Read Masana HEBRENA 1 Bible Online

HEBRENA 1 - Masana bible

HEBRENA 1

¹Hay li ma jew ɓa-ɓana, Lawna law sem ŋolo hay hagata mara'a mara'a hay sa jobta-Lawna kaw tam sumiyaya,

²May hay buur ma cawn wulin lakŋi, nam law tayawa hay goora valamu, ma nam tunum kay slen kaf hay vocota, nam ma nam kot slen kaf hiɗi namna kaw.

³Goor namna gajijita vi Lawna wile goy hay tuwam pa, nam ŋray ca hiɗi namu kaw, ma ziy slen pet kulo'o hiɗi donota vi yoboyna valamu, hay li ma nam vat hiɗi poora vi sulukŋa vatna, nam musawa gaa gal ɓamta jufta vi Lawna ma gaŋeraŋ-petna hay liyn ma Kulo-Jamna,

⁴nam muɗi ŋolo suw sa sunda-wuralawna, ki nam hay vocota fi semda ta tiy ŋaa'a suwsiya kaw.

⁵Tam Sunda-Wuralawna marige ma Lawna di ala: Naŋ mi goora vanu, nan vuɗaŋawa vaydi na? Lo nam di ala: Nan min mus mi bulumu, nam ma mus mi goora vanu kaw?[1]

⁶May hay li ma nam mar ma vuɗi jewna hay nagata, lo nam di'e: Sunda-Wuralawna vi Lawna kaf ma girifimu,

⁷Nam di kay sa sunda-wuralawna ala: Nam muɗ sa sunda-wuralawna valamu goy simeɗna, sa sunda valamu nam muɗsi goy sin-kuta.[2]

⁸May kay goora nam di'e: Zlamda-mulda vaŋ naŋ Lawna ka ta-ta hay vatɗita, lo, Zugulda mulda vaŋu kayni ti zugulda ta ɗigere.

⁹Naŋ min ɗigertawa, may ka gawtawa hiɗi bay-ɗigerta; kay na'ta Lawna, Lawna vaŋ ɦok mul ma firita kaŋawa suw nuriyoŋŋa kafe.[3]

¹⁰Di mara lo ala: Naŋu Bum-Sumuna, hay cawa'ta tunita naŋ kot nagata, dukalawna kayni mi lopna vi ɓaŋu;

¹¹Nam ma ɓulak goyo, may naŋ ma musa; sle namna kaf ma muɗ busaya ki sligara nala;

¹²Naŋ ma ɗutum ki sligar ma cukŋa nala kaw, nam ma muɗ ki sligar ma kepna nala, may naŋ ka dok-dok ki jew nala, busata vaŋ fi vatɗi kaw.[4]

¹³Tam Sunda-Wuralawna marige ma nam di ala: Musaŋ hay gal ɓan ta jufta, ta-ta nan muɗ sa gawt kaŋŋa va ma naŋ tun wur-seŋ kalamna?[5]

¹⁴Nisi kaf say si ŋusiyana sa sunda vi Lawna sa cuki goyo kay li sunda kay sa as fi su'da hay vocota ɗisu?