Read Masana FILEMON 1 Bible Online

FILEMON 1 - Masana bible

FILEMON 1

¹Paulus sa ma daŋgayna vi Kristu Yesu. hiɗi Timotewus ɓasuyna, Tam Filemon, nirma'na ma hayma kamna hay lopna,

²Tam Afiya, ɓasuma'ta, tam Arkipus, nirma' ma hay duura, tam Ekklesiyata ta ka hay ziyna vaŋga kaw:

³Lawna buya hiɗi Bum-Sumuna vaya Yesu Kristu vulgi slugota hiɗi toyta tage.

⁴Nan gi deɓ mi Lawna van dok-doko hay li ma nan yaŋ seŋ hay siɗawta van kaf kaw;

⁵Kay nan ka hum kay minda hiɗi vida vaŋu ma ka ɗek goyo tam bum-Sumuna Yesu, tam sa peldetna kaf kaw.

⁶Nan ka joboŋu kay tapta kepta vi vida vaŋu ma muɗ li lopo, a naŋ ma muɗ wi slen kaf ma naana kuma'a tam Kristu.

⁷Kay nan fi firita hiɗi teŋ-irta ŋolo kuɗ minda vaŋu, ɓasunna, kay kuɗaŋ naŋu dik sa peldetna kaf tunawa gaa ŋali.

⁸Kay na'ta hiɗi taala hay Kristu nan buti goy ŋolo kay daŋ sle ma hay liyamna,

⁹may nan min siɗawaŋ siɗawaya hay sem ti-kamda, ki nan Paulus ka ki kayn nala, sa ma maara, wulin lo sa ma daŋgayna kuɗ Kristu Yesu,

¹⁰Nan siɗawaŋ kay goora vanu Onesimus, ma nan vuɗumawa hay jaɓna:

¹¹Jewe nam ay va ma waa'a kaŋu, may wulini nam ma lin mi ma gutaŋu, gutan nan kaw;

¹²nan gum iramisawa taŋu, namu ma muɗi mi dukanna.

¹³Nan var kay telemis katanu, kay nam sunan hay baŋalaŋu hay li ma nan ka juni hay jaɓna kuɗ labara ma firina.

¹⁴May nan min li kayni bay varta vaŋɗi, a ŋaata vaŋu ma li hiɗi donotaɗi, may kuɗ minda vaŋu.

¹⁵Kla, kay jaram ɓuraway goy hiɗi naŋ kayni ir liyn neeɗa, a naŋ ma fumu hay vatɗita,

¹⁶may ki gorvona nala loɗi, may ŋaa'a suw gorvona, ki ɓasuŋ ma hayan kalamna nala, suw pet kan nanu, may ŋol suw lo kaŋ naŋu, kuɗ sliwna, kuɗ Bum-Sumuna kaw.

¹⁷Kay na'ta kayni, la naŋ ŋaɓan ki banaŋa nala, naŋ ma vumu ki naŋ vantin mi nan nala.

¹⁸La nam laŋgin mi joo mige kaw, lebo la va vaŋ ka kalam kaw, naŋ ma ŋaɓam kan nanu.

¹⁹Nan Paulus ɗo hiɗi ɓan nan kay tuwanu: Nan ma wurakaŋga, a nan ma di ala naŋu kaw mi balla vanuɗi.

²⁰Awa, ɓasunna, lopn kayni, hinan a nan fum kuɗaŋ fi' hay Bum-Sumuna, tunan dikan gaa'a hay Kristu tage.

²¹Nan kiran ta ala naŋ ma hum kuɗanu, kay na'ta nan ɗo taŋu, hiɗi wida ta ala naŋ ma li slen ɗawni suw ma nan daŋgina.

²²Kotaŋ liyn ma musta kanu kaw, kay nan ka var ala kuɗ siɗawta vigiya nan ma vulis tigiya.

²³Epafras niranna ma daŋgayna kuɗ Kristu Yesu ka gaŋ deɓe,

²⁴Markus, Demas, Lukas, nuriyonna sa lopna nala kaw.

²⁵Slugota vi Bum-Sumuna vaya Yesu Kristu mus hiɗi Ŋusta vigi musge.