Read Masana YOSUWA 2 Bible Online

YOSUWA 2 - Masana bible

YOSUWA 2

¹Yosuwa goora vi Nun cuk sum sa ɗuw gul-liyn ma' goy ŋayaya hay Sittim, nam ka disi ala: Tuɗgi ɗuwgi nagat Yeriko. Nisi kaliya, nisi cuk hay ziyna vi cata gawlaŋga ya' Rahab, nisi bur vo va'a.

²Sumun co dit tam mul ma Yerikona ala: Sum sa Israyella co'ay tani hay henjeta kay ɗuw gul nagata.

³Ki kayn nala mul ma Yerikona gi sunda tam Rahab, nam ka di ta' ala: Sum sa co hay ziyna vagu, sa ka cuki kalaf vagŋa nak ma cuksiyay goyo, kay nisi co kayni kay fek nagata.

⁴May na' yaw sum nisin sa ma'na, na' ŋaysiya, na' ka di ala: Awa, sum nisin co hay ziyna van gasiya, may nan wi liyn ma nisi may hayam panɗi.

⁵Hay li ma liyn asawa kay duk vun-galan hay vulatita, sumun kayni cukay goyo, bay nan wi liyn ma nisi kal hayamna; jaŋgi kuɗsi koloyo, nala nigi ma fisiya.

⁶Dolay kayni, na' jiksi kulo kay yam-ziyna, na' ŋaysi jar zok-barawna ma na; molom kulo kay yam-ziyda va'a.

⁷Sumun kayni jaŋ kuɗsiya hay hagata vi Yordan, ta-ta hay liyn ma ɦaw kulona, hay li ma sumun kal jaŋ kuɗsiya, nisi duk vun-galana may.

⁸Jew a sa ɗuw gul-liyn bur gaa kayni, Rahab jik kulo katsiya hay yam-ziyna,

⁹na' di tisi ala: Nan wi ala Ma-Vatɗina vulgi hoyok-ziyn tanawa, narta ta kuɗgita nig gaa kuma'a, sum sa hay nagat tani kaf tuwsi ka visi bat-bat' kigiya.

¹⁰Kay numa humi ala Ma-Vatɗina so niy-lum ma slawna goy vokgiya, hay li ma nigi cukay goy hay Egipte pana, nanige nigi kol kay muliyan sa ma'na sa ka ti mulu goy bugol Yordan, Sihon hiɗi Og sa nigi cisi goyna.

¹¹Numa hum nala kayni, sutayma to'o, kursulit vat goy hay dikma'a, kay Ma-Vatɗina vigiya nam ka hay wuralawna, ɗaw kuloni! Nam ka hay nagat gaa tani kaw.

¹²Wulin kayni nigi ma yi va kigi vok Ma-Vatɗina, kay nan li ŋaat tigiya, nala nigi kaw ma li ŋaat tam jafna vanu, nigi ma vulan va ma li ɗek-goyta kepe.

¹³Bunu hiɗi sunu, ɓosiyon sa jufayna hiɗi sa boyna hiɗi sumuna visi kafe nigi ma cisi goyɗige!

¹⁴Nisi di ta'a: Numa ka goboyo kay hin tuwma mit kagu, la lawta ta nay juna' jarayt kayni nak may pata' dira' goyɗi. Hay li ma Ma-Vatɗina vulma nagat kaynawa, numa ma li ŋaata hiɗi ɗigerta tagu.

¹⁵Na' sirsi gaa hay ir-ziyda hiɗi zigewna, kay ziyda va'a ini kulo kat gulmunna. Na' musi kayni kat gulmunna.

¹⁶Na' di tisiya: Tuɗgi kulo kay hiɗiyta, la naɗi sa jaŋ kuɗgina ma figiya. Ŋaygi ɗaw goyni ir buur ɦidi, ta-ta nisi sa gargina ma hotay vo tuwa, bugol kayni nigi ma kala may.

¹⁷Sum nisina di ta'a: Kayni mi yal ma numa min ɗek tagu kay but tuwma goyo kay va ma numa yi kuma'na:

¹⁸Hay li ma numa coyawa hay nagata, zigew ma slawn kayni nak ma junum kulo'o hay ir-ziyda ta nak sirma ay gaa haya' pata, bugolda bugu, sugu, ɓosiyokŋa hiɗi jafna vag noŋ kaf nak ma toksiyay katagu.

¹⁹La gigekaw kaliyawa goy hay vun-ziyna kay kal goyo, busuwam kay tuwamu, numa segena lawta vuma mayɗi, may sum sa kalaf katag hay ziyna, la numa tun ɓuma tam mara kep jarsiya, busuwam ma tun kuma'a.

²⁰Law ma nay junum jarayn kayni la nak patam diramawa goyo, va ma numa yum kumana as tun kuma loɗi.

²¹Na' di'e: Van ma li'e ki nay di slen jar-tuway nala. Na' gisi irsiya, nisi kaliya. Na' jun zigew ma slawna hay ir-ziyda.

²²Nisi kaliya, nisi lak kulo kay hiɗiyta ir buur ɦidi, ta-ta sa garsina hotay tuwa. Sa garsina gar hay hagat ta-ta may fisiɗi.

²³Sum nisi sa ma'na jikay gaa kay hiɗiyna, nisi ɦaw Yordan kulo'o may. Nisi co kat Yosuwa, goora vi Nun, nisi vum labara kay slen ma li tisina kaf.

²⁴Nisi di tam Yosuwa: Gasi wete, Ma-Vatɗina vul nagat kaynawa kafe hay ɓaya, sum sa hay nagatna kaw tuwsi ka visi bat-bat' vokaya.