna vi gasita humna, labara ma firina vi su'da vigiya, hay namu, hay li ma nigi vi'e, nigi hob hiɗi Ŋusta ta ay deŋiya, na'a ta muɗi ti vocota vaya.

¹⁴Na'a ta vulay deŋga kay vocota vaya, tam butta-goyta vi sumuna sa Lawna gussina kay subur gajijita valamu.

¹⁵Kay na'ta nan kaw, hay li nan hum kay vida vigiya hay Bum-sumuna Yesu, hiɗi minda vigi ta nigi la' tam sa peldetna kaf,

¹⁶gi-deɓta van ta kigita nan ra' goyɗi: Nan ka yigi segi dok-dok hay siɗawta van kaf;

¹⁷kay Lawna vi Bum-sumuna vay Yesu Kristu, bum gajijita ma vulgi Ŋusta ta yalla hiɗi ŋayayta ta nigi ma wum hiɗi na'ta.

¹⁸kay nam ma moɗ ira vi dikgi goy haraŋi, a nigi ma wi ala cubta-sle'ta ta nam yay ta'ta na' ir natage, a wi ŋolda vi gajijita vi vocota valam ta jar sa peldetna,

¹⁹a wi lo ir natage gaŋeraŋa valamu ma ŋolla li tay nay sa viyna kuɗ lopna vi donota valamu.

²⁰Ma nam muɗum li lopo hay Kristu hay li ma nam dayam kulo jar sa mitina pa, musum hay gal ɓam ma jufna valamu hay liyn ma kulona,

²¹musum kulo kay muliyan kaf, donota kaf, ŋolda kaf, gaŋeraŋa kaf, musum kulo kay semda ma yiyna kaf, may kay nagata ta tanta tutaɗi, kay nagata ta vokka kaw.

²²Nam cuk slen kaf gaa kuɗ selemu vulum yamda vi tapta,

²³kayni mi tuwamu, hobta vi nam ma hob kaf hay kafe.