Read Masana 1 TESALONIKŊA 1 Bible Online

1 TESALONIKŊA 1 - Masana bible

1 TESALONIKŊA 1

¹Paulus, Silvanus hiɗi Timotewus, tam sa viyna sa hay Tesalonika, sa ka hay Lawna bumna hiɗi Yesu Kristu Bum-Sumuna: Slugota hiɗi toyta ma vulis tigiya.

²Numa'a ka gi deɓ mi Lawna dok-dok kigi kaf, yigi segiya kaw hay siɗawta vuma'a.

³Humma ka guma dok-dok vok Lawna buma'a, kay lopna vi vida vigiya, lopna vi minda vigiya hiɗi vida donota vi cubta-sle'ta vigiya hay Bum-Sumuna vaya Yesu Kristu.

⁴Nigi ɓosiyoma'na sa Lawna mingi ŋolla, numa'a wi ala nigiya sa vilekay-goyna,

⁵Kay labara ma firina vuma'a may co tigi kayn hay yoboyn ɦawaɗi, may hiɗi donota, hiɗi Ŋusta-Peldetta, hiɗi wida goy gasi ŋaa'a. Nigi kay tuwgi kaw wi ala numa'a poy jargi kayni kuɗgi nigiya.

⁶Nigi muɗi si sa sli kuɗmana, sa vi Bum-Sumuna kaw, hay li ma nigi vi yoboyna jar zumalda ŋolo hiɗi firita vi Ŋusta-Peldetta.

⁷Nala nigi muɗi si sa sum sa viyna kaf hay Makedoniya hiɗi sa hay Akaya fi sli kuɗgiya.

⁸May yoboyna vi Bum-Sumuna wuli dono'o co ta-ta Makedoniya hiɗi Akaya tutaɗi, may vida vigiya hay Lawna ɗek tuwa'awa goy hay liyn kaf, kayn may dum diy loɗi.

⁹Kay sumuna ka di labar goy kuma ala numa fi hagata kay cuk jargiya, lo nigi vaawa kuɗ Lawna, hay li ma nigi hin lawayn ma waana goyo, kay sun Lawna ma irina hiɗi ma gasina,

¹⁰lo kay cub mata vi goora valamu hay wuralawni pa, nam ma nam dayam kulo hay mitta pa, Yesu, ma min suɗay goyo hay ɦiyda ta min ma'a.