Read Masana YOSUWA 17 Bible Online

YOSUWA 17 - Masana bible

YOSUWA 17

¹Manase goor ma ŋolla vi Yosef kaw nisi vulum ir galla valamu. Makir, goor ma ŋolla vi Manase bum Galaad, nisi vulum Galaad hay Basan, kay namu mi sana vi duura.

²Nisi vul naga kaw mi gurona vi Manase segena, kuɗ vuɗna visiya visiya, kay gurona vi Abiyezer, gurona vi Helek, gurona vi Asriyel, gurona vi Sikem, gurona vi Hefer, gurona vi Semida: Kayni si guro sa jufayna vi Manase, goora vi Yosef, kuɗ vuɗna visiya visiya.

³Selofkad, goora vi Hefer, goora vi Galaad, goora vi Makir, goora vi Manase, nam may fi guro sa jufayɗi, may si guro-boyna. Semda visi kayni: Mahla, Nowa, Hogla, Milka hiɗi Tirsa.

⁴Nisi co vok mul-ma-ɗifinna Eliyazar, vok Yosuwa goora vi Nun, vok sa Yerimana kaw, nisi disiya: Ma-Vatɗina vul hagata tam Musus ala nigi ma vulma voco'o jar guro-biyomana. ki kayn nala nisi vulsi voco'o jar guro-biyom busina ki Ma-Vatɗina vul hagat nala.

⁵Nala nisi vul ir liyn doogo mi Manase hiɗi ŋaɓta kuɗ ɦayta, kayn di ala nagata vi Galaad hiɗi Basan goy gal hena vi Yordan may ŋaɓay hayɗi.

⁶Guro-boyna vi Manase fi vocota jar gurona valamu sa jufayna. Nagata vi Galaad na' hin mi gurona vi Manase segena.

⁷Jar nagata vi Manase, fokis hay Aser ta-ta hay Mikmeta, ta ka goy vok Sikem, na' kal hay Yamin kat sum sa hay Eyin-Tappuwa.

⁸Nagata vi Tappuwa na' vi gurona vi Manase, may Tappuwa hay jaara vi Manase na' vi gurona vi Efrayim.

⁹Jaara jik hay niy-ma-riŋŋa vi Kana, hay gal ma kayamna vi niy-ma-riŋŋa. Hoyok-ziy namna nam vi Efrayim, hay jar hoyok-ziyna vi Manase. Jaara vi Manase hay gal ma gaana vi niy-ma-riŋŋa co kat niy-lum ma ŋolla.

¹⁰Nagata ta gal kayamta na' vi Efrayim, ta gal gaata vi Manase; niy-lum ma ŋolla mi jaara visiya; nisi jik kat Aser hay gal ma gaana, kat Isakar hay gal ma kuɗuwna kaw.

¹¹Kayni ti nagata vi Manase ta ka hay liyna vi Isakar hiɗi Aser: Bet-Seyan hiɗi naga ma kuɗa'na, Yibleyam hiɗi naga ma kuɗa'na, sum sa hay Dor hiɗi naga ma kuɗsina, sum sa hay Eyin-Dor hiɗi naga ma kuɗsina, sum sa hay Taanak hiɗi naga ma kuɗsina, sum sa hay Megiddo hiɗi naga ma kuɗsina. Ir liyn ɦidi.

¹²Gurona vi Manase may yaw naga namna lakŋɗi, sum sa Kanaaniyana mini kay lak ziy hay naga namna.

¹³Hay li ma sum sa Israyella muɗ dono muɗna, nisi li sum sa Kanaaniyan gorvo'o, may nisi as kay digiɗsi goyɗi.

¹⁴Gurona vi Yosef di tam Yosuwa ala: Numa ŋolo ta-ta vaydi, kay Ma-Vatɗina gi bolawa kuma'a. May naŋ vulmat mi ir liyn kep ɦawa kay mige?

¹⁵Yosuwa di tisiya: La nigi ka ŋol dak-daki, tuɗgi kuɗ juruta, nigi ma par liyna kay li ziy hay nagata vi sum sa Feresiyena hiɗi sa Refayimna, kay hiɗiyta vi sa Efrayimna kayni na' hebay ŋolo kigiya.

¹⁶Gurona vi Yosef di'e: Hiɗiyt may asmaɗi, lo keke-ma-duura ma kawayna ka hay ɓam sum sa Kanaaniyan kaf sa ka li ziy hay lokŋa, sa ka hay Bet-Seyan hiɗi naga ma kuɗa'na, sa ka hay lokŋa vi Yisreel kaw.

¹⁷Yosuwa di tam jafna vi Efrayim hiɗi Manase gurona vi Yosef ala: Nigi kayni si sum sa biyay ŋolo, donota vigi kaw ŋolo, nigi ma fum mi gal ma kiɗay ɦawaɗi.

¹⁸May nigi ma fa' ti hiɗiyta, la ti juruta kaw, nigi ma para' goyo, nigi ma fi haya'a. Nigi ma digiɗ sa Kanaaniyan goyo, la keke-ma-duura visi ma kawayn ka'a, la donota visi ka'a kaw.