Read Masana YOSUWA 3 Bible Online

YOSUWA 3 - Masana bible

YOSUWA 3

¹Yosuwa fok kulo graw culum, fokis hay Sittim pa, nisi co kel Yordan, namu hiɗi sa Israyel kaf, nisi bur ɗawni jew a nisi ɦaw kulo'o.

²Hay li ma buur ɦidi vatawana, soje sa ŋulona ŋuy kaŋŋa,

³nisi vul dit tam sumuna ala: hay li ma irgi wi timgilla vi bonota vi Bum-Sumuna Lawna vigiyawa, hay li ma muliyan-sa-ɗifinna hiɗi sa Levitna ka ziyimu ni, nigi ma yawis hay liyn ma nigi laki hayamna pa, nigi ma tuɗ bugolomu.

⁴May nigi ma hin jargi goy ir goldoŋ birim ma', tuɗgi kulo tam timgilla goboyɗi, ki kayn nala nigi ma wi hagata ta nigi ma jik haya'ta, kay nigi bay jik hay hagat kayni sem kep tuwa.

⁵Yosuwa di tam sumuna: Ligi tuwgi goy peldete, kay jifini Ma-Vatɗina ma li ɗekka jargiya.

⁶Yosuwa di tam muliyan-sa-ɗifinna: Sligi timgilla vi bonota, tuɗgis vok sumuna. Nisi sli timgilla vi bonota, tuni vok sumuna may.

⁷Ma-Vatɗina di tam Yosuwa: Vaydi nan tun caw muɗaŋ ŋolo vok ir sa Israyella kaf, kay nisi ma wi ala nan ka hiɗi naŋ kaw ki nan li ay hiɗi Musus nala.

⁸Naŋ ma vul dit tam muliyan-sa-ɗifinna sa ka ziy timgilla vi bonota ala: Hay li ma nigi coowa kel niy-lumna Yordan, nigi ma lak hay niy-lumna Yordan.

⁹Yosuwa di tam sa Israyella kaf ala: Nigiyay tani, humgi yoboyna vi Ma-Vatɗina Lawna vigiya.

¹⁰Yosuwa di'e: hiɗi kayni nigi ma wi ala Lawn ma irina ka jargiya, sum sa Kanaaniyan kaf nam ma digiɗsi vokgiya, sa Hititna, sa Feresiyena, sa Girgasiyena, sa Amoriyana, sa Yebusiyena kaw.

¹¹Wulini timgilla vi bonota vi Bum-Sumuna ma li nagat kafna ka ɦaw Yordan kulo vokgiya.

¹²Wulin kayni yawgi sumun doogo yam ma' jar jafna vi Israyel kafe. Sa kep kuɗ jafna jafna.

¹³Hay li ma muliyan-sa-ɗifinna sa ziy timgilla vi Ma-Vatɗina, Bum-Sumuna ma li nagat kafna, tun sesiyawa hay niy-lumna Yordan, niy-lumna Yordan jaram ma ka goyo, niyn ma jaŋay hay gal kayam pana, nam ma col yam tuwam kepe.

¹⁴Hay li ma sumun cukay goy hay guɗukŋa visi pa kay ɦaw Yordan kulo'o, muliyan-sa-ɗifinna sa ziy timgilla vi bonota tun vok sumuna.

¹⁵Hay li ma sa ziy timgilla co hay Yordan, hay li ma sesi jiyob goloŋ kayni -- Hay na'ta niy-lumna Yordan ka hobay ŋolo, kay kayni mi liyna vi feɗna. --

¹⁶niyn ma may kayam pana cola, nam tok kulo yam tuwamu, goy gine'e hiɗi hoyok-ziyn Adam ma ka goboy hiɗi Sartan, hiɗi nam ma jik gaa'a hay galla vi niy-lumna Araba, niy-lum ma Mandana, jaram ka goy kafe. Sumun ɦaw kulo kayni ɗiger vok Yeriko.

¹⁷Muliyan-sa-ɗifinna sa ka ziy timgilla vi bonota vi Bum-Sumuna niy ma gaa sesina so goyo, nisi hin laki goy way Yordan hiɗi nagat gaa kuɗsi soy goyo. Sum sa Israyel kaf ɦaw kulo'o hiɗi niyn gaa sesi goy soya. ta-ta nisi ɦaw Yordan kulo kafe.