Read Masana YOSUWA 23 Bible Online

YOSUWA 23 - Masana bible

YOSUWA 23

¹Liyn kali ŋolo bugol buur ma Ma-vatɗina vul tun-sukka mi sa Israyella goy hay ɓam sa gawt kisina, sa ŋuyi galsina. Yosuwa kaw muɗi maari, busata valam kali ŋolo.

²Yosuwa yi sa Israyel talam kaf, sa maariyana valamu, sa ŋulona valamu, sa ka kitana hiɗi sa ŋulona vi sojena valamu. Nam disiya: Nan muɗi maari, busata van kaliya.

³Nigiya, va ma Ma-Vatɗina Lawna vigiya lum tam sum nisin lakŋi kaf kuɗgi nigiya nigi wum kafe; kay Ma-Vatɗina Lawna vigiya dur hay baŋalgiya mi namu.

⁴Ɗuwgiya, sum sa nigi bay sli nagata visi tuwana nan ŋaɓ nagata visi kuɗ ɦayta kay vulgita, hay vun Yordan pa, hiɗi jaf-sum sa nan vatsi goyn kaf, ta-ta tam niy-lum ma ŋolla hay liy ma fatta ɗig gaana.

⁵Ma-Vatɗina Lawna vigiya ma digiɗsi goy vokgiya, nigi ma vurna hay baŋalsiya, ki Ma-Vatɗina Lawna vigiya di tigi nala.

⁶Nigi ma li tuwgi dono'o kay li kuɗ vun-ma-gatna, kay ŋom slen kaf ma ka ɗoy hay ɗerwelda vi gatta vi Musus, nigi ma cal goy jufɗi, cal goy gulɗi kaw,

⁷kay rigas tuwgi hiɗi jaf-sum sa ka laki hiɗi nigi tannaɗi. Nigi ma yi sem lawayna visi kulo hay vungiɗi, yi va kigi hiɗi semda valamɗi kaw; nigi ma sun lawayna visiɗi, girif gaa vokomɗi kaw.

⁸May nigi ma jun tuwgi tam Ma-vatɗina Lawna vigiya, ki nigi ka li'e ta-ta vaydi nala.

⁹Jaf-sum sa ŋolo, sa dono'o kaw, Ma-Vatɗina digiɗsi vokgiya; ta-ta vaydi kaw sa ma as col dikgi mayɗi.

¹⁰San kep jargi digiɗ sum birimi, kay Ma-Vatɗina Lawna vigiya ka dur hay baŋalgiya, ki nam di nala.

¹¹Ligi ŋal mi tuwgi ŋaa'a, mingi Ma-Vatɗina Lawna vigiya.

¹²La nigi cal goyo, la nigi jun tuwgi tam jaf-sum segen sa ka galgin lakŋi, la nigi tun slita jargiya hiɗi nisiya, la nigi rigas hiɗi nigiya,

¹³wigi goy ŋaa'a ala ma-Vatɗina Lawna vigiya ma digiɗ jaf-sum nisin vokgi dok-dokɗi; may nisi ma lak vokgiya ki dena hiɗi jawta ta ganayt nala, ki libetna ma watgi kuɗgiya hiɗi zigiyna ma jikgi kirgi nala, ta-ta nigi ma vat goyo hay nagat na'ta ta ŋaata ta Ma-vatɗina Lawna vigiya vulgiya.

¹⁴Ɗuwgiya, vaydi nan min tuɗ hay hagata ta sum sa hay nagat kaf ka jik haya'ta, vaydi hay dikgi kaf, hay ciwta vigi kaf nigi ma wi ala, yoboyna ma Ma-Vatɗina Lawna vigiya dum tigi kafna, vunam hobay kafe, mara kep kaw hin goy bay vunam hobɗi.

¹⁵Awa, ŋaa'a! Ki yoboyn ma ŋaana ma Ma-Vatɗina Lawna vigi dum kigina vunam hob kulo'o nala, yoboy ma joona ma nam dum kigina kaw vunam ma hob kulo'o, ta-ta nam ma vatgi goyo, gaa kay nagat na'ta ŋaata ta nam vulgit kayni kafe.

¹⁶La bonota ta Ma-Vatɗina vigi juna' hiɗi nigit kayni nigi noya' goyo, la nigi tuɗ girif lawayn mara'a, sunumu kaw, ɦiyda vi Ma-Vatɗina ma fok kulo katgiya, nigi kaf ma vat goyo hay nagata ŋaata na'ta ta nam vulgiya.