Read Masana 2 TIMOTEWUS 1 Bible Online

2 TIMOTEWUS 1 - Masana bible

2 TIMOTEWUS 1

¹Paulus, Apostolla vi Kristu Yesu, kuɗ minda vi Lawna, kuɗ deŋga vi irita ta ka hay Yesu,

²tam Timotewus goora van ma hayan kamna: Slugota, lamanda hiɗi toyta vi Lawna Bumna, hiɗi Kristu Yesu Bum-Sumuna vaya.

³Nan gideɓe mi Lawna, ma nan ka sunum hiɗi tap-wida van goy butiya ki sumiyan-ŋolo sunum nala kaw, hay siɗawta vanu hay falayta hiɗi henjeta kaf yan may jokaŋɗi;

⁴kay human gan kay zimiyna vaŋu, nala dikan ka tan ŋolo kay ɗuwaŋu, nan ma hob hiɗi firita;

⁵human ka gan kaw kay vida vaŋu ta bay mileta ta ka hayaŋu, ta ay jewe hay suŋ-ŋolo Loyis hiɗi suŋu Eunike, nan wi goy ŋaa'a ŋolo ala vida na'ta ka hayaŋu.

⁶Wulini nan min ala naŋ ma do kut kuɗ vulda-slugota vi Lawna ta naŋ fa'a kuɗ tunda-ɓamta ta nan tun kaŋu.

⁷Kay ŋusta ta Lawna vulaya may ti ŋusta vi nartaɗi, may ŋusta vi donota, hiɗi ti-kamda, hiɗi ŋalda kaw.

⁸Kay na'ta naŋ ma li zulo'o kay li di-goyta kay Bum-Sumuna vayaɗi, kan nan sa ma daŋgayna valamɗi kaw, may tapaŋ hay zumalda hiɗi nanu kay labara ma firina, kuɗ donota vi Lawna.

⁹Nam ma suɗayawa, yayawa hiɗi yita peldetta, may kuɗ lopna ma nay lumnaɗi, may kuɗ ŋaɓta valam nam kay tuwamu, hiɗi slugota ta nam vulawa taya hay Kristu jew liyn ma vatɗina pa.

¹⁰Slugota na'ta vul tuwa'awa goy wulini, hay li ma sa ma su'da vaya Yesu Kristu maawa, hay li ma nam muɗ mittawa goy maŋaya, hay li ma nam mar irita hiɗi bay loɗ-goyta goy haraŋi hiɗi labara ma firina.

¹¹Nam tunanawa sa ma kus yoboyna, sa ma apostolayna, sa ma hatta kaw kayni kay labara ma firina namna.

¹²Kuɗ labara ma firina namna nan ka ci lasta, may nan li zulo'o kay kaynɗi, kay nan wi nam ma nan vi hayamna, kay nan wi ala nam as ŋom sle ma vulanti manna ta-ta hay buur namna ɗawni.

¹³Yoboy ma bay gesna ma naŋ humum hay vunanna, naŋ ma ŋomomu hay vida, hay minda ta ka hay Yesu Kristu kaw, naŋ ma sli kuɗumu.

¹⁴Ŋomaŋ va ma ŋaana ma vuli taŋu kuɗ Ŋusta Peldetta ta ka musi hayaya.

¹⁵Naŋ ma wi ala nisi sa hay Asiya kaf hinanawa goyo, jarsi kayni si Figelus hiɗi Hermogenes.

¹⁶Bum-Sumuna li slugota tam ziyna vi Onesimus lige, kay nam sleɗan dikanawa sem ŋolo, tuwam may li zulo kay jaɓna vanɗi kaw.

¹⁷May hay li ma nam co hay Rom, nam garan gosoyo, nam fanu kaw.

¹⁸Hin Bum-Sumuna vulum a nam fi lamanda kulo talamu hay buur namna ɗawni. Sunda ta nam sunan hay Efesus naŋ kay tuwaŋ wa' goy ŋaa'a ŋolo suw segen kaf.