Read Masana KOLOSENA 4 Bible Online

KOLOSENA 4 - Masana bible

KOLOSENA 4

¹Nigi sumay ziyna, ligi ŋaa'a tam sa gorvona vigiya, vulsi slena visi goy ŋaa'a hay liyamu, kay nigi ma wi ala, nigi kaw mulla vigi ka hay wuralawna.

²Sogi tuwgi hay siɗawta, lakgi jiger hay lop ma slugona,

³siɗawgi kuma'a kaw, kay a Lawna mal vun ziyn goyo kay yoboyna ma numa kusumna, kay numa fi di goy kay ŋayayta vi Kristu, kuɗ ŋayayta vi Kristu na'ta, nan ka juni hay jaɓna wulini.

⁴Kay nan fi di goy haraŋi hay liyam ɗiger.

⁵Poygi hiɗi yali vok ir sum sa goy jiyna, bagi liyna vigi goy ɦawaɗi.

⁶Hin dita vigi li dok-dok hobay hiɗi slugota, zek kuɗa'a, kay nigi ma wi yal ma hot dit mi gigekaw hay liya'a.

⁷May Tikikus ma vigi labara vanu. Namu mi ɓasun ma hayan kalamna, niran ma sunda hay Bum-Sumuna, sa ma sunda ma gasina vi Bum-sumuna.

⁸Nan gumis kayni kiran ta, kay nigi ma wi lakŋa vuma'a, a nam ma teŋgi irgi hay Bum-Sumuna kaw.

⁹Nan gumis hiɗi Onesimus ɓasun ma gasina ma hayan kalamna, sa ma hay jafgiya kaw, nisi ma vigi labara kay slen ma ka li tani kafe.

¹⁰Aristarkus niran ma daŋgayna gigi deɓe, hiɗi Markus goora vi nasum Barnabasna, nam ma nigi humi labara kalamu, la nam coysawa tigiya ni, nigi ma vum hiɗi firita.

¹¹Yesus ma yum Yustus kaw gigi deɓe. jar sa kaay gosayna, li lop hiɗi nanu kay mulda vi Lawn kayn si nisi yawni tuta, nisi vulan kursulita ŋolo.

¹²Epafras ma hay jafgina ka gigi deɓisa. Namu mi sa ma sunda vi Kristu Yesu. Dok-dok nam ka dur kigiya hay siɗawta valamu, kay nigi ma lak ɗeŋe, wi minda vi Lawna goy haraŋi kaw.

¹³Nan li di-goyta kayni kigi ala nam mak tuwam ŋolo kigiya, kay sum sa hay Lawdikiya hiɗi nisi sa hay Hiyeropolis kaw.

¹⁴Lukas doktora ma hayan kalamna gigi deɓe, hiɗi Demas kaw.

¹⁵Gigi deɓ mi ɓosiyayna sa ka hay Lawdikiya, hiɗi Nimfas, hiɗi sa ekklesiyana sa ka vo hay ziyna valamu kaw.

¹⁶Ɗerwelda kayni hay li ma nigi jaŋa'awa goy jargi jaŋŋa, nigi ma li a na' ma jaŋis goy hay ziyda-Lawna vi Lawdikiya kaw. Ɗerwelda ta may goy Lawdikiya pata nigi ma jaŋa' goy jargi kaw.

¹⁷Nigi ma di tam Arkipus ala, nam ma li ŋali hiɗi lopna ma Bum-Sumun vulumtina, nam ma hobom vunam ŋaa'a.

¹⁸Nan Paulus gigi deɓe hiɗi ɗota van nan kay tuwanu. humgi ma gigi kay jaɓna vanu, Slugota mus hiɗi nigi musge.