Read Masana FILIPINA 4 Bible Online

FILIPINA 4 - Masana bible

FILIPINA 4

¹Kay na'ta ɓosiyon sa hayan kigina, sa gisanan vanawa kay wigi irgiya lo, nigi sa firita hiɗi bogorayna vanu, sa hayan kigina, lakgi dono'o hay Bum-Sumuna.

²Nan gat Evodiya, nan gat Sintike kaw, kay nisi ma fi varta kep hay Bum-Sumuna.

³Awa, naŋ niran ma gasina hay lopna kaw, nan siɗawaŋ kay naŋ ma gut kuɗsiya, nisi sa dur hiɗi nanu hay labara ma firina, Klemaŋ hiɗi nuriyon segena sa hay lopna, sa sesi ɗoy hay ɗerwella vi irita kaw.

⁴Firigiya hay Bum-sumuna dok-dok, nan min di lo, firigiya.

⁵Hin sumuna kaf wi ŋalda vigiya, Bum-Sumuna ka goboyo.

⁶Yorgi tuwgi kay va ne' noŋɗi, may hay slen kaf, hay siɗawta hiɗi giɗel-delta, hay lop ma slugona, ligi siɗawta tam Lawna kaw.

⁷Toyta vi Lawna ta suw yamda-wida kaf, ma ŋom dikgiya hiɗi varta vigiya hay Kristu Yesu.

⁸Ɓosiyonna, va ma hinin kayn ala, sle ma gasina kaf, sle ma nagay kay sli-yamda kulota kaf, sle ma ɗigerta kaf, sle ma bay-liwisna kaf, sle ma vi dikŋa kaf, sle ma jif lawta kaf, lopna ma ŋaana hiɗi ma nagay kay suburta, nam kaf kayni ma lin mi varta vigiya;

⁹va ma nigi hatamiya, fumawa, humumiyawa kaw, hiɗi ma nigi wum hayanu, ligi kuɗumu. Lawna vi toyta ma mus hiɗi nigiya.

¹⁰Nan firi ŋolo hay Bum-sumuna kay nigi hot zliy varta vigi kulo kan mara lo; nigi var nala, may nigi fi hagatɗi.

¹¹Nan di nala kay slen ma nan minimnaɗi, kay tuwan hatay kay mus firi hay liyn ma nan ka haya.

¹²Nan wi musta ma hay hawta, nan wi musta ma hay fita ŋolda kaw. Hay slen kaf, hay liyn kaf kaw, nan hatay a mus hobaya, a mus hay mayta-cita, a mus hay fita ŋolda, a mus hay dalana kaw.

¹³Nan as li slen kaf kuɗ nam ma ka vulan donota.

¹⁴Hay na'ta nigi li ŋaa'a kay tap hiɗi nanu hay zumalda vanu.

¹⁵Nigi sa Filipina, nigi kay tuwgi kaw wi slen kayni, kay hay tun cawta vi kusta vi labara ma firin pa, hay li ma nan hin Makedoniya aya, ekklesiya tara ta tapay hiɗi tayɗi, tapay hiɗi nan kayni ti ekklesiyata vigiya tuta, na' tapay hiɗi nanu hay vulda hiɗi fida kaw.

¹⁶Kay hay Tesalonika, nigi vulan sle ma ŋom ŋil tuwan ayawa sem ma'.

¹⁷May kayni kay nan ka gar vuldaɗi; va ma nan garam kayni, mi vuɗna ma min li ŋolo, ma may tigi pana.

¹⁸Nan fi slen pet, nan ka hay asta ŋolda kaw; nan hobawa, kay nan fi hay ɓam Epafroditus vulda ma may tigi pa, ma ŋray ki urdina ma his ŋaana nala, ɗifinna ma Lawna vumu, ma kiram ŋaa'a kaw.

¹⁹Lawna vanu ma vulgi slen ma ŋom ŋil tuwgi petna kuɗ farayna valamu, hiɗi gajijita hay Kristu Yesu.

²⁰Gajijita tam Lawna buya hay vatɗita hay vatɗita. Amen!

²¹Gi deɓ mi sa peldetna kaf hay Kristu Yesu. Ɓosiyonna sa ka hiɗi nanu gigi deɓe kaw.

²²Sa peldetna kaf ka gigi deɓe, suw pet nisi sa ka hay ziyna vi Cesar.

²³Slugota vi Bum-Sumuna Yesu Kristu mus hiɗi Ŋusta vigi musge!