Read Masana HEBRENA 3 Bible Online

HEBRENA 3 - Masana bible

HEBRENA 3

¹Kay na'ta ɓosiyonna sa peldetna, sa ir ɓurawta vigiya ka hay yita ta may wuralawn pa, tungi varta vigi kay apostolla hiɗi mul ŋol ma-ɗifinna ma vida vay colay kalamna, Yesu.

²Nam vi gasi kuɗ nam ma tunum kay kayni, ki Musus li nala hay ziyda vi Lawna kaf,

³kay nam ŋami nagay kay gajijita ŋolo suw Musus, ki sa ma in ziyna selem tiy ŋolo suw ziyda kay tuwa'a nala.

⁴Kay ziyda tarige kaf kota' mi sa'a, may nam ma kot slen petna kayni mi Lawna.

⁵Musus li sunda hay gajijita hay ziyda vi Lawna kaf, kay li di-goyta kay slen ma min diys goy bugolda.

⁶May Kristu nam kayni ki Goora kay ziyna valam nala. Nay mi ziyna valamu, la nay vi vida hiɗi cubta-sle'ta ta nay subur tuway ka'ta dono'o ta-ta hay dabta.

⁷Kay na'ta, ki Ŋusta-Peldetta di nala: Vaydi la nigi ka humum delemu,

⁸So'ot dikgiya ki hay liyna vi yawta-kulota, hay buura vi nemda hay hay fulda naɗi,

⁹hay li ma sumaygi nemanu kay wakanu, nisi wi lopna vanu ir busat dok-fiɗi,

¹⁰Kay na'ta dikan roŋ tam jafna kayni, nan di'e: diksi viy goy dok-doko, nisi may wi hagata vanɗi.

¹¹Nan yi va kanu hay ɦiyda van ala: hay gasita, nisi ma cuk kalaf hay tun sukka vanɗi.[9]

¹²ŋomgi tuwgi ŋaa'a ɓosiyonna, kay sa jargiya ma li hiɗi dikga joota hiɗi bay-vidaɗi, a nam ma cal goyo hiɗi Lawna ma irinɗi.

¹³May hay buurta kaf gatgi jar-tuwgiya, hay li ma sa fi di ala: Vaydi! Kay sa jargiya ma so'ot kuɗ ɗutta vi sulukŋaɗi.

¹⁴Kay nay ay sa muɗi tap hay Kristu, la nay vi vida vay ta jewta dono'o ta-ta hay dabta,

¹⁵Hay li ma dit ka di'e: Vaydi la nigi ka humum delemu, so'otgi dikgiya ki hay liyna vi yawta-kulota naɗi,[10]

¹⁶Nisi sa, hay li ma nisi humi hum' may nisi nef Lawna, nisi kayn si sarige? Kayni si nisi sa kali goy hay Egipte pa hiɗi Musus ɗisu?

¹⁷Sum sa dikam roŋ tisi ir busat dok-fiɗi kayni tiɗ gige? Kayni si sa li suluku, sa mitis goy hay fulda ɗisu?

¹⁸Sa nam yi va kalam ala nisi ma cuk hay tun-sukka valamɗin si sarige? Kayni tam nisi sa min humum vunamɗina ɗisu?

¹⁹Nay kaw ɗuway hawtige, nisi fi cuk kalafɗi kayn kuɗ bay-vida visiya.