Read Masana HEBRENA 10 Bible Online

HEBRENA 10 - Masana bible

HEBRENA 10

¹Kay gatta kayn mi ŋus sle ma ŋaana ma min ma'a, na' may ti ŋrata gasita vi slen ma gasinaɗi, kay na'ta hiɗi ɗifinna ma nisi lum dok-dokŋa hay busata busata, na' as ɦur sa kulo tam Lawna goy pasiyak noŋɗi.

²Lali naɗina, nisi hin vulda vi ɗifinnawa ɗisu? Kay nisi sa li girifta na'ta fisi poray goy vatiya sem kep, suluk mara ma hay tap-wida visiya ma ka kitata kisi may loɗi.

³May hay ɗifinna kayni, humsi gisi kay sulukŋa busata busata kaf.

⁴Kay busuwna vi luway-jufayna hiɗi fok-gamalana as yaw sulukŋ goy noŋɗi.

⁵Kay na'ta hay li ma Kristu ma hay nagata nam di ala: Naŋ min ɗifinnaɗi, vuldaɗi kaw, may naŋ kotan tuwnawa kanu.

⁶Ɗifin ma ŋal-goyna hiɗi ɗifinna ma kay sulukŋa kaw dikaŋ may vumɗi,

⁷Nala nan di'e: ɗuwaŋu nan ka ma'a, hay ɗerwel ma ɗutina dita ɗoy kan ala: Kay li minda vaŋ naŋ Lawna.[23]

⁸Nam di jew ala: Ɗifinna, vulda, ɗifin ma ŋal-goyna, hiɗi ɗifinna ma kay sulukŋa kaw naŋ minimɗi, dikaŋ vumɗi kaw, nam ma li hay hagata kuɗ gatta kaw.

⁹Bugolda nam di'e: Ɗuwaŋu nan ma ma kay li minda vaŋu. Nam ɦas girifta ma jewna goyo kay tun ma wuliya.

¹⁰Hay minda na'ta kayni, hay vulda-goyta vi tuwna vi Yesu Kristu, ma sem kep kay kaf, nay porawa goyo.

¹¹Mul ŋol ma-ɗifinna gigekaw col hay liyna ma lopna valamu, buurta kaf kay li lopna valamu, kay li ɗifin ma nam ka lumna ma as kay yaw sulukŋa goy noŋɗi.

¹²May namu, hay li ma nam li ɗifin sem kep kay sulukŋa lina, nam musawa gaa gal ɓam ta jufta vi Lawna kay dok-doko,

¹³nam ka cub kay sa gawta ma muɗ goy mi va ma nam tun selem kalamna.

¹⁴Kay hiɗi vulda kep, nam muɗ sa li goy peldetna goy pasiyak ta-ta hay vatɗita.

¹⁵Kay kayni mi va ma Ŋusta-Peldetta ka di goy taya. Kay hay li ma bugolda nam di ala:

¹⁶Kayni ti bonota ta nan min juna' hiɗi nisiya, bugol buur namna kayni, din Bum-Sumuna: Nan ma tun gatna van hay diksiya, nan ma ɗom kalaf hay yamda-wida visiya. Nam di mara lo:

¹⁷Human ma gan kay sulukŋa visi loɗi, human ma gan kay jiw-zlata visi loɗi kaw.[24]

¹⁸May hay li ma gida kay sulukŋa ka'a, ɗifinna ma kay sulukŋa may loɗi.

¹⁹Kay nay kaw ɓosiyonna, nay fi butta-goytawa kay cuk kalafi hay liyn ma peldetna hay busuwna vi Yesu Kristu,

²⁰Liyn ma Yesu malam goyo kaya ki hagata ta wulita ta iriya kaw, raw hay sligar-gaɓayna, kayn min di'e hay sliwna valamu;

²¹nay fi mul ŋol ma-ɗifinna ma tuni kay ziyda vi Lawna.

²²nay ɦuray goboy talamu hiɗi dikga ta gasita, hiɗi vida ta hobay ŋaa'a, dikay muzi goy peldet kay tap-wida joota, tuway kaw muzi goyo hiɗi niyn ma kilira.

²³Lay di-goyta kay cubta-sle'ta vaya bay giriŋi, kay nam ma li deŋga nam mi gasiya kaw.

²⁴Gatay tuway dono'o jar-tuwaya, kay nay ma zut tuwaya kay li minda hiɗi lop ma ŋaana kaw.

²⁵Nay ma hin dakka vaya goy ki segen ka li naɗi, may gatay jar-tuwaya tuwaya, li kayni ŋol suwa hay li ma nigi wi buura ka ma goboyo.

²⁶Kay la nay li suluku hiɗi minda vaya bugol nay fi wida vi gasita fina, hay na'ta kayni, ɗifin ma kay sulukŋa may hini loɗi,

²⁷may narta joo ŋolo kay kitata hiɗi kuta ta zal wizik-wizikka ma mut sa ŋel gatta!

²⁸La sa raw gatta vi Musus goyo, nam ma fi cita-goyta bay kir-hawta, kuɗ di-goyta vi sa di-goyta ma' lebo ɦidi.

²⁹Wurakŋa joo'o ŋol suw kayni ma ŋamis kay sa ma tay goora vi Lawna gaa kuɗ selemu, ɗuw busuwna vi bonota ma nam muɗi goy peldet hiɗi namna ki va ma waa'a nala, ma ŋul Ŋusta vi slugota kaw, nigi vara' naɗi su?

³⁰Kay nay wi nam ma di ala: Hot joot kayn mi nanu, wurak joot kay joota mi nanu. Mara lo: Bum-Sumuna ma ka kitata kay sumuna valamu.

³¹Joo ŋolo (kay sana) kay nig gaa hay ɓam Lawn ma irina pa.

³²May humgi jak' kay buur ma jewna ma, hay li ma nigi fi haraŋa fi, nigi lak dono hay duur ŋolla hay lasta;

³³nigi muɗi ki va ma sumun ɗuwumu, cen kuɗum ɦawa kaw nala, hay ŋulda hiɗi zumalda, hay liy hena lo, nigi tap hay lasta vi nisi sa ka las kaw.

³⁴Kay sa daŋgayna kaw muɗi haw kirgiya, nigi va'awa tigi hiɗi firita kay nisi yaw farayna vigiya, kay nigi wi ala nigi ka hiɗi farayna ma ŋaa suwna ma mus dok-dokŋa kaw.

³⁵Nala vida vigi ta wurakŋa juni kuɗa' ŋolda nigi ma hina' goyɗi!

³⁶Nigi yiya kay so tuwgiya, kay hay li ma nigi li minda vi Lawna lina, nigi ma fi va ma Lawn ŋamay tigina.

³⁷Lo, kay liyn neeɗa, kiɗay ne' ɦawa, nam ma min ma'a ma ma'a, nam ma musayɗi,

³⁸Ma ɗigera vanu ma mus iriya kuɗ vida. May hay li ma nam hotawa goy bugolomu, ciwta van may firi kalam noŋɗi.[25]

³⁹May nay say si sa hot bugolaya kay tuɗ tam ba-goytaɗi, may jar nisi sa vi'e, tam su'da vi ciwta visiya.