Read Masana YOSUWA 7 Bible Online

YOSUWA 7 - Masana bible

YOSUWA 7

¹Gurona vi Israyel li suluku kat sle ma telayna: Akan goora vi Karmi, goora vi Zabdi, goora vi Zerak hay jafna vi Yuda, nam yaw kuɗ sle ma telayna. Ki kayn nala Ma-Vatɗina dikam ɓulak ŋolo kat sa Israyella.

²Hay Yeriko pa Yosuwa cuk sumun hay Ay ta ka goboy hiɗi Bet-Aven, hay gal ma kuɗuwna vi Betel. Nam disiya: Tuɗgi fekgi nagata. Nisi kaliya nisi fek nagata.

³Nisi hotay kat Yosuwa nisi dumu: Sumuna kaf may tuɗ ɗawnɗi, la sumun tuɗ birim ma' lebo ɦidi kaw nisi as sli Ay. Vul makka mi sumun kafɗi, kay sum sa gawta nisi kiɗaya.

⁴Sumun kali ir birim ɦidi nala, may nisi muni jaŋi vok sum sa hay Ay.

⁵Sum sa hay Ayna ci sumun kuɗsi dok-ɦidi yam karkiya, nisi digiɗsi ay hay vun-galana vi hoyok-ziyn pa ta-ta hay Sebarim, nisi cisi kayn hay liyn ma jik gaa hay beɗna. Sumun sa Israyella sutaysi to'o, dono ma tisin vat goyo.

⁶Yosuwa jet sligara valam ma talamna goyo, koɗ hayam gaa vok timgilla vi Ma-Vatɗina ta-ta hay vulatita hiɗi sa maariyana vi sa Israyel kafe, nisi ko butuwn kulo kisiya.

⁷Yosuwa di'e: Hi! Bum-Sumuna Ma-vatɗina, naŋ zutma'aya kay numa ɦaw Yordan kulo'o a vulma hay ɓam sa Amoriyana kay nisi ma vatma goyo nala kay mige? Lali numa hin hini ay goy gal hena vi niy-lumna Yordan kayni ŋaa'a kuma'a.

⁸Wulin kayni Bum-Sumuna, nan ma dum ɗawni mi mige? Kay sa Israyella muɗ ŋorsiyawa mi sa gawt kisina!

⁹Hay li ma sum sa Kanaaniyana hiɗi sum sa nagat kaf hum labar kaynawa, nisi ɗawn ma ŋuyma cusl', ma ɦasma sema goy hay nagata. Nala naŋ ma li linige hiɗi semda vaŋ ta ŋol na'ta?

¹⁰Ma-Vatɗina di tam Yosuwa: Fokaŋ kulo'o, naŋ koɗ hayaŋ gaa lo kay mige?

¹¹Sum sa Israyella li sulukawa, bonota ta nan juna' hiɗi nisita nisi kusa'awa, awa, nisi yaw kuɗ sle ma telayna, nisi capay kulum noŋo, nisi capay ŋay slena, piy gaa jar slena visi noŋo.

¹²Sum sa Israyella as lak kulo vok sa gawt kisinaɗi. Nisi ma muɗ ŋorsi mi sa gawt kisina, kay nisi kay tuwsi kaw muɗi si sum sa telayna. Nan as mus hiɗi nigi loɗi, la slen ma telayna jargiya nigi may ɓulakam goyɗi.

¹³Fokaŋ kulo'o, laŋ sumun goy peldete: Naŋ ma disi ala nisi ma li tuwsi goy peldete kay fatta grawta. Kay Ma-Vatɗina ka di ala: Slen ma telayna ka jargiya, nigi sa Israyella, nigi as col kulo vok sa gawt kiginɗi, la slen ma telayna jargiya nigi may ɓulakam goyɗi.

¹⁴Nigi ma co tani hay graw culumta, kuɗ jafna jafna, jafna ma Ma-Vatɗina vilekemawana ma jik vokanu kuɗ vuɗna vuɗna. Vuɗna ma Ma-Vatɗina vilekemawana ma co kuɗ ziyna ziyna, ziyna ma Ma-Vatɗina vilekemawana ma co kuɗ bum-ziyna bum-ziyna.

¹⁵Sa ma ŋaɓta nigawa kalam ala li va ma telayn mi namu ni, sa namna ma gum hay kuta, namu hiɗi sa falamna noŋ kafe, kay nam ɓulak bonota hiɗi Ma-Vatɗina, kay nam li law ma telayna hay Israyel.

¹⁶Yosuwa fok kulo graw culum culum, nam jik sa Israyel vokomu kuɗ jafna visiya visiya. Ŋaɓta nig kay jafna vi Yuda.

¹⁷Nam jik jafna vi Yuda vokomu, ŋaɓta nig kay vuɗna vi Zerak, nam mar vuɗna vi Zerak vokomu, kuɗ bum-ziyna bum-ziyna Ŋaɓta nig kay Zabdi.

¹⁸Nam jik sumay ziyn vokomu. Ki kayn nala ŋaɓta nig kay Akan, goora vi Karmi, goora vi Zabdi, goora vi Zerak, hay jafna vi Yuda.

¹⁹Yosuwa di tam Akan: Goora vanu, vulaŋ suburta tam Ma-Vatɗina, Lawna vi Israyel, tiyaŋgi selemu; dan goyo kay va ma naŋ lumna, ŋayanɗi.

²⁰Akan hot dit tam Yosuwa ala: Gasiya, li suluk kat Ma-Vatɗina Lawna vi Israyel kayn mi nanu. Nan min ɗekgi goy haraŋi kay slen ma nan lumna:

²¹Jar sle ma tum ɓuraŋŋa, iran cuk kay sligar-tuwna vi Sineyar[4] mara kep jifiyam suwiya, hiɗi gurjuta ir sikel* kis-ma', hiɗi or ma mokayna kep ma nekka valamu ir sikel* dok-vasl, dikan daramu, nala nan yawamu; wulini nam ka piy kan gaa kuɗ nagata, way guɗukŋa, gurjut ka piy gaa kuɗum may.

²²Yosuwa cuk sumun jaŋi hay guɗukŋa valamu. Nam ka ŋayay hay guɗukŋa valam gasiya, gurjut ka piy gaa kuɗumu may.

²³Nisi patamay kulo hay guɗukŋa pa, maram tam Yosuwa hiɗi sa Israyella kafe, nisi kom gaa vok Ma-Vatɗina.

²⁴Yosuwa vi Akan goora vi Zerak, nam yaw sligar-tuwna, hiɗi or ma mokayna, gurona vi Akan, sa jufayna hiɗi sa boyna, luwayna, kurona, fukunayna, guɗukŋa valamu hiɗi slena valam kaf. Sumun sa Israyel kaf tap hiɗi Yosuwa, nisi kalam hay lokŋa vi Akor.

²⁵Yosuwa di'e: Naŋ luma jootawa sem ŋolo. Vaydi kaw Ma-Vatɗina ma laŋ naŋ joo lay. Sum sa Israyel kaf gum hiɗi goorhoyona. Nisi cum goyo, ŋalam goyo kaw.

²⁶Nisi mol hiɗiyn kulo kalamu, hiɗiy namna ka dok-doko. Ki kayn nala Ma-Vatɗina hotay bugolomu tam ɦiyda valamu. Kuɗ na'ta ta-ta vaydi liy namna yum ala lokŋa vi Akor.