Read Masana YOSUWA 10 Bible Online

YOSUWA 10 - Masana bible

YOSUWA 10

¹Hay li ma Adoni-Sedek mul ma Yerusalemna hum ala Yosuwa sli Ay, nam ɓulaka'awa goyo kaw, nam li tam nagata Ay hiɗi mulla va'a ki nam li tam Yeriko hiɗi mulla va'a nala kaw, a sum sa hay Gabawon toy jarsiyawa hiɗi sa Israyella, nisi ka laki jarsiya kaw,

²narta kal haysi ŋolo, kay Gabawon kayni mi hoyok-ziy ma ŋolo, ki hoyok-ziyn ma mulda ka tuni haya nala, hoyok-ziy namna ŋolo suw Ay, sum sa hayamna diksi jufaya kaw.

³Adoni-Sedek mulla vi Yerusalem gi sunda tam Hoham mulla vi Hebron, tam Pireyam, mulla vi Yarmut, tam Yafiya, mulla vi Lakis hiɗi Debir mulla vi Eglon ala:

⁴Tuɗgiyay katanu, gutangiya, kay nay min ci sum sa Gabawonna, kay nisi li toytawa hiɗi Yosuwa hiɗi Israyel kafe.

⁵Muliyana vi sa Amoriyana sa vaslna tok tuwsiya: Mul ma Yerusalemna, mul ma Hebronna, mul ma Yarmutna, mul ma Lakisna, mul ma Eglonna, nisi kaliya hiɗi sojena visi kafe; nisi tun kaŋŋa visi goy vok Gabawon, nisi fok duura hiɗi na'a.

⁶Sum sa Gabawonna gi sunda tam Yosuwa hay kaŋŋa hay Gilgal ala: Naŋ ma noy sa sunda vaŋ goyɗi, naŋay katma gosoyo, butma goyo, gutaŋ kuɗma'a, kay muliyana sa Amoriyana sa kay hiɗiyn kaf, tap vunsiyawa kuma'a.

⁷Yosuwa fokis hay Gilgal pa, namu hiɗi sum sa wi duur kaf kuɗumu, sum sa jufay hay duur kaf.

⁸Ma-Vatɗina di tam Yosuwa: Laŋ nar kisiɗi, kay nan min vulsi hay ɓaŋu, sa kep kaw as col vokaŋɗi.

⁹Yosuwa co kisi tukusi', hay Gilgal pa nam bur ay tuɗa.

¹⁰Ma-vatɗina munsi jaŋi vok sa Israyella, nam vatsi donosi goy kaf hay Gabawon, digiɗsi hay hagata ta jik hay Bet-Horon, nam kol kisiya ta-ta hay Azeka hiɗi Makkeda.

¹¹Kayni va ma li tisiya hay li ma nisi ka jaŋ vok sa Israyella, hay li ma nisi co hay liyn ma beɗna vi Bet-Horon kayni, Ma-Vatɗin cuk hiɗiy ma ŋulon gaa kisiya hay dukalawni pa, ta-ta hay Azeka. Nisi fi mitta; nisi sa mokayn cisina, nisi ŋol suw sa Israyel cisi goy hiɗi kew-gaferaŋa.

¹²Ki kayn nala, hay buur ma Ma-Vatɗina vul sa Amoriyana hay ɓam sa Israyella, Yosuwa law tam Ma-Vatɗina vok ir sa Israyella kaf ala: «Fatta, colag kulo'o kay Gabawon, naŋ tilla kaw colaŋ kulo'o kay lokŋa vi Ayalon».

¹³Ki kayn nala fatta min ter voka'ɗi, tilla kaw cola, ta-ta sum sa Israyella job yisi tam sa gaw kisin tuwa. Kayni ka ɗoy hay ɗerwelda vi sa ma ɗigera. Nala fatta coli kulo dukalawna, na' min li koloyo kay ɗig gaaɗi, ta-ta goboy ir buur kepe.

¹⁴Buurta tara'a bay li ki kayn nala tuwa, jew kaw may liɗi, vok kaw mayɗi, a Ma-vatɗina hum del sana ki kayn nala. Kay Ma-Vatɗina ka dur kuɗ sa Israyella.

¹⁵Bugolda, Yosuwa hiɗi sa Israyella sa kuɗumna kaf hot hay kaŋŋa hay Gilgal.

¹⁶Muliyan sa vaslna yaway jaŋi, nisi tuɗ ŋay hay zul-hiɗiyna hay Makkeda.

¹⁷Nisi vul labara mi Yosuwa ala: Muliyan sa vaslna ka ŋayay hay zul-hiɗiyna hay Makkeda.

¹⁸Yosuwa di'e: Ligatgi hiɗiy ma ŋulon vun zulla, lakgi sum sara talamu kay ŋomomu.

¹⁹May nigi hayɗini, nigi ma lakɗi, digiɗgi sa gawt kigina, kaasi voksiya, hinsi cuk kulo hay hoyok-ziyna visiɗi, kay Ma-Vatɗina Lawna vigiya vulsiyawa hay ɓigiya,

²⁰hay li ma Yosuwa hiɗi sum sa Israyella cisi ta-ta goboy vatsi goyo, hin goy kayni si sa pir jaŋi, sa kal kulo hay hoyok-ziy ma gulmun talamna tuta,

²¹bugol kayni sumun kaf hotay kat Yosuwa hay kaŋŋa hay Makkeda, sa ma di vunam kulo kat Israyel ɓislek kaw mayɗi.

²²Yosuwa di'e: Malgi vun zul-hiɗiyn goyo, muliyan nisin sa vaslna nigi ma cukanti ay goy hay zul-hiɗiyn pa.

²³Ki kayn nala, muliyan nisi sa vaslna nisi cuksi ay goy talamu. Nisi kayni: Mulla vi Yerusalem, mulla vi Hebron, mulla vi Yarmut, mulla vi Lakis hiɗi mulla vi Eglon.

²⁴Hay li ma nisi cuk muliyan nisin ay goy kat Yosuwa cukŋa, Yosuwa yi sum sa Israyel kaf, nam di tam sa tuni voksi hay duura sa poy hiɗi namna ala: Nigiyay goboyo, tungi segi kel muliyan lakŋi. Nisi co'o, tun sesi kelsiya.

²⁵Yosuwa di tisiya: Ligi narɗi, dikgi vigi bat-batɗi, ligi dono'o, ligi kursuliya kaw, kay sum sa gaw kigina sa nigi min dursina Ma-Vatɗina ma lisi ɗawni ki kayn nala.

²⁶Bugol kayni, Yosuwa calsiya, nam cisi goyo. Nam ɓalsi kulo kat gun vasl, nisi ka gaɓay kulo kat guna ta-ta vulatita.

²⁷Hay li ma fatta ɗikawa, Yosuwa vul hagata kay jiksi ay gaa kat guna. Nisi cuksi hay zul hiɗiyna ma nisi ay ŋayay hayamna, nisi ligat hiɗiy ŋulona vun zulla. Hiɗiy ma nisi ligatamna ka vun zul namna lak ta-ta vaydi.

²⁸Yosuwa sli Makkeda hay buur na'ta, sum sa haya'na nam calsi hiɗi kewna, cal mulla kaw. Nam cisi goy kafe, hiɗi sum sa ka hay liy namna kafe kaw. Nam hin sa mara kep kaw iri noŋɗi. Nam li tam mul ma Makkeda ki nam li tam mulla vi Yeriko nala kaw.

²⁹Yosuwa hiɗi sum sa kuɗumna kaf yawis hay Makkeda pa, nisi kali dur Libna.

³⁰Libna hiɗi mulla va'a, Ma-Vatɗina vulsi hay ɓam sa Israyella, nisi cal sum sa haya'na kaf hiɗi kew-gaferaŋa. Nisi may hin sa kep kaw pir goyɗi, nisi li tam mul ma Libna ki nisi li tam mul ma hay Yeriko nala kaw.

³¹Yosuwa hiɗi sum sa Israyel kaf kuɗumu, yawis Libna pa nisi kali hay Lakis, nisi tun kaŋŋa visi goy vok Lakis, nisi dura'a.

³²Ma-Vatɗina vul Lakis hay ɓam sa Israyella, nisi sla'a hay buurta ma'ta, sum sa haya'na nisi calsi hiɗi kew-gaferaŋa, ki nisi li tam Libna nala.

³³Horam mulla vi Gezer fokay kulo'o kay gut kuɗ Lakis. Yosuwa kol kalamu, nam hiɗi sumuna valam kaf, sa kep kaw may pir goyɗi.

³⁴Yosuwa hiɗi sum sa Israyel kaf kuɗumu, yawis hay Lakis pa, nisi kal hay Eglon; nisi tun kaŋŋa visi vok Eglon, nisi dura'a.

³⁵Nisi sli nagata hay buur na'ta, sum sa haya'na nisi calsi hiɗi kew-gaferaŋa kafe, Yosuwa ci sumun kaf goyo hay buur na'ta de', ki nam li tam Lakis nala.

³⁶Yosuwa hiɗi sum sa kuɗumna kaf fokis hay Eglon pa kal Hebron, nisi dura'a.

³⁷Nisi sla'a, nisi cal sum sa haya'na hiɗi kew-gaferaŋa, nisi ci mulla kaw, hoyok-ziyn ma kuɗa'na kaf, ki nam li tam Eglon nala. Yosuwa may hin sa pir goy kep noŋɗi, sum sa hay nagatna nam cisi goy kafe.

³⁸Yosuwa hiɗi sum sa kuɗumna muɗ irsi kir Debir, nisi dura'a.

³⁹Nam sli nagata. Mulla vi nagata, hoyok-ziy ma kuɗa'na hiɗi sum sa hayamna kaf nam calsi goy hiɗi kew-gaferaŋa, nam cisi goy kafe, hin mara iri kep noŋɗi; Yosuwa li tam Debir hiɗi mulla va'a ki nam li tam Hebron nala, ki nam li tam Libna hiɗi va'a nala kaw.

⁴⁰Yosuwa kol kay nagat kaf; sa kay hiɗiyna, sa hay gal kayamna, sa hay beɗna hiɗi sa kuɗ hiɗiyna kaw, hiɗi muliyana visi kaf; nam hin mara pir goy kep noŋɗi, sle ma sukka hayamna kaf nam cum goyo ki Bum-Sumuna Lawna vi Israyel vul hagat nala.[7]

⁴¹Yosuwa cisi kayni, fokis hay Kades-Barneya pa ta-ta gaa Gaza, nagata vi Gosen kaf ta-ta hay Gabawon.

⁴²Muliyan kaf hiɗi nagata visi kaw Yosuwa yawsiya, kay Ma-vatɗina Lawna vi Israyel ka dur kuɗsiya.

⁴³Bugol kayni Yosuwa hiɗi sum sa Israyel sa kuɗumna kaf hot hay kaŋŋa hay Gilgal.