Read Masana HEBRENA 13 Bible Online

HEBRENA 13 - Masana bible

HEBRENA 13

¹Sogi tuwgiya kay min ɓosiyom-tuwgina jar-tuwgiya.

²Vida vi rogoyna yigi jok goy ka'ɗi, kay hiɗi lita kayni segena tap sa sunda-wuralawna kuɗsiya bay wida.

³Vargi kay sa ka hay daŋgayna ki nigi ka hay daŋgayna hiɗi nisi nala, vargi kay sa ka hay lasta, ki nigi ka hay tuwna kep hiɗi nisiya.

⁴Slita ma jar jufna hiɗi cata yalam ma li sliy kulo kay kafe, liyn ma buura vi jufna hiɗi cata ma li bay liwisi. Kay Lawna ma ka kitata kay sa liwisna hiɗi sa li zlata-bulota.

⁵Hin minda vi gurjuta li mul kay poyta vigiɗi; nigi ma lak firiya hiɗi slen ma ka kigi wulinna, kay Lawna kay tuwam kaw di'e: Nan ma hinaŋ goyɗi, Nan ma noyaŋ goyɗi kaw.

⁶Kuɗ kayni nay fi di hiɗi kursuli ala: Lawna nam mi ma gut kuɗanna, Nan ma li nar loɗi, San as lantin mi mige?[31]

⁷Vargi kay nisi sa ɗekgi kay hagatawa, sa kus yoboyna vi Lawna tigiya; ɗuwgi poyta visiya, sligi kuɗ vida visi kaw.

⁸Yesu Kristu mi nam ma kamata, vaydi, ta-ta hay vatɗita kaw.

⁹Nigi may hin ma tuwgi ɗut goyo kuɗ hatta kaf ma pullaɗi, kay ŋaa'a kay dikga fi col dono'o hay slugota, may kay tina ma li va ma ŋaa'a tam nisi sa tumɗinɗi.

¹⁰Nay ka hiɗi giwin-ma-ɗifinna ma sa sunda sa li lop hay tabernaklena nagay kay fi tina kuɗumɗi.

¹¹Mul ŋol ma-ɗifinna mar busuwna hay liyn ma peldetna kay li vulda kay sulukŋa vi sumuna, may tuwna vi muuriyana ŋalam goy jiy kaŋŋa.

¹²Kay na'ta kayni Yesu kaw, a li sumuna goy peldete hay busuwna valamu, fi lasta goy jiy hoyok-ziyna kaw.

¹³Nala cukay goy hay kaŋŋa pa kay tuɗay talamu, kay ziy zulota valamu.

¹⁴Kay hoyok-ziyna vay may gaa tan dok-dokɗi, may nay garay nam ma min ma'a.

¹⁵Hay namu, nay ma mar ɗifinna vi suburta tam Lawna dok-dok, kayn min di'e vuɗna vi vunaya ma li di-goyta kay semda valamu.

¹⁶May, lita ŋaata hiɗi vulda vi slen tam sumuna yigi ma jokomɗi kaw; kay ɗifinna ma kir sa ŋaana kayni mi slen ma ki kayn nala.

¹⁷Humgi kuɗ nisi sa ɗekgi kay hagata, hotgi yigi gaa kuɗsi kaw. Kay nisi ka lakay jiger ŋom ciwta vigiya, ma nisi ma vi labar kalamu kaw. Vulsi liyna a nisi li lopna visiya hiɗi firita, may hiɗi yortaɗi, kay kayni li va ŋaa'a tigiɗi.

¹⁸Siɗawgi kuma'a, kay numa vi goy haraŋ kay fi tap-wida ta ŋaata, kay numa ma var kay li ŋaa'a hay liyn kaf.

¹⁹Nan ka job tigiya kay nigi li kayni dok-dok, kay nan ma vulis tigi gosoy de'.

²⁰Lawna vi toyta, -- nam ma hay donota vi busuw bonota ma vatɗina, mar ma ŋomda ma ŋolla vi fok-dimina, Bum-Sumuna vaya Yesu kulo hay mitta pa --

²¹nam muɗgi dono'o kay lop ma ŋaana pet kay li minda valamu; kay nam li hayaya slen ma kiram ŋaana hay Yesu Kristu, talam namu gajijita hay vatɗita vatɗita, Amen!

²²Ɓosiyonna, nan siɗawgiya kay nigi ma hum yoboyna vi teŋ-irta kayni hiɗi ŋalda, kay nan ɗo yoboyn kiɗay ɦawa tigiyawa.

²³Nigi ma wi goy ala ɓasuyna Timotewus fi butta-goytawa. La nam coowa gosoyo, nan hiɗi nam ma coys ɗuwgiya.

²⁴Gigi deɓ mi sa ɗekgi kay hagata kaf hiɗi sa peldetna kaf kaw. Sa Italiyana kaw ka gigi deɓe.

²⁵Slugota mus hiɗi nigi kafge!