Read Masana 1 TESALONIKŊA 4 Bible Online

1 TESALONIKŊA 4 - Masana bible

1 TESALONIKŊA 4

¹Ɓosiyonna, ma hinin kayni numa siɗawgiya, gatgi kaw hay Bum-Sumuna Yesu: Ki nigi hat kuɗma nala, ir nanige nigi as poy ŋaa'a vok Lawna ki nigi poyay jew nala. Nigi ma jor vokgiya vokgiya.

²Kay nigi wi gatta ta may tam Bum-Sumuna vaya Yesu ta numa vulgita.

³Va ma Lawna minim kayni ti lita goy peldetta vigiya; kay nigi ma tel tuwgiya kay zlata-bulota;

⁴kay gigekaw jargiya ma ŋom tuwam ŋaa'a hay peldetta hiɗi pasiyakka.

⁵a vul tuwam goy hay darta vi bulota ki sa waana sa wi Lawnɗina ka li nalaɗi.

⁶A san gigekaw li va ma guniya tam ɓasulumna hay slenɗi, li joot talamɗi kaw, kay Bum-sumuna ma ka kitata kay slen kayni kaf, ki numa digitawa goy jewe, li di-goytawa kalamu kaw nala.

⁷Kay Lawna yay kay liwistaɗi, may kay lita goy peldetta.

⁸Kay na'ta sa ma noy gatta kayni goyo, nam noyom goy mi sanaɗi, may nam noyom goy mi Lawna ma vulgi Ŋusta-Peldetta valamawa.

⁹May kay minda ta jar ɓosiyom-tuwsina kayni sa as ɗo tigi ka' loɗi, kay nigi kay tuwgi hatawa kuɗ Lawna kay minda ta jar-tuwgita;

¹⁰Kayni mi va ma nigi ka li tam ɓosiyay sa hay Makedoniya noŋ kafna. May ɓosiyoma'na, numa gatgiya, kay nigi ma ɦur kayni vok ŋol suwa,

¹¹a tun ŋalda vigiya kay lak hay toyta, a nigi ma tun varta vigiya kay slena vigiya, li lop hiɗi ɓigiya kaw, ki numa'a gatgiyay nala;

¹²Kayni kay nigi ma ɗek tuwgi tam sa goyna ala nigi poy hay liyam ɗiger, nigi may gar va kay sa noŋɗi.

¹³Ɓosiyonna, numa may min ala nigi lak hay bay-wida kay sa kali sennaɗi, a nigi ma yor tuwgiya ki segena sa bay cubta-sle'ta naɗi,

¹⁴Kay, la nay vi ala Yesu mitiya, nam dayay kulo'o kaw, nay as vi kaw ala sa kali senna, Lawna ma hotsiyay kulo iriya hay Yesu, tapay hiɗi namu kaw.

¹⁵Kay na'ta, kayni mi va ma numa dum tigiya, kuɗ yoboyna vi Bum-Sumuna: Nay sa ka iri tuwa, sa hini cub mata vi Bum-Sumuna, nay ma kal vok sa kali senna noŋɗi.

¹⁶Kay Bum-Sumuna kay tuwamu ma jikay gaa wuralawn pa, hiɗi ɗekka, hiɗi siwelda vi della vi sunda-wuralawna ma ŋolla, hay buwna vi togolomna vi Lawna, sa miti hay Kristuna ma day kulo jewe.

¹⁷Bugol kayni, nay sa hini irina, nay ma yawis kulo hay ɗugulla hiɗi nisiya, kay ŋaf ir Bum-Sumuna hay simeɗna, hay na'ta kayni nay ma lak dok-dok hiɗi Bum-Sumuna.

¹⁸Teŋgi irgi jar-tuwgi teŋe hay yoboyna kayni.