Read Masana 1 TIMOTEWUS 1 Bible Online

1 TIMOTEWUS 1 - Masana bible

1 TIMOTEWUS 1

¹Paulus apostolla vi Kristu Yesu, kuɗ vun-ma-gatna vi Lawna ma su'da vaya hiɗi Kristu Yesu ma nay ka cubum hiɗi sle'ta.

²Tam Timotewus goora vanu ma gasina hay vida, slugota, lamanda hiɗi toyta vi Lawna bumna pa, hiɗi Kristu Yesu, Bum-Sumuna vaya.

³Ki nan vulaŋ gatta hay li ma nan kal hay Makedoniya nala, kay naŋ ma mus hay Efesus kay gat sum sara'a a nisi ma hat hatta taraɗi,

⁴a nisi ma jun tuwsi tam ɗetna ma ɓa-ɓanɗi, hiɗi labara vi jafna ma yalam vatɗinɗi kaw, kay nam cani mar ci-wayta, may hin sumun wul kulo'o hay lopna vi Lawna hiɗi vidaɗi.

⁵May va ma ŋolla vi gatta na'ta kayni ti minda ta may goy hay dikga ta peldete, tap-wida ta ŋaata hiɗi vida ta bay mileta.

⁶Segena hay li ma nisi cal goyo, viy tuwsi goyo hay ɓak ma waana.

⁷Nisi min hat vun-ma-gatna goy tam sumuna, may nir-na'ta kepe nisi wi caw va ma nisi diɗi, sle ma nisi di awa kalamna, nisi wum cawamɗi kaw.

⁸Nay wi ala vun-ma-gatna kayni ŋaa'a, la sa li va ŋaa'a hiɗi namu hay liyamu,

⁹Nay wi kayn ala vun-ma-gatna may koti kay sa ɗigeraɗi, may kay sa ŋel vun-ma-gatna hiɗi sa hum kuɗ saɗina, kay sa jiw-zlata hiɗi sa sulukŋa, kay sa bay peldetna hiɗi sa liwisna, sa ci sumaysi goyna, sa ci-matna,

¹⁰sa li zlata-bulo'o, jufay sa bur tam tuwsiya, sa li filiw hiɗi sumuna,[1] sa ka sinda, sa ŋul sumuna, hiɗi sle hegen pet ma tap hiɗi hatta ta gasitɗi,

¹¹kuɗ labara ma firina ma gajijina vi Lawna ma sle'ta kalamna, labara ma firina ma nam vul tanu.

¹²Nan gi deɓe mi nam ma vulan donotawa, Kristu Yesu Bum-Sumuna vaya, kay nan ɗuw kiram nagaya hay li ma nam gan kay li sunda valamu,

¹³kay jewe nan mi sa ma ay ŋul semda valamu, sa ma las sumuna, sa ma waskayna kaw. May nam li slugota valamawa tanu, kay slen kayni nan lum hay bay-wida hiɗi bay-vida kaw.

¹⁴Slugota vi Bum-Sumuna vaya jorawa voka'a hiɗi vida, hiɗi minda ta hay Yesu Kristu.

¹⁵Kayni mi yoboyn ma gasina, ma nagay kay san vum kafe, ala Kristu ma hay nagat kayni kay suɗ sum sa sulukŋa, jarsiya nan mi ma suluk suw kafna.

¹⁶May nam li lamandawa tanu, kay hay nanu ma suluk suw kafna, Yesu Kristu ɗek ŋalda valam goy kafe, kay vul ɗekka tam nisi sa min vi hay namu kay fi irita vatɗita.

¹⁷Tam mul ma vatɗina, ma mitɗina, ma ir sa wumɗina, Lawn ma kepna, suburta hiɗi gajijita talamu ta-ta hay vatɗita vatɗita. Amen.

¹⁸Gatta kayni nan vul taŋu, naŋ goora vanu Timotewus, kuɗ vun-jobta ta di kaŋu jewe, kuɗ vun-jobta na'ta naŋ ma dur duura ma ŋaana,

¹⁹hay li ma naŋ ŋom vida hiɗi tap-wida ta ŋaata. Tap-wida na'ta segena noyo'awa goyo, vida visi koowa goloŋo.

²⁰Jar sum nisina Himenewus hiɗi Aleksander ka'a, nisiya sa nan vulsi goy tam Satan, kay nisi ma fi gatta kay hin ŋulda goyo.