Read Masana 2 TESALONIKŊA 3 Bible Online

2 TESALONIKŊA 3 - Masana bible

2 TESALONIKŊA 3

¹Ma hinin kayni, ɓosiyonna, siɗawgi kuma'a, a yoboyna vi Bum-Sumuna fi mer goyo, fi gajijita kaw, ki nam ka li jargiya nala,

²a numa ma fi butta-goyta kay sumuna sa bay-yalla hiɗi sa jiw-zlata; kay nisi kaf say hiɗi vidaɗi.

³May Bum-Sumuna nam ɗigere, nam ma vulgi donota, ma ŋomgi kay ma joona kaw.

⁴Numa tun vida vuma' hay Bum-Sumuna kigi ala nigi ka li'e, nigi ma lum ɗawn kaw mi va ma numa gat kalamna.

⁵Bum-Sumuna ɗiger dikgiya tam minda vi Lawna hiɗi cubta ŋalda vi Kristu ɗigerge.

⁶Ɓosiyonna, numa gatgi hay semda vi Bum-Sumuna Yesu Kristu, a nigi ma vi haygi goy jam tam ɓasuyn gigekaw ma poy hay zulomda, ma may poy hay gijum-gijumta, may kuɗ data ta nigi fum kuɗma' paɗita, tapgi hiɗi namɗi.

⁷Nigi kay tuwgi kaw wi ir nanige nigi fi sli kuɗma'a, kay numa poy jargi kayni may hay gijum-gijumtaɗi;

⁸Numa may ti funa vi sana ɦawaɗi; may hay lop ma ɦiɓiyna, numa li lop henjeta hiɗi falayta kay numa min mak sa kep jargiɗi.

⁹May kayn ala numa nagay kay sa vulma vaɗi, may naɗi, may numa min kayn kay ɗek tuwma' goy tigiya kay nigi sli kuɗma'a.

¹⁰Kay hay li ma numa ay hiɗi nigiya, numa gatgiya ala: La sa min li lopɗi hinim tiɗi kaw.

¹¹May numa ka hum ala sum sara jargiya ka poy hay gijum-gijumta, li va noŋɗi may slew tuwsi hay lawta vi segena may.

¹²Numa' di tam sum nisin kayni, numa' gatsi kaw hay Bum-Sumuna Yesu Kristu, ala nisi ma li lopna visi hiɗi ŋalda, tum mi funa visi kay tuwsiya kaw.

¹³Ɓosiyonna, ma figi nigin kayn ala hin tuwgi mak kay li slen ma ŋaanaɗi.

¹⁴La sa hum kuɗ va ma numa digita hay ɗerwelda kaynɗi, ɗuwgi san kayni ŋaa'a, tapgi hiɗi nam loɗi, kay nam ma fi muɗ zulo'o.

¹⁵Nigi ma ɗuwum ki sa ma gawta naɗi, may gatamu ki ɓasukin nala.

¹⁶Bum-Sumuna vi toyta kay tuwamu vulgi toyta hay liya'a hiɗi hagata va' pet vulge! Bum-Sumuna li hiɗi nigi kaf lige!

¹⁷gi-deɓta kayni mays hay ɓan nan Paulus pa. Tun ɓan gaa kuɗ ɗerwelda van kaf kayni mi nanu; kayni ti ɗota vanu.

¹⁸Slugota vi Bum-Sumuna vaya Yesu Kristu li hiɗi nigi kafge!