Read Masana EFESENA 5 Bible Online

EFESENA 5 - Masana bible

EFESENA 5

¹Sligi kuɗ Lawna, ki gurona valam sa hayam kisina nala;

²poygi hay minda, ki Kristu minayawa nala, vul tuwam goy kaya tam Lawna, ki vulda hiɗi ɗifinna, ki urdina ma his ŋaana nala.

³May, zlata-bulota hiɗi liwista kaf, hiɗi haramda kaw, hin sem slen kayni yi kulo jargi noŋɗi, kay kayni may ŋaa'a kay sa peldetnaɗi.

⁴Yoboy ma to'ofayna, yoboy ma ɦay-ɦayna, yoboy ma waana kaw, nigi ma dum jargiɗi, kay kayni may ŋaaɗi. May nigi ma da' ti dita ta gi-deɓta.

⁵Kay nigi ma wi slen kayni goy haraŋi, sa ma li zlata bulo'o, sa ma liwisi lebo sa ma min slen ŋolo, kayn min di'e sa ma girif lawayn ma waana, as fi vocota hay mulda vi Kristu hiɗi Lawn noŋɗi.

⁶Hin sa ɗutgi hiɗi yoboyn ma waa ɦawaɗi, kay slen ma ki kayn nala mar ɦiyda vi Lawna kay gurona vi ŋel-gatta.

⁷Kay na'ta tapgi hiɗi nisi noŋɗi.

⁸Kay nigi jewe ay jufunda may wulini nigi muɗi mi haraŋa hay Bum-Sumuna, poygi ki gurona vi haraŋa nala kaw;

⁹Kay vuɗna vi haraŋa kayn ka hay ŋaata, ɗigerta hiɗi gasita.

¹⁰Wakgi slen ma ŋaana hay Bum-Sumuna;

¹¹tapgi hiɗi lop ma getayna vi jufundaɗi, may nigi ma patam cawam goyo.

¹²Kay slen ma nisi lum goy ŋayayna, nam zulo'o kay dum goyo,

¹³may hay li ma dumawa goyo, nam ma goy hay haraŋa, kay slen ma ma goy hay haraŋa pet nam mi haraŋa.

¹⁴Kay na'ta dit di'e: Zliyaŋ kulo'o, naŋ sa ma kali sene, Fokaŋ kulo'o jar sa mitina pa, Kristu ma li haraŋ kaŋu.[2]

¹⁵Nigi ma li ŋal hay poyta vigiya, nigi ma poy ki sum sa ɦoyayna nalaɗi, may nigi ma poy ki sa yalla nala;

¹⁶gusgi liyna, kay buura ka joo'o.

¹⁷Kay na'ta lakgi hay bay-wida kay yigiɗi, may wigi minda vi Lawna.

¹⁸Nigi ma hob haygi hiɗi dolaynɗi, kay nam kalgi hay viyuwta, may hobgi hiɗi Ŋusta-Peldetta;

¹⁹Lakgi jar-tuwgi hiɗi nul ma suburta, hiɗi nul ma gi deɓta, hiɗi nulla ma hay Ŋusta; ligi nulla, vulgi suburta mi Bum-Sumuna hiɗi dikgi kafe.

²⁰Gigideɓ dok-dok mi Lawna bumna kay slen kaf hay semda vi Bum-Sumuna vaya Yesu Kristu:

²¹Nigi ma hot yigi gaa kuɗ tuwgiya tuwgiya hay narta kuɗ Kristu.

²²Nigi boyna, humgi kuɗ jufaygiya, ki kuɗ Bum-Sumuna nala.

²³Kay jufna mi yamda vi cata, ki Kristu mi yamda vi tapna ma tuwna valamna nala, nam mi sa ma su'da valam kaw,

²⁴ki tapna hot yisi gaa kuɗ Kristu nala, boyna ma hot yisi gaa kuɗ jufaysiya hay slen kaf kaw, cat gige gigekaw hot ya' gaa kuɗ jufa'a jufa'a.

²⁵Nigi jufayna, gigekaw ma min cata valamu valamu, ki Kristu min tapna nala, vul tuwam goy kisiya kaw,

²⁶kay lisi goy peldete, hay li ma nam porsi hay muzta-niyna hiɗi yoboyna kaw,

²⁷kay nam fi col tapna sa ka hiɗi gajijita vok-iramu, bay va tun tisiya, bay hormosa, hiɗi va mara ma ki kayn nalaɗi kaw, may kay nisi ma lak peldet bay joota.

²⁸Nala kaw, jufayna ma min boyna visiya ki sliw-tuwsi nala, sa ma min cata valamu min tuwamu kaw.

²⁹Kay sa ma ka gaw tam tuwamu mayɗi, may nam ma vulum tina, kotom tuwamu kaw, ki Kristu li tam Ekklesiyata nala,

³⁰kay nay mi ɓetna vi tuwna valamu.

³¹Kay na'ta jufna ma hin bulumu hiɗi sulumu kay tap hiɗi cata valamu, nisi ma' ma muɗ mi sliw-tuw ma kepna.

³²Ŋayay na'ta kayni ŋolo; nan di kayni kay Kristu, kay Ekklesiyata may.

³³Hini kayn ala, gige gige jargiya ma min cata valamu valamu, cata ma hum kuɗ jufa'a kaw.