Read Masana HEBRENA 9 Bible Online

HEBRENA 9 - Masana bible

HEBRENA 9

¹Bonota ta jewta, dita-gatta va' ta kuɗ girifta hiɗi liyn ma peldetna ma kay nagat ka'a.

²Kay nisi kot guɗukŋawa vatiya, hay liyn ma jewna ma yum ala liyn ma peldetna, va ma tun fitil kalamna, hiɗi tablena vi fun ma zlaray kalamna ay lakay haya.

³Goy bugol sligara ma gaɓay ma ma'na, ay mi liyn ma suwi peldetna.

⁴Kalaf haya, liyn ma ŋal urdina ma ora hiɗi arkena vi bonota ma tuwam kaf ŋuyi hiɗi or cusl', kalaf hay kayn dowayta ora ta manna haya, hiɗi zugulda ta goɗayta vi Aaron, hiɗi hambulla vi bonota kaw. Hay

⁵Kulo kay arkena, kerubena* vi gajijita ay lak', kuluɓ yam zlamda-slugota[21] hiɗi ŋusamu. Slen kayn nay as a di goy kalam kep kep wulinɗi.

⁶Hay li ma slen kaf kayn kotawa nala, muliyan-sa-ɗifinna as cuk kalaf dok-dok hay liyna vi tabernaklena ma jewna, hay li ma nisi li girifta.

⁷May hay liyn ma ma'na, kal kalaf kayn mi mul ma-ɗifinna na kep, sem kep hay busata, say hiɗi busuwna ma nam maram kalam nam kay tuwamu, lo kay joota vi sumuna kaw.

⁸Hay kayni Ŋusta-Peldetta ɗek goy ala: Hagata ta kal hay liyna ma suwi-peldetna bay mal tuwa, hay li ma tabernaklena ma jewna ay zaw tuwa.

⁹Kayni mi va ma ŋra kay liyna ma vaydina; nam ɗek ala sa ma li girifta hay tap-wida valamu, vulda hiɗi ɗifin ma lina as tuɗum tam pasiyakka noŋɗi.

¹⁰Lakŋi mi dita-gatta ma hay sliwna, ma law kay sle ma tina, cina hiɗi muzta mara'a mara'a, ma tuniya kay co ta-ta tam liyn ma kot slen goy hay liyam ɗigera.

¹¹May Kristu maawa ki mul ŋol ma-ɗifinna vi slena ma ŋaana ma min ma'a, nam raw hay tabernaklena ma ŋol suwa, ma pasiyak suw kaw, ma koti hiɗi ɓam saɗi, kayn min di'e ma may jar sle ma koti tannaɗi;

¹²may hiɗi busuwna vi ɦu-gamalanɗi, hiɗi busuwna vi guro-luwaynaɗi kaw, hiɗi busuwam kay tuwamu, nam kal kalaf sem kep hay liyn ma peldetna. Hay na'ta nam vulay butta-goyta ta vatɗita.

¹³Kay la busuwna vi fok-gamalana hiɗi luway-jufayna hiɗi butuw-kuna vi put-gunayta ma nisi yamam kay sa liwisna, nam lisi goy peldet kay liwista ta goy jiy tuwsita,

¹⁴busuwna vi Kristu nam ŋol suwɗi su? Nam ma hay Ŋusta ta vatɗita vul tuwam goy bay joota tam Lawna kay tuwam ma ɗeŋŋa, kay muz tap-wida vay goyo kay lop ma mitina, a nay ma sun Lawna ma irina.

¹⁵Kay na'ta kayni, nam mi ma tap-jaara vi bonota ta wulita, kay nanigekaw mitta ma li'e kay but sumun goyo kay raw-goyta ta nisi la' kuɗ bonota ta jewta, nisi sa yiya fi bonota nisi fi deŋga vi vocota vatɗita.

¹⁶Kay la testamenta ka'a, la linigekaw mitta vi nam ma li testamenta li goy li'.[22]

¹⁷Kay testamenta as li dono kayn bugol mitta, may hay li ma san ka iriya, na' may li lop noŋɗi.

¹⁸Kay na'ta bonota busayta kay tuwa' kaw li lop bay busuwnɗi.

¹⁹Kay hay li ma Musus di vun-ma-gatna kep kep tam sumuna kuɗ gatta, nam yaw busuwna vi guro-luwayna hiɗi fok-gamalana hiɗi niyna, ɗuŋus ma slaw keŋ', hiɗi hisop* kaw, yamam kay ɗerwella hiɗi sumuna kaw,

²⁰Nam di'e: kayni mi busuwna ma Lawna di kalam tigina.

²¹Nam yaw busuwna kay tabernaklena hiɗi slen ma lopna vi girifta kaf ki kayn nala kaw.

²²Kuɗ gatta, ŋol slen muzawa goyo hiɗi busuwna; nala la busuwna ɦok goyɗi, vulda gida mayɗi kaw.

²³La nanigekaw sle ma ŋray hiɗi sle ma hay wuralawna gasi ma liys poray ki kayn nala, kay slen ma gasi hay wuralawna kay tuwamu ma ɗeŋŋa min ɗifinna ma ŋaa suwa.

²⁴Kay Kristu may kal kalaf hay liyn ma peldetna ma koti hiɗi ɓam sa'a ma sli ma gasina naɗi, may nam kal hay wuralawna kay tuwamu, kay ɗek tuwam goy wulini kaya vok Lawna.

²⁵Nam may kal kalafi sem taray ca kay vul tuwam goyo sem ŋolo ki mul ŋol ma-ɗifinna kal kalafi hay liyn ma peldetna busata kaf hiɗi busuwna ma pulla naɗi;

²⁶la naɗina, Kristu ci lastawa sem ŋolo hay tun cawta vi nagati pa. May wulini hay dabta vi liyna, nam vul tuwam goy sem kepe kay vat sulukŋa goyo hiɗi busuwna valamu.

²⁷Kay ki koti kay sumuna kay mit sem kepe, bugol kayni kitata.

²⁸Nala kaw Kristu ma vul tuwam goyo sem kepe kay yaw sulukŋa vi sumun ŋolo goyo, ma vul tuwam goy haraŋ sem ma'ta lo, hay liy namna ɗawni may kay lawta vi sulukŋa loɗi, may kay sa ka zamamu kay su'da visiya.