Read Masana YOSUWA 8 Bible Online

YOSUWA 8 - Masana bible

YOSUWA 8

¹Ma-Vatɗina di tam Yosuwa: Naŋ ma li narɗi, tuwaŋ ma vaŋ bat-batɗi, yawaŋ sum sa wi duura kuɗaŋu, fokaŋ kulo'o, tuɗaŋ duraŋ Ay. Ɗuwaŋu, mulla vi Ay hiɗi hoyok-ziyna valamu nan vulsi hay ɓaŋu, hiɗi nagata valam kaf nan vulsiyawa hay ɓaŋu.

²Naŋ ma li tam Ay hiɗi mulla va'a ki naŋ li tam Yeriko hiɗi mulla va' nala kaw. May jakŋa hiɗi farayna nigi ma tum ɓuraŋi. Naŋu naŋ ma bar sum sara goyo ŋor ziyna.

³Yosuwa fok kulo'o hiɗi sum sa duur kaf kay tuɗ dur Ay, nam yaw sum sa jufayna birim dok-ɦidi, gisi irsi hay henjeta,

⁴nam ka di tisi ala: Ligi narɗi, bargi goyo ŋor hoyok-ziyna, tuɗgi goy tam hoyok-ziyn gineɗi, lakgi jigere.

⁵May nanu hiɗi sum sa ka kuɗanna, numa ma tuɗ kulo kat hoyok-ziyn goboyo, hay li ma nisi cukiyawa goyo kay ŋafma irma ki jew nala, numa ma mun voksi jaŋi.

⁶Nisi ma cukay goy kuɗma'a kay digiɗma'a, hay na'ta numa ma jasi jarsi goy hiɗi hoyok-ziyna, hay nata nisi ma di'e: Yawwa! Wulini nisi ka jaŋ vokaya ki ma jewn nala lo. Nala numa ma mun jaŋi voksiya.

⁷Nala nigi ma munay goy jaŋi hay liyn ma nigi baray hayamna pa, nigi ma sli hoyok-ziyna, Ma-Vatɗina Lawna vigiya ma vul hoyok-ziyn hay ɓigiya.

⁸Hay li ma nigi sli hoyok-ziynawa, nigi ma do kut kuɗumu, nigi ma li kuɗ yoboyna vi Ma-Vatɗina. Ligi ŋali, nigi ma huma' kayni ti dita vanu.

⁹Yosuwa cuksiya, nisi kal hay liyn ma nisi bur hayna, nisi lak jar Betel hiɗi Ay. Hay henjet na'ta Yosuwa bur jar sumuna.

¹⁰Yosuwa fok kulo graw culum culum, nam ŋaɓ sumun goyo. Namu hiɗi sa maariyana vi sa Israyella tuni vok sumuna, nisi kali hay Ay.

¹¹Sum sa wi duura sa ka hiɗi namna kali kulo goboy tam Ay; hay li ma nisi co vok hoyok-ziyna, nisi tun kaŋŋa hay gal ma gaana vi Ay, lokŋa ka jarsiya hiɗi Ay.

¹²Yosuwa yaw sumun birim vasl, nam cuksi kay nisi tuɗ bar goy jar Betel hiɗi Ay, hay gal ma vulatina vi hoyok-ziyna.

¹³Hay li ma Yosuwa tun sumun goy hay vokŋa, hay gal ma gaana vi hoyok-ziyna, soje sa ŋoora hay gal ma vulatina vi hoyok-ziyna kaw, hay henjet na'ta nam kali goy jar lokŋa.

¹⁴Hay li ma mulla vi Ay wi kayni, namu hiɗi sumuna valamu li tuwsi koloyo kay fok kulo'o, hay li ma togolomna buwawa, sumun kaf cukay goyo kay dur sa Israyella, kay li duura ɗiger vok Araba. Nisi may wi ala soje segena ka baray goy bugolsiyaɗi.

¹⁵Yosuwa hiɗi sum sa kuɗumna kaf mun voksi jaŋi, nisi sli hagata ta hay fulda.

¹⁶Nisi siwel tam sum sa hay hoyok-ziyna kaf kay jaŋ kuɗsiya. Nisi jaŋ kuɗ Yosuwa ta-ta jarsi ja goy hiɗi hoyok-ziyna.

¹⁷Sum sa hay Ay hiɗi Betel kaf mara kep kaw hin kulo hay hoyok-ziyn noŋɗi, nisi kaf kali digiɗ sa Israyella, nisi hin vun-ziyn goy bay duka kaw, kay jaŋ kuɗ sa Israyella.

¹⁸Ma-Vatɗina di tam Yosuwa: Yakata vaŋ ta hay ɓaŋga kayni naŋ ma meɗa' sina' kir Ay, kay nan min vul Ay hay ɓaŋu. Nala nam meɗa' sina' kir Ay.

¹⁹Bugol kayni sum sa goy barayna cukay goyo hay liyna visi pa, fokay jaŋi kat hoyok-ziyna, kayni hay li ma Yosuwa meɗ yakata valam kulona kaw. Nisi co kulo hay hoyok-ziyna, nisi slumu, nisi do kut kuɗum koloyo.

²⁰Sum sa hay Ayna muɗ irsi ŋorsi kayni, nisi wi nukŋa vi hoyok-ziyna ka pati ta-ta kulo dukalawna, nisi may fi liyn ma nisi pir hayamna noŋɗi. Sa Israyella sa ka jaŋ hay galla vi fulda muɗ irsi ay kat sa digiɗsina.

²¹Hay li ma Yosuwa hiɗi sa Israyella kaf wi ala sum sa goy barayna sli hoyok-ziynawa, kay nukŋa ka pat kulo'o, nisi hotay bugolsiya, nisi ci sum sa Ayna.

²²Sum segena cukay goy hay hoyok-ziyn pa kay ŋafsi irsiya, nala sum sa Ayna wi kayni nisi ŋuyi cusl' kay sa Israyella, sara'a gal ɗawni, segena gal ɗawni may. Nisi cisiya ta-ta sa may pir goyɗi, sa may hinɗi kaw.

²³Nisi vi mulla vi Ay iriya, nisi maram tam Yosuwa.

²⁴Hay li ma sum sa Israyella ci sum sa hay Ay sa jaŋ kuɗsi hay fulda goy kafe, ta-ta sa cawna nisi cisi goy hiɗi kew-gaferaŋa kafe, sum sa Israyella hotay hay Ay kafe, sum sa hin kulo hay hoyok-ziyna nisi calsi goy hiɗi kew-gaferaŋa kafe.

²⁵Sum sa nisi cisi hay buur na'ta kafna, jufayna hiɗi boyna kaf, nisi noŋ pet birim doogo yam ma', sum sa ziyna visi hay Ay kafe.

²⁶Ɓam Yosuwa ma meɗay goy hiɗi yakana nam may hotom gaaɗi, ta-ta nisi vat sum sa hay Ay goy kafe tuwa.

²⁷May farayna hiɗi jak ma hay hoyok-ziyna kaf sum sa Israyella yawamu ki Ma-Vatɗin vulsi hagat nala.

²⁸Yosuwa ŋal Ay goyo, nam muɗa' yam-jono ma sa mus hayɗina ta-ta vaydi.

²⁹Nam ɓal mul ma Ayna kulo kat guna ta-ta hay vulatita, hay li ma fatta tun caw ɗika, Yosuwa vul hagata kay nisi ma jikim tuwamay gaa kay gun pa. Nisi gum tuwam hay vun-galana, nisi mol hiɗiyn kulo kalam ŋolo. Hiɗiy namna ka'a ta-ta vaydi.

³⁰Yosuwa in giwin-ma-ɗifinna tam Ma-Vatɗina Lawna vi Israyel, kulo kay hiɗiyt Ebal,

³¹kuɗ va ma Musus sa ma sunda vi Ma-Vatɗina dum tam sa Israyella, ki ɗoy hay ɗerwelda vi gatta vi Musus nala ala: giwin-ma-ɗifinna ma koti hiɗi hiɗiyna ma kaway may jiki jaramɗina.[5] Nisi li ɗifin ma ŋal-goyna tam Ma-Vatɗina, nisi li ɗifinna vi lop ma slugona kaw.

³²Gatta ta Musus ɗo'aysta, nisi hot ɗo' kulo kat hiɗiy namna, vok ir sa Israyel kafe.

³³Sum sa Israyel kaf, sa maariyana, sojena hiɗi sa ka kitata, ka zlaray kat timgilla kafe, sa pulla hiɗi sa vuɗina, nisi laki ɗiger vok muliyan-sa-ɗifinna sa ka ziy timgilla vi bonota vi Ma-Vatɗina, galla visi hay gal hiɗiyt Garizim, galla visi hena hay gal hiɗiyt Ebal, kuɗ va ma Musus sa ma sunda vi Ma-Vatɗina dumis ala nisi ma gi bol kay sa Israyella hay sem ma jewna.

³⁴Bugol kayni Yosuwa di yoboyna vi gatta goy kafe, bolda hiɗi be'da, kuɗ slen kaf ma ka ɗoy hay ɗerwelda vi gatta.[6]

³⁵Yoboy ma Musus ɗomisna Yosuwa jaŋam goy vok tokŋa vi Israyel kafe, vok boyna kafe, gurosgurayna hiɗi sum sa pulla sa ka jarsin kaf kaw. Mara kep kaw ma nam hinim bay jaŋam mayɗi.