Read Masana YOSUWA 18 Bible Online

YOSUWA 18 - Masana bible

YOSUWA 18

¹Tokŋa vi sa Israyel kaf dak hay Silo; nisi col guɗuk ma fi-tuwna ɗawni. Nagata ay sliy kisiya.

²Jafna vi sa Israyella sa bay fi ir vocota visi tuwana hini siɗiya.

³Yosuwa di tam sa Israyella: Nagata ta Ma-Vatɗina Lawna vi sumaygi vulgita, nigi min li muray ta'a kayni, nigi ma tuɗ sla'a lancitige?

⁴Vilekgi sumun ɦidi kuɗ jafna jafna, nan min cuksi sunu. Nisi ma yaw kulo'o, ma ŋuy nagata, nisi ma ɓuraw nagata dig vocota visiya, bugolda nisi ma hotay tanu.

⁵Nisi ma ɓuraw nagata ir siɗiya; jafna vi Yuda ma lak hay jaara visiya hay gal ma kayamna, jafna vi Yosef ma lak hay jaara visiya hay gal ma gaana may.

⁶Nigi hayɗini, nigi ma ɓuraw nagat goy ir siɗiya, nigi ma maran ɓuraw na'ta tani, nan ma li ŋaɓta kuɗ ɦayta tani kigiya vok ir Ma-Vatɗina Lawna vaya.

⁷May sa Levitna ir ɓurawta visiya may jargi noŋɗi, kay ɗifinna vi Ma-Vatɗina kayni mi vocota visiya; jafna vi Gad hiɗi Ruben, hiɗi gal-jafna vi Manase, ir ɓurawta visiya, Musus sa ma sunda vi Ma-Vatɗina vulsitawa goy gal hena vi niy-lumna Yordan hay gal kuɗuwu.

⁸Sum nisin yaw kulo'o, nisi kala. Yosuwa vul hagata tam nisi sa kal li ɓurawta vi nagat ala: Tuɗgiya, ŋuygi nagata, ligi ɓurawta vi nagat goyo, bugolda nigi ma hotay tanu, bugol kayni nan ma li ŋaɓta kuɗ ɦayta kigiya vok ir Ma-Vatɗina hay Silo.

⁹Sumun kayni kaliya, nisi ŋuy nagata, nisi ɗo naga na'ta gaa hay ɗerwella hiɗi ira' kaay goy siɗiya, kuɗ hoyok-ziyna hoyok-ziyna; bugolda nisi hotay kat Yosuwa hay kaŋŋa, hay Silo.

¹⁰Yosuwa li ŋaɓta kuɗ ɦayta kisiya hay Silo vok ir Ma-Vatɗina, nam ɓuraw nagat goyo jar sa Israyella, kuɗ ŋaɓta visiya.

¹¹Nagata vi jafna vi gurona vi Benyamin ɓuraway kayn kuɗ vuɗna visiya visiya. Jaar nagata visiya ka jar gurona vi Yuda hiɗi gurona vi Yosef.

¹²Hay gal ma gaana, jaara visi fokis hay Yordan pa, nam jik kat Yeriko hay gala' gaa'a, jik kulo hay hiɗiyta gal vulatiya kay co goy kat fulda vi Bet-Aven.

¹³Jaara jikis ɗawni hay Luz pa, jik kat Luz, ta ya' Betel hay gal kayami, nam jik hay Atarot-Addar, kulo kay hiɗiyna ma ka gal kayami vi Bet-Horon ta gaata.

¹⁴Hay gal ma vulatina, jaara hot ŋuy kat niy-lum ma ŋolla gal kayami, fokay kat hiɗiyta ta ka ɗiger vok Bet-Horon hay gal kayami, co kat Kiryat-Baal, ta ya' ala Kiryat-Yeyarim, hoyok-ziyna vi gurona vi Yuda, kayni mi gal ma vulatina.

¹⁵Galla ma kayamna fokay hay sin Kiryat-Yeyarim pa, jaara co gal vulatiya, nam co kat niy ma jaŋ hay Neftowana.

¹⁶Jaara jik goy hay sin hiɗiyta ta ka ɗiger vok lokŋa vi Ben-Hinnom, hay lokŋa vi sa Refayimna hay gal gaa'a. nam jik kat lokŋa vi Hinnom, kat sa Yebusiyena hay gal kayami, jik ta-ta hay Eyin-Rogel.

¹⁷Nam hot ŋuy gal gaa'a, co kat Eyin-Semes, lo hay Gelilo, ta ka ɗiger vok ɗiŋiriŋŋa vi Adumim, bugolda nam jik kat hiɗiyta vi Bohan, goora vi Ruben.

¹⁸Nam jik hay gal ma gaana vi hiɗiyta ta ka vok fulda, bugolda jik hay fulda,

¹⁹bugolda jaara jik hay gal ma gaana vi Bet-Hogla, kay co oy sin niy-lum ma mandana, hay gal ma gaana, hay vun niyn ma kus goyna vi Yordan gal kayami. Kayni mi jaara ma gal kayamna.

²⁰Hay gal ma kuɗuwna, Yordan ka hay jaara. Kayni ti vocota vi gurona vi Benyamin, kuɗ vuɗna vuɗna, hiɗi jaara visiya hay galam kafe.

²¹Hoyok-ziyna vi gurona vi Benyamin kuɗ vuɗna visi kaf kayni: Yeriko, Bet-Hogla, Emek-Ketsis,

²²Bet-Araba, Semarayim, Betel,

²³Avim, Para, Ofra;

²⁴Kefar-Amonay, Ofni hiɗi Geba; hoyok-ziy ma ŋulon doogo yam ma' hiɗi hoyok-ziy ma gurayna.

²⁵Gabawon, Rama, Beerot;

²⁶Mispe, Kefira, Motsa;

²⁷Rekem, Yirpeel, Tareyalla;

²⁸Sela, Helef, Yebus ta ya' Yerusalemta, Gilbeyat hiɗi Kiryat; hoyok-ziy ma ŋulon doogo yam fiɗi hiɗi ma gurayn lay. Kayni ti vocota vi gurona vi Benyamin kuɗ vuɗna visiya.