Read Masana 1 TESALONIKŊA 2 Bible Online

1 TESALONIKŊA 2 - Masana bible

1 TESALONIKŊA 2

¹Ɓosiyonna, nigi kay tuwgi kaw wi goy ala cota vuma jargiya may li goy sur waaɗi.

²May bugol numa fi lasta hiɗi joota ma nisi luma'ta ŋolo hay Filipi kaw, ki nigi wi nala, nir na'ta kep numa li kursuli hay Lawna vaya kay kus labara ma firina vi Lawna tigiya jar duura ŋolo.

³Kay kusta vuma'a may kuɗ law ma bay-gasinaɗi, may goy hay varta ta liwistaɗi, may goy hay ɗuttaɗi kaw;

⁴may ki Lawna wakmaawa kay vulma labara ma firina hay ɓuma'a, nala numa law ki muɗ tuwma jifiya kir sumuna naɗi, may numa law vok Lawna ma wak dikga.

⁵Nigi kaw wi kayni, kay numa may di yoboyna ma ɗutta noŋ ne'ɗi, numa may hiɗi varta ta goslta noŋ ne'ɗi kaw, Lawn kay tuwam kaw wi kayni.

⁶Numa may gar suburta ta may vi sumun patɗi, tigi nigi paɗi, tam segen paɗi kaw;

⁷La liyani ki numa si sa apostolayna vi Kristu, numa asay a li tuwma dono ŋol kigiɗi, may numa lak jargiya hiɗi ŋalda ŋolo. Ki sum gurona kot tuw gurona va' ŋaa nala.

⁸Hay luma'da vuma'a ma tigina, numa min kay vulgitin mi labara ma firina vi Lawna tutaɗi, may lo kay vulgi irita vuma'a kaw, kay hayma tiy kigi ŋolo.

⁹Ɓosiyonna, humgi gigiya kay lopna hiɗi makka vuma'a: Numa li lopna falayta hiɗi henjeta kay vul makka mi sa kep kaw jargiɗi, numa kusgitin mi labara ma firina vi Lawna.

¹⁰Nigi li di-goyta kuma'a, Lawna nala kaw, kay numa poy jargiya hay varta ta peldetta, ɗigere, bay law pi kuma'a kaw, jargi nigi sa viyna.

¹¹Nigi kaw wi ala: Numa li tam gige gige jargiya ki bumna li tam gurona valam nala;

¹²Numa gatgiya, teŋgi irgiya, siɗawgiya kaw, kay nigi ma poy nagay kay Lawna ma yigiyawa hay mulda vi gajijita valamu.

¹³Kay na'ta numa gi deɓ dok-dok mi Lawna kay ta ala nigi vi yoboyna vi Lawna ma numa kusum tigina, ki yoboyna vi sumuna naɗi, may ki nam ka gasi nala: Yoboyna vi Lawna ma ka li lop haygi nigi sa viyna.

¹⁴Kuɗ kayni, ɓosiyonna, nigi muɗi si sa sli kuɗ sa tapna vi Lawna hay Kristu Yesu, sa ka hay Yudiya: Kay nigi fi lasta hay ɓam sum sa hay nagata vigina, ki nigi fi lasta hay ɓam sa yudiyana nala kaw.

¹⁵Kayni si nisi sa ci Bum-Sumuna Yesu goy mati, hiɗi sa jobta-Lawna, nisi sa luma lasi, sa kir Lawna ŋaaɗi, nisi ka gawt tam sumun kaf kaw.

¹⁶Nisi telma kay kus yoboyna tam sa waana, kay nisi ma fi su'ɗi, ki kayn nala nisi hobom kulo kayni mi vun sulukŋa visiya. May ɦiyda coowa kisiya.

¹⁷May ɓosiyonna, numa ka goy gine hiɗi nigiya ir liyn neeɗa hay ira ɦawa, may hay dikgaɗi, numa gar hay dikma har' hay varta vuma dono'o kay ɗuwgi irgi lo.

¹⁸Lo numa'a min coys ta-ta tigiya, suw pet nan Paulus, sem kep lebo sem ma', may Satan telma'a.

¹⁹Cubta-sle'ta vuma'a, firita vuma'a, bogoray ma gajijita vuma'a kaw kayni mi gige? Say si nigiya vok Bum-sumuna vaya Yesu hay mata valamɗi su?

²⁰Awa, nigi kayni mi suburta vuma'a hiɗi firita vuma'a kaw.