Read Masana 2 TIMOTEWUS 3 Bible Online

2 TIMOTEWUS 3 - Masana bible

2 TIMOTEWUS 3

¹May naŋ ma wi ala, hay buur ma cawn ɗawni, liyn ma joona ma ma'a.

²Hay na'ta ɗawni sumun ma muɗ jowo, min gurju'u, jigal tuwsiya, ŋula, ŋel vun sumaysiya, gi deɓ mi saɗi, bay-peldete,

³murliya, kirkiliya, sa yaw diira, tel tuwsiɗi, muɗi muuru, ka gawt tam ŋaata,

⁴di newta, tap waa'a, irsi duki kay subur-tuwta, min darta vi tuwna ŋolo suw Lawna.

⁵Sa li ki nisi vi kuɗ Lawn nala, may puw vunsi kay donota valamu, sum sa ki kayni nala naŋ ma muɗ bugolaŋ tisiya.

⁶Segen jarsiya cuk kalaf hay ziyna, nisi ɗut boyn sa hobay hiɗi sulukŋa, sa ka hiwir kuɗ darta vi sliwna tara'a tara'a,

⁷hat dok-doko, may co tam wida vi gasita noŋɗi.

⁸Ki Yanes hiɗi Yambres yaw kulo'o kat Musus nala, sum nisina yaw kulo'o kat gasita nala kaw, nisi kayni si sum sa varta visi ɓulakiya, vida visiya may ziy wakkaɗi.

⁹May nisi as wul voksi loɗi, kay ɦoyta visiya ma vul tuwa' goy kir sumun kafe, ki sum sa ma'an lakŋi nala.

¹⁰May naŋu, naŋ hum hatta vanawa hiɗi poyta vanu, sle ma nan col kalamna, vida vanu, zigin-zlata vanu, minda vanu, so-tuwta vanu,

¹¹zumalda vanu, lasta vanu kaw. Lasta ta nan ca' hay Antiokiyaɗi ti tarige? Hay Ikoniyum hiɗi Listra kaw? Zumalda ta nan ziya'ɗi ti tarige? May Bum-Sumuna butan goy vunam kafe.

¹²Nisi kaf sa min lak hay vida kuɗ Kristu Yesu nisi ma fi zumalda.

¹³May sum sa joona hiɗi sa ɗut sumuna ma tuɗ voksi dok-dok hay joota, hay li ma nisi ɗut sumuna, ɗut tuwsi nisi kaw.

¹⁴May naŋu, musaŋ hay sle ma naŋ hatamna, ma naŋ wum goy gasina kaw, kay naŋ wi nam ma naŋ hat kuɗumna.

¹⁵Kay hay goorta vaŋ pa, naŋ wi ɗota peldetta, kay na' as vulaŋ yalda kay naraŋ tam su'da kuɗ vida vaŋu hay Kristu Yesu.

¹⁶Ɗota kaf Lawna gi suk ka'a, na'a ŋaa'a kay hata, kay muɗ varta, kay ɗiger sana, kay hat san hay gasita,

¹⁷kay sana vi Lawna ma li nagay nag', asay kay lop ma ŋaana pet kaw.