Read Masana 2 TESALONIKŊA 1 Bible Online

2 TESALONIKŊA 1 - Masana bible

2 TESALONIKŊA 1

¹Paulus, Silvanus hiɗi Timotewus, tam sa viyna hay Tesalonika, hay Lawna Buya hiɗi Bum-Sumuna vaya Yesu Kristu:

²Lawna Bumna hiɗi Bum-Sumuna Yesu Kristu vulgi slugota tage.

³Ɓosiyonna, bal ka kuma'a kay gi deɓ mi Lawna dok-dok kigiya, kayni hay liyamu kaw, kay vida vigiya ka wula, minda vigi ta jar-tuwgita, ta sa hena la' kay segena ka muɗ ŋol suwa suwa.

⁴Lo numa ka subur tuwma kuɗgiya hay tapna vi Lawna, hay so'otta hiɗi vida vigiya, hay lasta hiɗi makka vigi kaf ma nigi ka vum tigina kaw.

⁵Kayni mi ɗekka kay kitata ɗigerta vi Lawna kigiya, a nigi ma li goy si sum sa nagay kay mulda vi Lawna, na'a ta nigi ka ci las ka'ta.

⁶Kay kayni ɗigere kir Lawna kay hot lasta kay nisi sa lasgiya,

⁷kay vulgi migi nigi sa fi lastawa, tun-sukka hiɗi numa'a kaw, hay li ma Bum-Sumuna Yesu ma vul tuwamay goy dukalawni pa hiɗi sunda sa gaŋeraŋa,

⁸goy jar sin-kuta ma tilekŋa, kay wurak joota vi nisi sa wi Lawnaɗi, hiɗi sa hum kuɗ labara ma firina gatta vi Bum-Sumuna Yesuɗina.

⁹Kitata ma nisi fum ɗawni mi ɓulakŋa ma vatɗina, goy gine vok ir Bum-Sumuna hiɗi gajijita vi donota valamu,

¹⁰hay li ma nam ma ma'a, hay buur na'ta ɗawni, nam ma fi suburta tam sa peldetna valamu, nam ma ɗuw jifiya kir sa viyna kaw; may nigiya, nigi vi kayn kuɗ di-goyta vuma'a.

¹¹Kay na'ta numa siɗaw dok-dok kigiya, kay Lawna vaya ma muɗgi nagay kay yita valamu, kay hob varta ŋaata haygiya, hiɗi gaŋeraŋ kaw, varta ŋaata vi minda valam kaf hiɗi lopna vi vida vigiya;

¹²kay semda vi Bum-Sumuna vaya Yesu ma fi gajijita haygiya, nigi hay namu kaw, kuɗ slugota vi Lawna vaya hiɗi Bum-Sumuna vaya Yesu Kristu.