Read Masana YOSUWA 24 Bible Online

YOSUWA 24 - Masana bible

YOSUWA 24

¹Yosuwa tok jafna vi sa Israyel kaf hay Sikem, nam yi sa maariyana vi sa Israyella, sa ŋulona valamu, sa ka kitata hiɗi sa ŋulona vi sojena; nisi co vok Lawna.

²Yosuwa di tam sumun kaf ala: Humgi va ma Ma-Vatɗina Lawna vi Israyel di'e: Sumaygiya, Terak, bum Abraham hiɗi bum Nakor ziyna visi ay jew kayni, goy bugol niy-lumna, nisi girifim kayni mi lawayn mara'a.

³Bugi Abraham nan vumi goy hay gal hena vi niy-lumna pa, nan ŋuyum hay nagata Kanaan kaf, nan biya jafna valamu, nan vulum Isaak.

⁴Isaak nan vulum Yakub hiɗi Esaw. Hiɗiyta Seyir nan vula' mi Esaw. May Yakub hiɗi gurona valamu kali hay Egipte.

⁵Nan cuk Musus hiɗi Aaron ay hay Egipte, nan vat sum sa Egiptena hiɗi slen ma nan lum jarsiya; bugolda nan kalgi ay goyo.

⁶Sumaygiya nan kalsi ay goy hay Egipte, nigi co kat niy-lumna. sum sa Egiptena jaŋay kuɗ sumaygiya kel niy-lum ma slawna hiɗi kulumayna, hiɗi keke-ma-duura kaw.

⁷Sumaygi siwel tam Ma-Vatɗina, nala nam gi jufunda jargiya hiɗi sum sa Egiptena, nam kuluɓ vun niyn gaa kisiya, niyna ɗubsi gaa'a. Slen ma nan lum kat sum sa Egiptena irgi wumawa. Nigi mus hay fulda ir busat ŋolo.

⁸Nan tuɗgi hay nagat vi sum sa Amoriyana, sa ka goy gal hena vi Yordan, nisi durgiya, may nan vulsi hay ɓigiya; nigi sli nagata visiya, nan vatsi goy vokgi kirɓicik'.

⁹Balak, goora vi Sippor, mulla vi Mowab, fokay kulo'o, nam dur sa Israyella, nam yi Balaam goora vi Bewor aya kay nam ma beɗgiya,

¹⁰May nan min hum Balaamɗi, nam ga' kigi kayni ti bolda hay', nala nan butgi goyo hay ɓam Balak.

¹¹Nigi ɦaw Yordan kulo'o, nigi co hay Yeriko. Sumay nagata Yeriko durgiya, sa Amoriyana, sa Feresiyena, sa Kanaaniyana, sa Hititna, sa Girgasiyena, sa Heviyena hiɗi sa Yebusiyena, nan vulsi hay ɓigiya,

¹²nan gi ir zlekezlekŋa vokgiya, nan digiɗsi goy gine'e vok irgiya, kayni si muliyana sa ma'na vi sa Amoriyana, nigi digiɗsi kayni may hiɗi kew-gaferaŋaɗi, hiɗi ɓarawtaɗi kaw.

¹³Nan vulgi nagata ta nigi may mak tuwgi ka'ɗi, hoyok-ziyna ma nigi may inimɗi may nigi ka laki haya, gulda-guldana hiɗi olive ma nigi may pumɗi, may nigi ka tumu.

¹⁴Wulin kayni nigi ma li nar kuɗ Ma-Vatɗina, sungit hiɗi gasita hiɗi ɗigerta, lawayn ma sumaygi sunum ay goy hay gal hena vi niy-lumna hiɗi Egipte nigi ma cukum goyo, sungit mi Ma-vatɗina.

¹⁵La nigi may var kay sun Ma-vatɗinɗi, vaydi vilekgi sa ma nigi min sunumna: La mi lawayna ma sumaygi sunum ay goy bugol niy-lumna, lebo mi lawayna vi sa Amoriyana hay nagata ta nigi ka laki haya' wulini. Nanu hiɗi ziyna vanu numa min sun Ma-Vatɗina.

¹⁶Sumun ka hot dit ala: Kay noy Ma-Vatɗin goyo a sun lawayn mara'a kayni gine kuma'a.

¹⁷Kay Ma-Vatɗina nam mi Lawna vuma'a, namu mi ma kalma ay goy hay nagata Egipte pa, hay ziyn ma gorvota, numa'a hiɗi sumayma'a, namu mi ma li ɗekka ŋolda na'ta kayni kirma'a, ma ŋomma aya hay hagata ta numa jik haya' kafta, goy jar sum sa numa jikay hay nagata visi kafna kaw.

¹⁸Sum sa Amoriyana, sa ka li ziy hay nagat tani, hiɗi sum segen kaw nam digiɗsi goy vokma kafe. Nala numa kaw numa min sun Ma-Vatɗina, kay namu mi Lawna vuma'a.

¹⁹Yosuwa di tam sa Israyella: Nigi may asay kay sun Ma-Vatɗinɗi, kay namu mi Lawna ma peldete, namu mi Lawna ma hunaya, nam vul gida kay joota hiɗi sulukŋa vigiɗi.

²⁰Hay li ma nigi noy Ma-vatɗin goyo kay tun caw sun lawayn mara'a ma pulu, nam ma muɗ kigiya kay ligi joo'o, nam ma vatgi goyo bugol nam ligi ŋaa lina.

²¹Nisi di tam Yosuwa: A'a, numa sunum mi Ma-Vatɗina.

²²Yosuwa di tam sa Israyella: Nigi kay tuwgiya li di-goytawa kay tuwgiya ala nigi vilek Ma-vatɗinawa kay sunumu. Nisi hot dit ala: Awa, numa li di-goytawa kay tuwma'a.

²³Wulin kayni lawayn ma pulla ma ka jargina nigi ma patam goyo, hotgi yigi gaa vok Ma-Vatɗina, Lawna vi Israyel.

²⁴Nisi di tam Yosuwa: Numa min sun Ma-vatɗina Lawna vuma'a, numa min hum kuɗ dita valamu.

²⁵Hay buur na'ta Yosuwa jun bonot hiɗi nisiya, nam vulsi ɗota hiɗi gatta ta colita hay Sikem.

²⁶Slen namna Yosuwa ɗom hay ɗerwelda vi gatta vi Lawna, nam sli hiɗiy ma ŋolla, nam colom gaa kuɗ gu-ma'asna ma ka hay liyn ma peldetna vi Ma-Vatɗina.

²⁷Yosuwa di tam sumun kaf ala: Hiɗiyt zawni ti di-goyta jaraya, kay yoboy ma Ma-Vatɗina lawam hiɗi nay kafna na' humumawa, na' ma li di-goyt kigiya, kay a yigi ma jok Lawna vigiɗi.

²⁸Bugol kayni Yosuwa gi ir sumuna, gigekaw hay nagata valamu valamu.

²⁹Bugol slen kayni, Yosuwa goora vi Nun ma sunda vi Ma-Vatɗina mitiya, busata valam asay kis kalam doogo.

³⁰Nisi pum hay nagata ta vocota valamu, hay Timnat-Sera, hay hiɗiyt Efrayim, gal gaa vi hiɗiyt Gaas.

³¹Sa Israyella sun Ma-Vatɗina hay buur ma irita vi Yosuwa kafe, hay buur ma irita vi sa maariyana sa hin bugol Yosuwa, sa wi slen ma Ma-Vatɗina lum tam sa Israyella kafna kaw.

³²Zokŋa vi Yosef,[12] ma sum sa Israyella yawamay goy hay Egipte pana, nisi pum hay Sikem, hay nagata ta Yakub gusa' hay ɓam gurona vi Hamor bum Sikem, ir gurjut ta ɗeŋga kis. Kayni tapay jar vocota vi gurona vi Yosef.

³³Eliyazar goora vi Aaron mita, nisi pum kulo kay hiɗiyta vi goora valamu Fineyas. Nisi vulumti kayni kulo kay hiɗiyna vi Efrayim.