Read Masana TITUS 1 Bible Online

TITUS 1 - Masana bible

TITUS 1

¹Paulus, sa ma sunda vi Lawna, Apostolla vi Yesu Kristu kaw, kuɗ vida vi sa vileki-goyna vi Lawna, hiɗi wida vi gasita ta ŋray hiɗi poyta ŋaata vok Lawna,

²ma tuni kay cubta-sle'ta vi irita vatɗita, ta Lawn ma ka sinɗina di ka'a hay liyn ma kali ɓa-ɓan pa;

³Nam ɗek yoboyna valamawa goy haraŋi hay liyna valamu kuɗ kusta-yoboyna ma Lawna ma su'da vaya vulum hay ɓanu.

⁴Tam Titus, goora van ma gasina hay vida vaya ta kepta: Lawna Bumna hiɗi Yesu Kristu Bum-Sumuna ma su'da vaya ma vulaŋ slugota hiɗi toyta tage!

⁵Kay na'ta nan hinaŋ hay Kreta, kay naŋ ma kot sle ma hinina pet goy hay liyam ɗiger, lak sa maariyana goy hay hoyok-ziyn kaf,

⁶Nam ma lin mi sa ma law ma joo may kuɗumɗi, jufna vi cat kepe, gurona valamu viy ŋaa'a, nisi ma lin si guro sa lawt ka kuɗsi ala nisi viyuwu lebo ŋel-vundaɗi.

⁷Kay sa ma ŋom tapna ma li hiɗi law kuɗumɗi, ki sa ma ŋom slena vi Lawna nala, nam ma subur tuwamɗi, muɗ ɦiy gosoyɗi, vul tuwam goy tam dolaynɗi, waskayɗi, goslta vi gurjut tay hayamɗi kaw;

⁸may nam ma lin mi sa ma vi rogoyna, mi bana sum sa ŋaana, ŋali, ɗigere, tuwam vuli goyo, tuwam teliya,

⁹juni tam yoboy ma gasina ki nam hatay nala, kay nam as hatsi hiɗi hatta gasita, kay sa ci wayta ma hot goy bugolsiya.

¹⁰Kay sum sara ka'a, suw pet jar sa kaay-gosayna, sa hum gattaɗin ŋolo, sa ɓak sle ma waana, sa ɗut sumun goyna,

¹¹Sum nisina naŋ ma hotsi vunsi kalafi. Nisi ɦo ziyn gaa'a, hay li ma nisi hat hatta ta hay liya'ɗita, kay gar wurak ma hiɗi zulota.

¹²Sa kep jarsiya, sa ma jobta visi kay tuwsiya, nam di'e: Sum sa Kretena dok-dok ka sinda, muuriya ma ɦiyna, haysi kalaf poyo.

¹³Dita kayni gasiya, kay na'ta naŋ ma gatsi dono'o, kay nisi ma lak ŋaa'a hay vida.

¹⁴Kay nisi ma tap kuɗ labar ma waana vi sa Yudiyanɗi, kuɗ gatta vi sum sa hin gasita goynɗi kaw.

¹⁵Slen pet ka peldete kay nisi sa peldetna. May sa liwisna hiɗi sa bay-vina va ma peldete may kisi noŋ ne'ɗi. May varta visiya hiɗi tap-wida visi ka liwisi.

¹⁶Nisi di hiɗi vunsi ala nisi wi Lawna, may hay lopna visiya hiɗi tap-wida visi ka liwisi, ŋel vunu, as kay lop ma ŋaanɗi kaw.