Read Masana 2 TESALONIKŊA 2 Bible Online

2 TESALONIKŊA 2 - Masana bible

2 TESALONIKŊA 2

¹Ɓosiyonna, numa siɗawgiya kay mata vi Bum-Sumuna vaya Yesu Kristu hiɗi dakka vay talamu,

²hin tuwgi ge' gosoy hay varta ta ŋaata vigiɗi, li nar kay dit ma ŋusiyanɗi hay yoboyna lebo hay ɗerwel ma sum sara ɗomay tuma'a, ki buurta vi Bum-Sumuna ka coy wulini-wulini nalaɗi.

³Hin sa ɗutgi goyo hiɗi yal mara noŋɗi; kay hotta-goyta tam lawayn ma waana ma ma jewe, sa ma liwisna ma ɗek tuwam goy haraŋi, goora vi ba-goyta.

⁴Ma gawta ma sli yam tuwam kulo kay semda ma yum ala Lawna kafna hiɗi slen ma sa ma girifimna, ma tuɗ ta-ta mus hay tempella vi Lawna, di goy kay tuwam kaw ala nam mi Lawna.

⁵Humgi may gigi ala, hay li ma nan ay hiɗi nigiya, nan digi kay kayni ɗisu?

⁶Wulini kaw nigi wi va ma telemna goy ŋaa'a, a nam ɗek tuwam goy haraŋ hay liyna valamu.

⁷Kay wulini kayni, ŋayayta vi joota ka li lopo, may nam ma li goy puɗak ɗawn hay li ma nam ma telemna ram liynawa.

⁸Bugol kayni sa ma liwisna ma vul tuwam goy haraŋi, nam ma Bum-Sumuna (Yesu) ma ɓulakam goy hiɗi sukŋa vi vunamu, nam ma kirapam goyo kuɗ wileta vi mata valamu.

⁹Mata vi sa ma liwisna ma li ɗawn kuɗ gaŋeraŋa vi Satan, hiɗi ɗekka, hiɗi slen ma muɗ san ɦuyumna, hiɗi gul-yalda ma sinna kuɗ jafamu jafamu,

¹⁰hiɗi ɗutta vi bay-ɗigerta kaf kay nisi sa ka ba-goyna, kay nisi bay fi minda vi gasita tuwa kay nisi fi suɗ goyo.

¹¹Kuɗ kayni, Lawna gi gaŋeraŋa vi viyta-goyta kisiya, kay nisi vi kuɗ sinda,

¹²a nisi sa vi kuɗ gasitaɗi, may haysi firi kay bay-ɗigerta, nisi ma fi kitata.

¹³Kuma numa kayni, ɓosiyon sa Bum-Sumun mingi ŋolla, numa' as gi deɓ mi Lawna dok-dok kigiya, kay Lawna vilekgi goyo hay tun cawti pa kay su'da, hay lita goy peldetta vi Ŋusta, hay vida ta hay gasita kaw.

¹⁴Tam kayni lo, nam yigiyawa hay labara ma firina vuma'a, kay nigi ma fi gajijita vi Bum-Sumuna vaya Yesu Kristu.

¹⁵Kay na'ta kayni, ɓosiyonna, lakgi dono'o, vigi hatta ma numa' vulgitin kayn ŋaa'a, kay numa' laway tigiya hiɗi vunma'a, lebo hay ɗerwel kaw.

¹⁶Bum-Sumuna vaya Yesu Kristu kay tuwamu, hiɗi Lawna Buya, nam ma minayawa, ma vulay teŋ-irta ta vatɗita hiɗi cubta-sle'ta ŋaata kuɗ slugota valamu,

¹⁷nam ma vulgi teŋ-irta hay dikgiya, lakgi dono hay lopna hiɗi yoboyna ma ŋaana kafe.