Read Masana FILIPINA 3 Bible Online

FILIPINA 3 - Masana bible

FILIPINA 3

¹Va ma hinin kayni, ɓosiyonna, firigi hay Bum-Sumuna.

²Ligi ŋali hiɗi durnayna, ligi ŋal hiɗi sa lopna sa joona, ligi ŋal hiɗi sa bay ka gosay gasina.

³Kay sa kaay gosay gasina si numa'a, sa girif Lawna hay Ŋusta vi Lawna, sa subur tuwma'a hay Kristu Yesu, numa sa dita vuma'a may tuni kay sliwnɗi.

⁴Nir na'ta kep slen ka kanu ma nan fi tun varta van hay sliwna. La sa mara vara'a, nam fi tun varta valam hay sliwna, nan fi li kayni suw asa:

⁵Nan ka gosay hay buurta glafandita, nan hay jafna vi Israyel, hay jafna vi Benyamin, Hebrena ma vuɗi goy hay hebren pa;

⁶la kuɗ gatta, nan mi Farisena*, la hay galla vi kursulita, nan mi sa ma las tapna, la hay ɗigerta kuɗ gatta, nan mi sa ma bay joo'o kaw.

⁷Va ma ay kanu ki fita nala, nan ɗuwum ki bata nala kay Kristu.

⁸Nan ɗuw slen kaf ki bata nala kay ŋolda vi wida vi Kristu Yesu, Bum-sumuna vanu. Kuɗum namu, nan va' tanu kay ba slen kaf, nan ɗuwum ki tugos-gesna nala kay nan min fi Kristu.

⁹A fan hayamu kaw, may hiɗi ɗigerta vanu ta may kuɗ gatta paɗi, may hiɗi ɗigerta ta sa fa' kuɗ vida hay Kristu, ɗigerta ta may vi Lawna pa, ta ini kulo kay vida kaw.

¹⁰Lawta van ma ŋolla kayn kay wum namu, kay wi donota vi dayta-kulota valamu, hiɗi tapta ta kepta vi lasta valamu kaw, hay li ma nan muɗ ŋray hiɗi namu hay mitta valamu, a co,

¹¹la asa, tam dayta-kulota jar sa mitina.

¹²May kayn ala nan fi wurakŋawa vatiya lebo nan coowa tam dabta vatiya naɗi; may nan ka jaŋ kuɗumu kay nan fi fumu, kay nan kaw, Kristu Yesu fanay fiya.

¹³Ɓosiyonna, nan var ala nan fi wurakŋawa tuwa deɗi; may nan li va kep kayni: Yan jok slen ma bugolanna, nan gar slen ma vokanna,

¹⁴nan jaŋ tam dabta kay fi wurakŋa vi yita ma may kulo pana vi Lawna hay Kristu Yesu.

¹⁵Kay na'ta nay sa pasiyakŋa, nay ma vara'a kay kayni, la varta vigi kay va mara'a ɓurawaya, Lawna ma ɗekgi caw van kayni goy ala nam ka nala.

¹⁶May va kep kayn ala, liyn ma nay coy hayn lakŋi, nay ma tuɗ vokay kuɗ tuway kep.

¹⁷Ɓosiyonna, sligi kuɗanu; cukgi irgi kay sa poy ki numa ɗekgi hay poyta vuma nala.

¹⁸Sum sara ŋolo sa poy hay gawta tam gu-ma-grakŋa vi Kristu; nan digi kisi jewe, wulin lo nan digi hiɗi zimiyna:

¹⁹Dabaŋgu'ta visiya ti ba-goyta; lawayna visiya kayni mi haysiya, nisi vul suburta mi va ma mar zulo kisiya; nisi varam mi slena vi nagata.

²⁰May naya, mulda vaya ka hay wuralawna, ɗawni nay ma cub Bum-Sumuna Yesu Kristu ki sa ma su'da vaya nala,

²¹ma min muɗ tuway ma hotay gaan kiɗayna ŋray ca ki tuwam ma gajijita nala, kuɗ donota ta nam as cuk slen kaf gaa kuɗ donota valamu.