Read Masana KOLOSENA 2 Bible Online

KOLOSENA 2 - Masana bible

KOLOSENA 2

¹Kay na'ta nan min ala nigi ma wi'e nanige nan ka dur ŋolo kigiya, kay nisi kaf sa ka hay Lawdikiya, nisi sa bay wan iran tuwa,

²kay nisi ma fi teŋ-irta, kay nisi ma li tapay kepe hay minda, hobaya hiɗi asta gasita vi yamda-wida, kay wi ŋayayta vi Lawna, kayni Kristu,

³nam ma sle ma ŋaana vi wida hiɗi yalla ka ŋayay hayamna.

⁴Nan di slen kayni, kay sa viygi goyo hiɗi yoboy ma ɗutnaɗi.

⁵Kay nan may jargi hiɗi iran zawɗi, may nan ka hiɗi nigiya hay Ŋusta, hiɗi firita, nan ka wi poyta ŋaata vigiya, hiɗi vida vigiya ta colay dono'o hay Kristu.

⁶Ki nigi vaawa hay Yesu Kristu Bum-Sumuna nala, poygi hay namu kaw;

⁷hiɗi sutaygi piy gaa hay namu, nigi ini kulo kalamu, lakay dono'o hay vida kuɗ hatta ta nigi fa'a, ligi lop ma slugona ŋolo kaw.

⁸Ligi ŋali: Wida vi nagata, ɗutta ta waata ta kuɗ data vi sumuna, kuɗ ɗetna ma gurayna vi nagata ma may kuɗ Kristuɗin kaf cani, nigi ma hin sumun ɗutgi goy hiɗi namɗi,

⁹kay asta ŋolda vi tuw Lawna kaf ka musi hay namu.

¹⁰Kay hay namu nigi hobawa, nam mi yamda vi muliyana hiɗi gaŋeraŋa kafe.

¹¹Hay namu kaw nigi kaay gosaya hiɗi gosayta ta may kaay hiɗi ɓam saɗi, kayni ti fok-goyta vi tuwna ma hay sliwna, kayni ti gosayta ta hay Kristu.

¹²Nigi piy gaa'a hiɗi namu hay baptisma, nigi dayay kulo'o hay namu, hiɗi namu kaw, kuɗ vida hay donota vi Lawna ma dayam kulo'o jar sa mitin pa.

¹³Nigi kaw sa ay mitiya hay kurut-tuwta vigiya, hay bay-gosayta hay sliw-tuwgiya, nam muɗgiyawa iriya hay namu, hay li ma nam lay slugotawa kay raw-goyta vay kafe.

¹⁴Ɗerwelda ta ay ɗoy joo kayta nam ɦasa'awa goyo, nam yawa'awa goyo, hay li ma nam ɓala'awa kulo kat gu-ma-grakŋa;

¹⁵Muliyana hiɗi sa gaŋeraŋa kaf nam fok mulda visiyawa goyo, vulsiyawa goyo a sumun cen kuɗsiya, hay li ma nam kolawa kisiya kulo kay gu-ma-grakŋa.

¹⁶Kay na'ta hin sa ka kitat kigiya kuɗ va ma nigi tumna hiɗi va ma nigi cumnaɗi, lebo kuɗ lawta vi yuldenɗi, kuɗ til ma wulina lebo sabatnaɗi kaw.

¹⁷sle namna kaf cani mi ŋus sle ma min ma'a, may gasita kayni ti na' ta ka hay Kristu.

¹⁸Hin sa yaw wurakŋa vigiɗi, la sa hot yalam gaa'a ala nam girif sunda-wuralawna, sa ma ki kayn nala hin tuwam goy tam sle ma vul tuwam kiramu, sa ma ki kayn nala hobay hiɗi subur-tuwta ta waata, ta kuɗ varta valam ta hay sliwna,

¹⁹may ŋaata san ki kayn nala jun tuwam tam yamda, na' ta tuwna kaf juni ta'a, muɗ dono'o, tun caw tam gaslna hiɗi sutayna kafe, wul kulo'o hiɗi wulda ta may vi Lawna pa.

²⁰La nigi mitawa hiɗi Kristu kuɗ hatta ma gurayna vi nagata, nisi vul vun-ma-gatna ki nigi ka iriya hay nagata nala kay mige?

²¹Yawamɗi, jugomɗi, tamamɗi!

²²Slen kayni kaf ka'a kay ɓulak goyo hay li ma san tumu. Kayni ti gatta hiɗi hatta vi sumuna.

²³Nisi sa li tuwsi ki gasi nisi yali nala, ki nisi ka li girifta kuɗ minda visi nala, ki nisi ka hot yisi gaa'a ŋom sliw-tuwsi kaw nala, may nisi nagay a sa slisi yisi kuloɗi, may nisi hoba' kayn darta vi sliw-tuwna ɦawa.