Read Masana 1 TESALONIKŊA 5 Bible Online

1 TESALONIKŊA 5 - Masana bible

1 TESALONIKŊA 5

¹Ɓosiyonna, kay liyna hiɗi ŋaɓta vi liyna kayni, nam mi va ɦawa a sa ɗo tigi kalamu.

²Kay nigi kay tuwgi wi goy haraŋ ala buurta vi Bum-Sumuna co ɗawn ki sa ma kulla hay henjet nala.

³Hay li ma sumuna ma tun caw di ala toyta, va ma joo mayɗi! Ki vunay ma diyn nala, ɓulakka ma nig kisiya ki tuw-tita vi cata hayta nala, nisi ma pir goy noŋɗi.

⁴May nigiya, ɓosiyonna, nigi may hay jufundaɗi, a buur na'ta ma co kigiya ki sa ma kulla naɗi;

⁵kay nigi kaf si gurona vi haraŋa, gurona vi falayta kaw. Nay may vi henjetaɗi, vi jufundaɗi kaw.

⁶Kalay sene ki segena naɗi, may lakay jigere, lakay ŋali kaw.

⁷Kay nisi sa kal sene, kal sen henjeta, nisi sa ɦiwir kuɗ dolayna, ɦiwir henjeta kaw.

⁸May nay sa fi falaytna, lakay ŋal klas', cukay ŋoŋŋa vi vida hiɗi minda taya, cubta-sle'ta vi su'da ki ŋalayta duura nala.

⁹Kay Lawna vilekay goyo tam ɦiydaɗi, may kay fi su'da kuɗ Bum-Sumuna vaya Yesu Kristu,

¹⁰Nam ma miti kaya, kay la nay ka iriya, la nay mitiya kaw, nay ma lak iriya hiɗi namu.

¹¹Kay na'ta, teŋgi irgiya jar-tuwgiya, ingi tuwgi kulo jar-tuwgiya, ki nigi li jew nala.

¹²Numa siɗawgiya, ɓosiyonna, kay nigi ma var ŋaa'a kay nisi sa li lop vokgina, sa ka ŋomgi hay Bum-Sumuna, sa ka hatgina kaw.

¹³Slisi yisi kulo ŋaa'a hay minda, kuɗ lopna visiya kaw. Lakgi hay toyta jar-tuwgiya.

¹⁴Numa digiya bosiyonna, gatgi nisi sa poy hay gijum-gijumta. Teŋgi ir nisi sa ka hay makka, gutgi kuɗ sa maŋayna, ligi kaf hiɗi ŋalda.

¹⁵Ligi ŋali a sana ma hot joota kay jootaɗi; may gargi ŋaata dok-doko, jar-tuwgiya lebo tam segena.

¹⁶Firigiya dok-dok.

¹⁷Siɗawgi dok-dok.

¹⁸Gigi deɓ hay slen pet; kay kayni mi minda vi Lawna kigiya hay Kristu Yesu.

¹⁹Tewgi Ŋusta goyɗi.

²⁰Nigi ma ɗuw yoboyna jobta-Lawna birek-cekɗi;

²¹may wakgi slen kaf, vigi sle ma ŋaan dono'o;

²²Tel tuwgi kay joota kuɗ jafa' pet.

²³Lawna vi toyta, nam kay tuwamu ligi goy peldet kafe, ŋusta, ciwta hiɗi tuwgi kaf ma li ŋomi bay joota ta-ta hay mata vi Bum-Sumuna vaya Yesu Kristu.

²⁴Nam ma yigiyawa nam ɗigere, mi namu ma min li kayni.

²⁵Ɓosiyonna, siɗawgi kuma'a.

²⁶Gigi deɓ mi ɓosiyayn kaf hiɗi ŋaf-vunda ta peldetta.

²⁷Nan digi hay sem Bum-Sumuna, a ɗerwelda kayni nigi ma jaŋa' goy vok ɓosiyayn kaf.

²⁸Slugota vi Bum-sumuna vaya Yesu Kristu mus hiɗi nigi kafge.