Read Masana HEBRENA 5 Bible Online

HEBRENA 5 - Masana bible

HEBRENA 5

¹Kay na'ta, mul ŋol ma-ɗifinna kaf, vumi goy jar sumuna, tunum sun vok Lawna kay sumuna, kay mar vulda, kay li ɗifinna kaw kay sulukŋa.

²Nam as hum nisi sa wi vaɗi hiɗi nisi sa viyi goyna, kay nam kay tuwam kaw ka hiɗi maŋayta.

³Kuɗ maŋayta na'ta kayni, nam li ɗifinna kay sulukŋa valam kay tuwamu, li ɗifinna kay sulukŋa vi sumuna may.

⁴Sa as tun ŋolda kayni kay tuwam ma ɗeŋɗi; may san yumi mi Lawna, ki Aaron nala.

⁵Nala kaw, Kristu sli ŋolda kayni kay tuwamu kay muɗ goy mul-ma-ɗifinnaɗi, may mi nam ma diy talam ala: Naŋ mi goora vanu, nan vuɗaŋawa vaydi.[13]

⁶Lo ki nam di hay liyn mara kaw ala: Naŋ mi mul-ma-ɗifinna ta-ta hay vatɗita, kuɗ zlaara vi jaf Melkisedek.[14]

⁷Kayni nam ma, hay buura vi irita valamu hay sliwna, hiɗi siwelda ŋolo hiɗi zimiyna kaw, nam mar siɗawta hiɗi tiyta tam nam ma as kay suɗum goyo kay mitta. Siɗawta valam humi hum kay hot-yamda valam ta gaata kuɗ Lawna.

⁸Nam mi goora, nir na'ta kep nam cuk hum-vunda kalamawa kay nam ci lasta.

⁹Hay li ma nam li goy pasiyak lina, nam muɗi bum su'da vatɗita kay nisi kaf sa hum kuɗumna,

¹⁰Hay li ma Lawna di goy kalam ala nam mul ŋol ma-ɗifinna kuɗ zlaara vi jaf Melkisedek.

¹¹Slen ka kuma ŋolo kay di kay lawt kayni, slena ma hum lopo ma sa as dum cawam goyɗi kaw, kay nigi muɗi hum lopo.

¹²Lali jar liyn lakŋi, nigi as muɗ goy sumay-hatta, hatta, may wulin lo nigi ka gar kay sa hatgi hatta ma gurayna hay yoboyna vi Lawna: Laliyan nigi coowa hay liyn ma nigi garam mi miira, may mi tin ma ɗeŋŋaɗi.

¹³Kay gige kaf ma ka vun miira nam bay hat wida vi yoboyna vi ɗigerta, kay nam mi goorgoor tuwa.

¹⁴May tin ma ɗeŋŋa kayni nam kay sum sa niyina, kay nisi sa, hay lita varta visi hatay yali kay ɓuraw jar ŋaata hiɗi joota.