Read Masana YOSUWA 1 Bible Online

YOSUWA 1 - Masana bible

YOSUWA 1

¹Bugol mitta vi Musus sa ma sunda vi Ma-Vatɗina, Ma-Vatɗina di tam Yosuwa goora vi Nun ma sunda vi Musus ala:

²Musus sa ma sunda vanu mitawa, wulin kayni, fokaŋ kulo'o, niy-lumna Yordan waŋŋi naŋ ma ɦawam kulo'o, naŋu hiɗi sumun kaf, kay kal hay nagata ta nan vula' mi sum sa Israyella.

³Liyn pet ma wur-segi tun hayamna, nan min vulgita, ki nan di tam Musus nala.

⁴Vun nagata vigi ma fokis hay fulda vi Libaŋ ta naŋ ka wa' zawni pa, ta-ta tam niy-lum ma ŋolla, niy-lumna Eufrata, tam nagata vi sa Hititna pa ta-ta tam niy-lum ma ŋolla, hay liyn ma fatta ɗig hayna.

⁵Hay buura vi irita vaŋ kaf sa as col vokaŋ mayɗi, nan ka hiɗi naŋu ki nan li ay hiɗi Musus nala, nan ma noyaŋ goyɗi, nan ma hinaŋ goyɗi kaw.

⁶Laŋ tuwaŋ dono'o, laŋ kursulita kaw, kay sumun tani, nagata ta nan yi va kanu kay vula' mi sumaysiya, cuksi haya' ɗawni mi naŋu.[1]

⁷May suw pet kayni naŋ ma li tuwaŋ dono'o, laŋ kursulita ŋolo, vun-ma-gatna ma sa ma sunda van Musus vulaŋgina naŋ ma ŋomomu, li kuɗum kaw, naŋ ma cal goy gal jufɗi, gal gulɗi kaw, kay naŋ ma fi ŋaata hay liyn kaf ma naŋ ma tuɗ hayna.

⁸Ɗerwelda vi gatta na'ta kayn hin jaraŋ ja goy hiɗi na'ɗi, naŋ ma var ka'a falayta hiɗi henjeta kaf, kay sle ma ɗoy hayna kaf, naŋ ma ŋomomu, li kuɗumu kaw, ki kayn nala lopna vaŋu ma li hay liyamu, nala naŋ ma fi ŋaata kaw.

⁹Nan hinaŋ dit ala naŋ ma li tuwaŋ dono'o, li kursuliya kaw ɗisu? Naŋ ma li narɗi, dikaŋ ma ɓiraŋɗi, kay Bum-Sumuna Lawna vaŋu ka hiɗi naŋu hay liyn kaf ma naŋ min tuɗ hayna.

¹⁰Yosuwa vul dit tam soje sa ŋulona ala:

¹¹Nigi ma poy hay kaŋŋa, nigi ma di tam sumun ala, nisi ma kot tuwsi hiɗi sle ma tina, kay hini buur ɦidi nisi ma ɦaw Yordan kulo'o kay tuɗ sli nagata ta Ma-Vatɗina Lawna visiya min vulsiya.

¹²Nala Yosuwa di tam jafna vi Ruben, jafna vi Gad hiɗi gal jafna vi Manase ala:

¹³Humgi ma gigi kay va ma Musus sa ma sunda vi Ma-Vatɗina di tigi ala: Ma-Vatɗina Lawna vigi min vulgi tun-sukka, nam vulgi nagat na'tawa kaw.

¹⁴Boyna vigiya, farayna vigiya hiɗi gurona vigi kaw ma hin hay nagata ta Musus vulgiya goy bugol Yordan tani, may nigiya, nigi ma tun kay tuwgiya kay gan tuwgi kay duura, tuɗ vok ɓosiyogina, nigi sum sa wi duura kaf, nigi ma gut kuɗsiya,

¹⁵ta-ta Ma-Vatɗina ma vulgi tun-sukka, mi ɓosiyogina ki nigi nala kaw, kay a nisi kaw ma sli nagata ta Ma-Vatɗina Lawna visiya min vulsiya. Bugolda nigi ma hotay hay nagata ta ir vigita. Musus sa ma sunda vi Ma-Vatɗina vulgi nagat na'ta goy bugol Yordan hay liyn ma fatta dayna.

¹⁶Nisi hot dit tam Yosuwa ala: Numa ma li slen kaf ma naŋ duma kalamna, numa ma tuɗ hay liyn marige kaw ma naŋ cukma hayamna.

¹⁷Numa ma hum kuɗaŋu ki numa ay hum kuɗ Musus nala kaw. May Ma-Vatɗina Lawna vaŋu ma li hiɗi naŋu ki nam li ay hiɗi Musus nala.

¹⁸Gigekaw ma ŋel gatta vaŋawa, gigekaw ma hum kuɗ dita vaŋɗi, sa ma hum kuɗ sle ma naŋ dum kafnɗina, kitata valam ti mitta. May suw pet, laŋ tuwaŋ dono'o, laŋ kursulita.